MARA NOVEL : PHURIE, BO 5-NA

Ngôki-nah O liata Biekhâ biereipa kha a palôh lia rai ta a thi thei leipa vâta Dôthâ chata khihchhôh liata chhao a y pahâh thai khao leipa ta. Ama khih satliazy ta a ru lâta amâ iekhyzie nata a maophyuhna awpa liata palôh amâ raohzie zy cha a pahno thlâh hapa vâta a tao leipa pi zy hmahta ama pataosa heih tlamaw aw, tahpa hleikhôta, a nônô nata pawpaw, nôpi pawpipa a kaw châ laih hapazy hmahta noza hmiachhiepa ta khihtlâh hmia hmah kha khao lei y ha ei la, tahpa ta Biekhâ chô liata phuhlana awpa sai pachâ ta. Daihti ryhpaohpa a mokhâh thlâh ha bâ.

Nohkha cha Dôthâ cha tao awpa nata hria awpa hropa muarua a y leipa vâta O liata a tâkô vaw chata hai ta, cha nona chata a viasapaw Vâchai he avaw ngia ta.

“Unawh Dôthâ, atanoh cha Lôpi chavah lâ ma eima za sie lai tua ma? Âhmie ravo awpa pazu-pavaw ta zy chhâ eimâ zâ byh tua vâ?” vaw tah ta.                                                     

Dôthâ chata, “Chata bao tly..Cha-ypi daihti châta tahpa ta eima chaihrai zy la ei vaw patiahpatâ ngâkaw taraw y,..Pamih thlâpâ hâdy â chhih kaw bâ na tah tyh?” tahpa ta Vâchai cha vaw hmiachhypa ta a tâkô chatapa cha a tiah nata tiah lei mona châta pachôh liata tho cha kaw pazapa ta, chakoh pachhaipa ta za lawh ta.

Vâchai chata, “Chata chuh..Cha-ypi châta râh a khiena daihti avaw pahieh papua bâ sala a pha aw..Zôrih tlâh liata Chaoliah, a ki hmahta â tyh daihmâ hapa ama tahpa, ama ka thei mâh leipa tlai khana ka awpa eina pahla kaw y!” kaw tah ta.

“Ama reina dâh kha na zo rai mâ? Chakâ vaih pasaipha, Laihnua ta a reina dâh chhochhi khata cha, ‘A ki liata vâhiah laihsa, chhithai ngâsâpa avaw tyuh ta. Ei Meithei ta kei mopa-ai na ta, ei Meithei ei papa awpa chyta na vâhiah laihsa chata na vaw pahneisao ta, ei maoh-ri khai ha. Ei kaw thei papuapa cha Chaolia cha hmô awpa rai vaw y khao vei’ a tah bao kha. Daihti ryhpaohpazy a tyh thei sala, ka awpa eina pahla kaw hra tlai na! Sakhia khokheina zy daopa ta, ei hmiakô liata vaw haoh papua tlai mawh sala aw!” kaw tah hra ta.

Chaoliah thâtih cha reih laih lymâna chôta Lôpi chavah lâ sie awpa chata a thao haw ei ta.

Khih tawhta â hla tu leipa, thoraohpa hluh kawna su, tho tih awpa ama haw tyhna su cha thlai ta kei tlô ei ta. He su he Khihhrâ khihsawzy ta thoti awpa ama phao chaina su châ ta; thothih râhhmâh pha kawpa, thoraohpa ngie awpa chhao a hluh kawna su a châ hra.

Dôthâ nata Vâchaicha ama reikah leipa ta Lôpi chavah lâthlôh cha a zâ chhih lymâ ei ta. He Lôpi chavah chaby liana heta pazu-pavaw hluh kaw tyh ei ta. Thotheipa, pazu-pavaw zy ta ama nie tyhpa yna su chaipa a châpa vâta pavaw chi nano nanopa hluh kaw ta; pazu lâchhâh – Leichâhpa nata a hropazy chhao ama hluh kaw tyh hra. Anodeikua, my pati nie khai tawhta a thaopa ama châpa vâta zâlâ nohtla chy tah leipa ta cha hmô awpa y khao heih thlyu aw vei ei.

