COPA AMERICA FINAL : MESSI Vs NEYMAR - Messi a pahneih thei ma?

Pachyhnoh, India dawh liata my dawh 5:30Am khita Argentina nata Brazil, Lionel Messi nata Neymar-zy cha COPA AMERICA FINAL liata amâ chakho bâ aw. South America râhhlypi liata Football khizaw râh laipa, khahlâ tawhta a iekhyh zôzawpa, Argentina nata Brazil-zy Copa America Final liata amâ hmiachhy awpa he Football khizaw ta cha, ‘Saduthliepa Final (Dream Final)’ tahpa ta ama hâdy ngaita. Football khizaw liata athai chaipa hawhta khâ ama rei tyhpa, Lionel Messi châta râh vyuhpa ta ataopasuana laipa liata nyungiana a chalo thei tua chaina daihti pha kawpa a châ nota, Barcelona liata â vaw khaihlâh hapa, Brazil zawpi apahniehna, Neymar châta Football khizaw chalyuna daihti ryhpaohpa a châ heih hra.

Brazil nata Argentina ahmiachhy awpa he atahmâhlâ reikahta, ‘Classico’ tah thei awpa châ ta. He râh mianopazy he kô 1914 liana khata Football tlyliah liata vaw hmiachhy tua chai ei ta; he rakha tawhna heta cha hnôhlâ a heih khao leipa ta khizaw ta Football liata a hmia pahno chaipa râh mianopazy ama châ lymâ ha bâ. He râh mianopazy ta khizaw football ataopasuana lai chaipa, FIFA World Cup liata nyungiapa ama chalona zie pahlyhpakhypa cha 7 châ ha ta. He hawta a châ nona heta Brazil heta South American râhzy ataopasuana Copa America liata ei 10-na châta nyungiapa chalo awpa achhuah aw ei ta, Argentina heta Copa America nyungiapa chalo hluh chaipa, Uruguay a kho awpa a chhuahpa ta nyungiapa he a ei 15-na châta chalo awpa amâ chhuah hra aw.

Messi chhihthana ry liata akhaihpa Argentina khaih 19 chhôh cha pahnietuhpa hnei leipa ta lâsie vaw paryh ha ei ta; Final akhaihna awpa Maracana stadium liata Argentina ta 2019 Phiapi thla liata ama pahnie tawhta pahnietuhpa a tyh khao mâh heih leipa, Neymar nata a viasazy heta Messi nata a viasazy he ama vaw chalihsa thei ma? Khizaw ta a mokhâh hai.

He Copa America Final mo pha via pachaihna awpa cha, râh ataopasuana liata nyungiapa a chalo mâh leipa, khizaw liata football a thai chaipa ama tahpa, Lionel Messi châta nyungiapa chalo theina daihti phapa a pahy heih aw ta; kô 1993 rakha tawhta râh nata râh ataopasuana liata nyungiapa hmi a hmô khao leipa, Argentina châta chhao nyungiapa ama chalo heih theina awpa daihti a châ hra. Kô 1993 Copa America nyungiapa ama chalopa rakha kha, Argentina heta nyungiapa chalo khao heih mâh veih ei.

Football kyh liata athaipazy saina liata cha Brazil heta pahniena to thei awpa ta duasu phapa liata amâ duah viapa hawhta hmô ei ta. He he ama râh liata he ataopasuana he a tlôpa vâta chhao châ hlei leipa ta, akhaihna peimawhpa liata Argentina ama pahnie thei kaw tyhpa vâta a châ.

Brazil nata Argentina-zy he Football ataopasuana Final ei palih liata a vaw hmiachhy ha ei ta, Copa America Final liata ei thôh, kô 2005 Confederations Cup Final liata ei kha amâ vaw tyh ha. Kô 1937 Copa America Final liata Argentina ta Brazil he ama pahnie tah leipa cha a hropa liata eikha hmahta pahnie mâh vei ei.

Brazil heta kô 2004 Copa America final, Peru liata akhaihpa liata pahniena vaw to ei ta, kô 2007 Final, Venezuela liata ama vaw pahnie ha heih hra. Kô 2007 Final liana heta Messi chhao â khaih hra.

Pachyhnoh mydi, Maracana Stadium liata Copa America 2021 Final liata Lionel Messi ta a eikhana châta râh ataopasuana liata Nyungiapa a chalo thei ma? Neymar ma pahneih ma, Messi maw? Khizaw ta a mokhâh hai.