'Tryst with Destiny' - Jawaharlal Nehru (Mara reihta)

Kô 1947, Thlazoh 14 zâcho a khô patawnah khata, India chata British avaona tawhtapa khotalaina hmôpa ta, ano kuphei ta â vaw duah hapa kha cha ta. He daihti liata India Prime Minister hmiatua chaipa, Jawaharlal Nehru biereipa, ‘Tryst with Destiny’ tahpa Mara reihta paliepa he vaw reih heih hra tua ma y.

"Kô hluhpi a khô hapazy liana khata eima hmialâ daihti awpa nahta bietaina vaw hnei ha pi ta, cha eima bietaina patlô n’awpa daihti cha a vaw tlô haw, a zydua ta tlyma la châ taraw vei, châhrasala eima bietaina liata a peimawh pachaih viapa eima patlô n’awpa daihti cha a vaw tlô haw.

Zâcho daihti khô ta, khizaw ta mokuh ramâ a khaih nota, India cha hrona thiehpa nata khotalaina hneipa ta khôphei chô thyusai ta â kaw hra haw. Cha daihti, khizaw thâtih liata tlô zôzaw tyh leipa, hnôhlâ hmo siesaipa ta khizaw thiehpa eima lâta keih eima chakâna noh, kohkina kôkhi ta miah vina lei ta, he chipho thlahmipa, palôh chhôhmarupa, daihti vâropi chhôh tlai tlybaipa ta a vaw y hapa heta, reikah a pathlie thei ha bâ hra n’awpa noh cha.

He daihti eihhrâhpa, pha patlua kawpa liana heta India nata a chhôh liata pahrâpa a chyhsazy hleikhôta, chyhsa châta hmophapa tao awpa ta tlokhuh â pie awpa ta nata chakao awpa ta bie eimâ taih awpa a châ.

He India ta khitlyna thiehpa lâthlôh â kaw chhih lymâ n’awpa liana heta hmialâ daihti liata khâpa ma a kaw puakhei lai aw tahpa hiahrihna chhâ thai leipa chata miah mokhâh aw ta, hnôhlâ daihti kôzabi vâro tlai a khô hapazy liana khata a kaw tei hnolona zy, a hlaotlohna nata hlaotloh leina hniehnôhzy bie thlâh ha ta. Vâhneina nata vâduana lâthlôh â kaw chhih laih lymâ liana khata, India heta a hmialâ daihti châta hmo a tlua tyhpa cha tleisai beih leipa ta, thatlôna â lana chaipa, a saduthlienazy chhao my beih vei. Atanoh heta India ta vâduana âvaw tyhpa cha pachhâsa pi ta, India ta anosasyh â hmôpapua lilaw ha heih.

Atanohta hlaotlohna eimâ lypa he chhâhchabi miakha deita châ ta, ryhpaona chhikao â pahy pathaona, pahniena rônah viapa nata hlaotlohna lai viapa eima kaw hnei thei n’awpa ta chhikao a pahy pathaona cha a châ. He ryhpaohna thlaita chahu thai awpa heta eima riahphana ta ngâh ta, eima sona ta â pha ma? Eima hmialâ daihti liata pahaonazy a pyh thai awpa ta eima riahphana nata sona ta â pha tlai aw ma?

Khotalaina nata biehneina heta maohphaohna avaw chhi tyh ta. Cha maohphaohna cha he, India zawpi vyuhtuapa keimo ryureituhpa sahlaozy ngiatlâh liana heta â pahnieh. Khotalaina a vaw pih hlâna khata cha hriapasana vâta pasa athata vaw tao pi ta, kha pachârôhna zydua atheithlâh hana vâna khata eima palôh phaozie chhao â hri ngaita kaw. Kha pasana hryta thokha khata atahmâ taihna heta miah pazi ta. Chatana chô chhao chata, daihti khô chiehpa cha vaw kua khao leipa aw ta, hmialâ daihti ta miah a aw ngâhai.

