Champions League : Jose Mourinho ry liata Tottenham ta ahrapathina ama to lymâ?

Jose Mourinho ta Football khizaw lá vaw kuapa ta, syna opi thiehpa aparyhna liata vâhneina to pazao heihpa ta, si 2 tlai ama phaoh tawhta a Club mohôhpa Tottenham ta vaw kuapa ta, ama hmiachhypa Olympiakos pahniepa ta, 'Champions League knockout phase' amâ ngia haw.

Mauricio Pochettino â thlatuhpa, Jose Mourinho ta Tottenham Hotspur Boss hawhta akhaihna ahmiachhy tua chaina liana khata Stadium liata á pielyuzie kha a reisi kawpa lyu ta. Kô hrota Mourinho - 'The Special One' - ziza a hnei kawpa kha za lyu vei. Châhrasala, Tottenham vaw mohôh tuatuhpa, Pochettino ta reipasipasuana a siesaipazy a nahthlie chypa chhao a châ thei.

Champions League liata Olympiakos ama hmiachhyna akhaihna liana heta, Spurs he 1st Half chhôh zydua cha abohna tluapa ta amâ khaih tah thei awpa châ ta, châhrasala a boh muarua vei ei. Minute 6-na liata Olympiakos châta Youssef El-Arabi ta lei chahrihpa ta za chapiepa ta, hmia amâ sahna za khô ta. He he minute 13-na liata Ruben Semedo ta â hniapâ thlâh hapa tawhta za khô heihpa ta, 1st Half liata Olympiakos heta 2-0 ta hmia amâ sah.

Spurs Boss thiehpa, Jose Mourinho thlai a pielyu ta, Eric Dier thlapa ta Christian Eriksen za pangiasa ta, 1st Half chhâ chy, daihti piechhipa liata Dele Alli ta Spurs châta goal kha za khô ta, 1st Half chhâ ta, Tottenham 1-2 Olympiakos a châ.

2nd Half ama pathai tawhta minute 5-na liata Lucas Moura ta tlyliah kâ lâ tawhta Ball a vaw pathluahpa cha Harry Kane ta za khôpa ta, 2-2 a châ haw. 

Spurs Boss Mourinho ta a zie nyu thei khao vei! Ball ahuahtuhpa chapaw hawtipa, Serge Aurier ta Olympiakos Player zy amâ pachyh hlâta goal a khô theina kyh liata peimawh kawpa, (Ballboy) á pyhpahly heih. Aurier heta minute 73-na Tottenham hmia a sahna za khô ta; Delle Ali ta a taopa a châ.

He tawhna rakha heta cha Jose Mourinho hmeiseihpa â vaw luah ha heih. Tlyliah kâ láta á pielyuzie ta ziza a tao ngâsâ ha heih. Minute 77-na liata Eriksen 'freekick' chapiepa tawhta Kane ta Tottenham goal 4-na a za khôpa chhochhi la, Mourinho a tyuh molo thei vei. A kutô chahupa ta ziza a kaw chôpa ta, á tielaw kaw heih! 

England captain Harry Kane heta Champions League liata Alessandro del Piero ta 'record' a vaw taopa, Player hryta Champions League akhaihpa Player hryta, goal '20' khô patloh awpa ta daihti ryu lei chaipa châna tovyuh cha kaw chhupa ta - Champions League khaih 24 â khaihna liata goal 20 khô patloh ha ta, Italian Del Piero khata Champions League goal 20 khô awpa ta khaih 26 â ngiahpa kha a châ. He he Harry Kane ta vaw chhaopa ta, 'record' thiehpa a tao haw!

Tottenham Hotspurs ta 4-2 ta Olympiakos pahniepa ta; Knock-out stage amâ ngiapâ ha hra.

CHAMPIONS LEAGUE RESULTS :