KABUL, Afghanistan (AP) — Hriatuanoh khata Kabul Airport liata Taliban riahkapa pakha cha kasaopa châ ta, he heta atahmâ duasu liata Afghanistan liata ziza a pahiehpasâh thei awpa a palâsa kaw. Taliban-zy chata US pheisaihzy cha zawpizy ta Afghanistan ama puasai theina awpa ta daihti hluh viapa ama hmâh thei n’awpa ta amâ pahawhpasâhpa hawhta baipa ta, US chata a pheisaihzy cha daihti bitaipa chhôhta ama lapapua khai leipa ta a châ khiahta cha Taliban-zy ta amâ chhypalie aw, tahpa ta biesakâ ama vaw.
He hawhta a châ nona heta, Taliban zy heta Kabul khihpi maw lâta a ypa District sâthôhzy cha ama lapakhua ha heih, tahpa ta, Pansjir chhao ama chadô hai, ama tah hra.
Notla râhzy ta sôh nata thih hleikhôta hmahlana nata, pheisaih nata hmo nano nanopa liata hmah ama lakhei tarawpa ta, Afghanistan cha Taliban-zy ku liata movi hlâ likah chhôhta pao ha heih ta. Kô 20 chhôh ama pakhâ theipa, Muslim zyhna lapasapa py Taliban-zy ta sawhkhâ thypathlahpa ta, Kabul amâ tyuhnie ha heihpa kha châ ta. He rakha tawhna heta, Afghan zawpi thy hluhpizy chata Taliban-zy ta ryureina ama siekheina dâh tyhpa kha ama siekhei heih aw tahpa china vâta ama râh puasai awpa ta amâ toro hai. He heta Kabul zawtheina tlana su liata athata atymâna a tlôkhei haipa a châ.
U.S. President Joe Biden chata Aug. 31 khô lâ taihta US pheisaihzy Afghanistan tawhta palyhpapua khai awpa ta daihti bitaipa pasihsa awpa kyh liata bietluna tao mâh leipa ta, târi 31 August he US pheisaih palyhpapua khai awpa ta daihti bitaipa a châ tarawpa ta, he hawhpa duasu liata Afghanistan a y hapa vâta daihti pasihsa via awpa ama lyu ha bâ. British Prime Minister Boris Johnson chhao ta Biden cha daihti pasihsa via awpa ta dycharao awpa â chhuah hra.
He hawhta a châ nona heta, Taliban biephuahtuhpa Suhail Shaheen chata Sky News ta amâ pakyhna liata August 31 cha daihti bitaipa chhâna noh châ ta, he daihti bitaipa khôpa ta US â pielyu khiahta la eimâ chhypalie aw, tahpa ta reikah a vaw pathlie ngâhai hra.
Hriatuanoh my khata Kabul Airport chaby liata Meithei papa ta, Afghan chyhsa 7 rachhôhta hrona pahlei ei ta.
He hmo tlôpa kyh a reina liata US Navy Capt. William Urban, US pheisaih biephuahtuhpa chata, chyhsa ahy pahnoleipa pakha ta Airport vaihtuhpa Afghan pheisaih-zy cha Meithei ta vaw ka ta, he he US pheisaihzy nata Afghan pheisaihzy ta kapaliepa ta, Afghan pheisaih pakha a hlaopa ta chyhsa 7 ama thi, a tah.
Taliban-zy heta, Afghan chyhsa ahy hmahta Afghanistan ama puasai awpa a ngiah v’ei na; US nata NATO-râhzy châta rai vaw hriapa Afghan chyhsazy chô liata chhao phuh la awpa achhuahna hnei tlâ veih ei, ama tah tarawpa ta, Afghan zawpizy ama thlahlôh thei vei. US nata NATO-râhzy chata Afghanistan liata ama râh chyhsa a ypazy nata, âmo châta rai vaw hria tyhpazy cha palyhpapua khai awpa achhuahpa ta hmah ama la pazao lymâ hai.
No comments