Cha hmialâ daihti liata hmo eimâ kaw tyhpazy cha phasana nata naosiana châ bohbi leipa ta, lôh pahâh kawpa ta a pahâna tlyma châ bohbi vei; khahlâ zydua ta bietaina eima vaw hnei ha tyhpazy nata atanohta bietaina eima hnei heih awpazy hlaopatloh awpa ta dua pakhao leipa ta eima tei n’awpa tlao a châ. India chakaona tahpa yzie cha chyhsa thysâh, pasa a tao haipazy chakaona tahna a châ. A yzie cha sipasana/dyhchhiena nata hruna nata pasana hri nata chyhsa zydua ryhpaohna alyuchopa ama hnei tyh leipa pachhâsa awpa tahna a châ.

Keimo chhâ liata chyhsa rônah chaipa achhuahna, palôhkhona cha chyhsato mokhaoh tawhta pasana mothlih a lohpa phie hru khai ha awpa châ ta. Cha cha eima vei pha leipa lâta hmo a ypa a châ thei ngyu aw, châhrasala riethei taona pai leipa ta, mothlih a loh chhôhta la, eima raihria awpa chhao chhâ beih aw vei.

Chavâna chata dua pasuapa ta rai eima hria awpa a ngiah aw ta, eima saduthlienazy a hmeiseihpa lâta pachâsa awpa ta hriapasana dei leipa la tao awpa hnei ma pi. Cha saduthlienazy cha India châta châ ta; khizaw châta chhao châ hra ta, achhâpa cha, khizaw phopi to nata chyhsatozy he apachhaih ta, â hla kawpa ta pahrâ awpa hawhta –pachâna kaw hnei awpa ta la, eimâ zaokhina â hnia tu sai ha.

Aryhna/Adyhna he a pachhaih thei lei awpa hawhta reipa châ tyh ta; cha hawhna pyly ta khotalaina chhao; cha hawhna pyly chata hneirôna zy nata chhiena chhao, he khizaw miakhapa liana heta a eihhrâhpa hawhta khâchâ so thai awpa châ khao vei.

India zawpi, âma châta vyuhtuapa eima châna zy hnohna chata, he khitlyna liata khâchâ ngiapâna nata ngâna hnei awpa ta hrua ei na ta. Atahmâ he aseisiana sisaw leipa nata achhienazie ta a seisiana daihti châ vei, palôh chhiepa phaona daihti nata mohropa baina daihti châ khao vei. Khotalai hapa India châta syna Opi zachhihpa, a nawhly zydua pahrâna awpa Opi eima sa awpa a châ.

Eima Noh raopa cha a vaw tlô haw – eima tovyuh châta Taotuhpa ta a raopa cha – chihuna chôta moku ramâ khaihpa ta nata tei hnolona lâthlôh pasih kawpa â vaw chhih tawhta India cha hmialâ pangai awpa ta a vaw duah ha heih, mokuh ramâ a khaihna tawhtapa a hra ha ta, vaw hroh ha ta, a khotalai ha hra. Kheihawhpa hmozy liata ma cha hnôhlâ hmozy khata khâchâ miah â ngieh thlyu aw, bietaina eima vaw hnei hapazy patlô awpa ta hria hualua lymâ awpa eima châ ha bâ. Daihti khô chiehpa kha tleisai ha pi ta, eima daihti thiehpa cha â vaw pahieh haw, mohropazy ta eima thâtih avaw roh hra awpa daihti cha eimâ ngia aw.

He daihti he India chyhsa, Asia râhhlypi nata khizaw châta cha daihti rairu kawpa tlai châ ta. Awhsi thiehpa vaw khaih hai ta, nohchhi lâta khotalaina awhsi, hnabeiseihna thiehpa cha avaw duah papua hai ta, daihti vâropi chhôh saduthliena khâ eima vaw hnei tyhpa a hmeiseihpa lâta pachâsa n’awpa cha. Cha Awhsi cha tla heih beih khao leipa sala, cha hnabeiseihna cha apaphasaipa ta y heih beih khao kha se!

Eima chheihpâh liata meih a chhohpazy ta miah chadôpa ta, eima chyhsa hluh viapazy cha pachârôhna ta vipa, rairuna nano nanopazy ta miah chadô hrasala, he khotalaina liana heta khâ eimâ ly aw. Châhrasala khotalaina heta maohphaohnazy nata phaohri zy a vaw chhi ta, cha hawhpazy cha khotalaipa chyhsa châna nata kohkina pha kawpa liata laiseihpa chyhsapa a châpa hawhta eima hmiachhy ha bâ awpa â ngiah.

