Premier League : Paul Pogba vâta Man United ta point 3 ama pahlei!

Paul Pogba ta Manchester United ta tlô theina awpa goal amâ ngiah kaw nota, Penalty pangia leipa ta, zâhnia Hriatuazâ Premier League akhaihna liata Wolves nahta a pahniethaipa ta, Point 1 ngâlâh ama hlaopapua.

2nd Half liata 1-1 rairie ama châ hai nota, United châta hmia a sahna nata tlô theina daihti ryhpaoh chaimâhpa cha Paul Pogba heta a hlaopapua haw. He French midfielder Wolves defender, Conor Coady ta papao ta, he vâna heta Pobga heta United châta Penalty hlaopapuapa ta, chapie awpa ta a kaw chakâpapua haw. Pogba heta Season hmiatuapa liana khata Penalty ei thôh dua chapie pangia leipa ta; hetana chô heta hâta hmiatuapa liata Chelsea kao lâta Penalty pangiatuhpa, Marcus Rashford tleihai khoh vei.

Pogba ta Penalty a chapiepa he Wolves kaovaihtuhpa Rui Patricio, ta a vaw pakhâ hapa a châ.

United heta Wolves he cha tlupo ta chatôh thei muarua hra leipa ei ta, 1st Half chhôh chhochhi cha ei thôh ngâlâh kao dady liata ball ama chapiepa eima hmô.

Minute 27-na liata Anthony Martial ta a phei chavei lâ tawhta â ngia kawpa ta United châta a goal 50-na nata hmia amâ sahna za khô ta - 1st Half chhôh zydua cha he he goal a ngia chhôhpa a châ.

2nd Half a thao ei ta, Wolves heta United he ama pabua pahnie via khiah maw, tah thei awpa ta ama chadie pathao kaw. 

Minute 55-na liata Wolves châta Ruben Neves ta a za chapiepa cha, kaotôh pakhâhpa khaipa ta, kaochhôh lâ â ngia haw! 1-1 ama kaw châ ha heih.

Wolves châta goal khô chhi theina daihti ryhpaohpa, Raul Jimenez nata Neves zy ta hmô ei ta, United ama vâhnei chaimâh tah thei awpa ta, goal lâta pachâsa thei vei ei.

He hleikhô he cha, Pogba ta penalty a chapiepa rei leipa ta Kaovaihtuhpazy luh pahiahsa kaw muarua n'awpa daihti ryhpaohpa y khao vei.