Liverpool : Kô 30 chhôh ama mokhâhpa nyungiapa cha ama chalo haw!

Liverpool-ta kô 30-chhôh tlai ngiahtiahlei kawpa ta ama mokhâhpa nata ama hâpa, Premier League nyungiapa cha ama chalo haw! Nyungiapa chalo awpa ta Point 2 amâ ngiahpa cha, âmo a chadaituhpa Manchester City ta 2-1 ta Chelsea ama pahnie khao leipa vâta, kô 30 chhôhta a eikhana awpa ta Premier League champions ama châ ha hra.

Jurgen Klopp nata a nawhtazy he Champion awpa ta ei kha pahniena to via heih awpa deita amâ ngiah nota, âmo a kaw chadai thei awpa a lyu chaipa, Manchester City ta Chelsea ama pahnie khao leipa chata nyungiapa chalo awpa ama châ, tahpa a pasiapanô hapa a châ.

Atahmâ ta Premier League nyungiapa he Liverpool-ta ataopasuana asâhpa (top flight) liata nyungiapa ama chalona ei 19-na châ ta, kô 1989-90 rakha tawhta Premier League nyungiapa ama chalona eikhana a châ hra.

Covid-19 hri charei haipa vâta O liata y awpa ta sawhkhâ pahnosana chhao zyh thei khao leipa ta, Anfield liata Liverpool a châhtuhpa zawpi a sâh hlei pôhpakhy ei ta. He zawpi apôhpakhypazy heta hmiapahlyna ta ama hmia deikua pahly pyly ei ta; mei ama pakhaih hôlô hra.

Liverpool player thokha, kaovaihtuhpa Alisson, defender Virgil van Dijk nata midfielder Alex Oxlade-Chamberlain-zy cha Chelsea nata City akhaihpa ama moh khai patawnahta alypa ta ama lâhpâ ha.

Liverpool Coach Klopp chhao Liverpool viahkao a kypa ta, Skysports TV ta amâ pakyhna liata pua a ngiahma khaipa ta, a mothlih pua pa-ôhna chôta : "Rei awpa rai pahno vana, zo a ru ei tah hmeiseih. Kei cha kô 30 chhôh hâtuhpa hry liata a hlao vana, he liana heta kô 4 nata â khophie chhôh deita ei y hmâ" tahpa â lyzie nata, kô 30 hlei hâtuhpa Liverpool fans â lykheizie a reihpapua.