He noh peimawh kawpa liana heta eima khotalaina awpa châta lassie vaw paryh ta khotalaina vaw phorâtuhpa, India Phopi Paw, India palôh chhyupa phaohpa ta, khotalaina mei-ôh khâchâ a chabapa ta, miah khutuhpa zohna papaituhpa a thei thlâh ha pi ta.

A hnôhpazituhpa phahnaileipa nata sâtlailei kawpa, a bietanazy tleisai tyhtuhpa eima vaw châ tyh, châhrasala atanoh keimo dei châ leipa ta chhâ vaw y lymâ awpazy ta a bietapa zy kha a thei thlâh ha aw ei ta, he chyhsa, India sawchapaw rônahpa, ngiapâna, chhyuna nata thatlôna nata nawhna hro liata chyhsa rônahpa he, ama chhôhso liata khâ a châh lymâ ha bâ aw. Reipasaona thlihpi cha khatluta hmahta chahra hrasala, he khotalaina mei-ôh he a dia awpa pasaih beih aw ma pi.

Eima palôh liata eimâ thei thlâh ha heih awpazy cha, India khotalaina châta teituhpa, âmosasyhta râh châta avaw hlâpazy nata khotalaina pheisaihzy khaw, reithaina nata lymâ a hnaw leipa ta khotalaina châta thina taihta vaw teituhpazy kha khâ eimâ thei awpa a châ.

Âmo hleikhôta khizaw Political râhri vâta atanohta eima hryta avaw hlao thei hra leipa eima sietanô nata unawhzy chhao a thei pi ta. Eima hrytapa châ ei ta, kheihawhpa hmo rai a vaw tlô hapa chhaota keimo hrytapa ama châ ngâthlâh ha hra aw, amâ lyna nata pachârôhna ahlykheituhpa eima châ lymâ hra aw.

Eima hmialâ daihti chata miah aw hai ta. Khataihlâ e eima pangai aw? Khâpa cha ma eimâ chhuah chaipa a châ ha bâ aw? Chyhsato hnohta Khotalaina nata ryhpaohna tlôkhei awpa – kuraihriapazy nata India châta raihriatuhpazy; rietheina/dyhchhiena adyuh ta pachhâsa awpa, hruna pahlei tap asana hri adyuh awpa zy; India hmahsiepa nata hneirôhpa padua awpazy, chyhsa to hnohta adona nata khotalaina hro pie awpa ta khitlâh, adôkhâna (economic) nata political Opi padua padua awpa ta.

Rai chahrâ kawpa hria awpa ta miah hâ ta. Eima bietaipa zydua eima patlô hlâhlei cha a pahâ thei awpa châ leipa pi ta, India zawpizy ta ama tovyuh awpa dopa ama to khai hlâhlei cha a pahâ thei awpa châ bohbi ma pi.

Râh rônahpa, riahpha kawpa ta hmialâ pangai awpa achhuah haipa ti nata râh chyhsazy châ pi ta, cha a chhuahna palôh liata khâchâ â theithlâh hana chôta hmialâ eima pangai hra awpa a châ. Eima zydua heta, kheihawhpa zyhna azipa rai eima châpa chhaota, India sawzy sai châ pi ta – adona tovyuh alyuchopa, ryhpaohna alyuchopa nata he râh châta bietaina alyuchopa a hneipa sai eima châ. Chipho/zyhna py hawhta alapa-eihna tlyma, palôh buah kawpa ta ynazie ta tlyma hmah eima la awpa châ vei, achhâpa cha khâpa râh/phopi hmahta pachâna nata hmotaopa liata palôh buah kawpa ama phaoh khiahta phopi rônahpa lâta a duah papua beih vei ei.

Khizaw liata phopi nano nanopazy nata khizaw chyhsa zydua hnohta ‘Samaw’ hlâ pi ta, Adyhna, khotalaina nata zawpi ryureina a y lymâ theina awpa ta hriaparaohkhei awpa ta bie eimâ taih hra.

Eima râh, kyh eima pachâ kawpa Nô India hnohta, eima zana hlâ pi ta, khâchâ chakao awpa ta a thiehpa ta eimâ hlâ chanei heih.

Jai Hind."