Samaw Marasaw

UN General Assembly ta Myanmar Pheisaih sawhkhâ maochhiena 'Resolution' a pyh

United Nations (UN) chata Myanmar râh bua haipa kyh liata, 'Myanmar râh hnohta adyuhna chhaichhi/chariahtuna zuapa cha chalihsa/pachhâsa awpa' tahpa ta bie a papua.

UN General Assembly chata Hmypi thla liata Myanmar zawpi sawhkhâ thypathlahtuhpa Pheisaih sawhkhâ ama maochhie tahpa biepathlupa ('Resolution') ama tao.

UN chata Pheisaih sawhkhâ ta Myanmar râh luhpa a patupa zydua papua awpa ta Myanmar Pheisaih sawhkhâ cha tahpa ta, NLD luhpa Aung San Suu Kyi nata mohropa zydua papua awpa nata, sawhkhâ kholeina palâsatuhpa zawpi chôta tharôh hmâpa ta peihriana pachhâsa awpa ta a chho hra.

UN Special Envoy on Myanmar, Christine Schraner Burgener chata "Myanmar râhchhôh buana heta Civil War rarô-y kawpa a tlôkhei thei aw tahpa he hmo y thei hmeiseihpa a châ," tahpa UN General Assembly liana heta reihpa ta, "Daihti a sie haipa heta hmo yzie a palâsa kaw. Pheisaih sawhkhâ ku tawhta ryureina lapakhua heih awpa ryhpaohna a ypa chhao a chyh via ngâkaw."a tah hra.

UN ta Myanmar kyh liata biepathlupa a phuahpa (Resolution) he râh 119 ta amâ pyhkhei tahpa ta apyhkheina 'Vote' pie ei ta, apyhkhei leipa lâta Vote a pathlapa cha Belarus ngâlâh a châ.

He hawhta a châ nota India, China nata Russia a hlaopa ta, Râh 36 zy ta Vote pathla vei ei. China nata Russia he Myanmar hnohta chariahtuna (Arms) a zuah hluh chaipa râh ama châ.

He Vote pathlaleipa râh thokhazy heta, Vote ama pathla leina chhâpa liata Myanmar buana cha ama râhchhôh hmo a châpa vâta a chahraoh a ngiah vei, tah ei ta, thokha ta 'UN Biepathlupa chata kô 4 a khô hapa liata Rohingya Muslim maluh chô liata peihriana kha palâsa hra vei' ama tah hra.

EU vyuhpa ta UN ambassador, Olof Skoog, chata UN biepathlupa chata "Myanmar sawhkhâ Pheisaih cha dâh hawhta paduapa châ vei tahpa palâsa ta, a râh zawpi chôta pei a hriana maochhie ta, khizaw mohmô liata Myanmar cha mopathlipa a châ tahpa a palâsa" a ta.

Châhrasala Myanmar vyuhpa ta UN ambassador Kyaw Moe Tun, Myanmar zawpi sawhkhâ vyuhpa ta UN liata a duahpa chata, UN ta he General Assembly biepathlupa tao awpa ta daihti a ryu pasih tu hapa chata a palysa lei kaw, a ta.

He hawhta UN ta Myanmar Pheisaih sawhkhâ maochhiena biepathlupa a taopa heta Myanmar zawpi hnabeiseihna pasâh aw ta; cha nota UN heta a biepathlupa he â chadaipazi ma tahpa cha khizaw ta a mokhâh lymâ aw.

No comments