Cha hawhta buakha chhôh tlai bie a chho leipa ta amâ zâ pazi lymâ nona chata, lâthlôh laikachha la, tho ama haw tyhna su liana chata tho pahreih ngâpa satlia nata laihsa ao nata reih châ sala a ngiapa he thei ei ta.

Dôthâ chata laihsa ao nata reih cha kaw nahthlie pasia ta, Ngôki ao a lyu kawpa ta a pahnopa vâta Vâchai hnohna chata, “Unawh, buakha ta he chavah kaopa liana heta aomâhzy sypa ta a pahâ chy tua sih cha” tahpa ta ama hmiakô ta liata lôphiapa, atyuna châta aryh kawpa liana chata tyuhmo paryhpâ ha ei ta.

Vâchai chata, “Unawh, zâhnia zoh ta Biekhâ biereipa kha ma na pachâ ngâthlâh ha chy ma? Na hmiaphaozie dua ma nohhro lyu lei kaw?” tahpa ta a sahria liata aomâhbeih cha za thaohpa ta, a hmao liata kaw tei ta. Meilô cha za tupa ta kaw sypâ lymâ ta.

“Unawh, hmeiseihta la zâhnia zâ ta eina tahna dâh kha la eina mohnaopâ tu ha. Biekhâ zy hawhpa ta mohnao sakhia kawpa ta ei kyhchhie eina reipa la ei khoh ngâsâ hra vei. Vânoh to leina hmahta châ ha la, tahpa ta kha zâ kha na bie zyh ha na ta; châhrasala, daihti ryhpaohpa ei hmô tita la â pahno kaw hra aw. Ei khoh kawpa vâta hârapa châ vana mâh my unawh..” tahpa ta a aomâh beih cha meilô tupa ta kaw sypâ hra ta.

Vâchai chata, “Biekhâ hrozie nôchâ cha pahno khai thlâh ha pi ta. Ama hneina khi apalaikheipa ta riethei sipasapazy miah tlahnao tyh ta. Khatita ma la a chô liata hiahvâ hiehâhna a tlô hra tlai mâh my. Unawh, hmeiseihta la, ei unawhpa nata viasapa na châpa vâta chhao châ hlei leipa ta, eima khihsaw satlia hryta riahphapa nata chhyupa, sa luh a phaoh theipa nata laihsazy chhaota aru lâta ama cha pasâhsapa na châpa hnaihta ma Biekhâ heta châ iekhy ta, heta na thâchhie noh nata tlâh ta a cha zawh tyh vâ ma he, ei tah tyh cha maw!...Kheitarai châ sala, hro pasihna a pahawh tua ei sihla, heta he la châ ngâthlâh ha aw ma pi..duasu cha â thla thei hra mâh my” kaw tah ta.

Dôthâ chata a viasapaw biereipa cha a pachâ khao leipa ma a châ ma, laikachha tho ama hawna lâta laihsa ao a theipa, Ngôki ao nata reih a lyu kawpa ta a pahnopa lâna chata a nah pachôh syulyu ha ta.

Laikachha lâta thohaw ngâpa laihsa ao cha chavahkaopa tawhna chata tlao avaw thei pha kaw ta. Ama ao nata reih chhao a sia viapa ta â thei thei ha hra.

“A uh Biekhâ, zâhnia zâ ta a uh Dôthâ chôchâh na reipa kha a hmeiseihpa ma a châ ma? Kha hawhta kha a y hmeiseih ma? Dingô byh chô liata â zia hmeiseih mâ?” tahpa ta tho patlawpa pyu hryta Ngôki ao cha pahmei thai rimâhpa châ vei!

Dôthâ chata ao vaw puana lâ cha a nah pachôh via heihpa ta, Vâchai hnohna chata, “Unawh, chuh! Eima haiphiahpa Biekhâ ta Ngôki nata a nô tho a pahreih khei ha heih chuh..khâpa haipa bie ma a hmao heih ma kaw nahthlie paru tua sa y. Kha lia kha avaw tyuh thlâh ha ma y” tahpa ta laikachha lâ cha pahlie thyu ta, khy haw ta. Vâchai chhao cha reingiah kawpa ta âtyu hmo liana chata atyuhpa ta, a noraihpâ kaw ta.

Tho ama pahreihna tawhta keih pangawh rachhôh ta liata alô laitu leipa a chhaipa ta Dôthâ chata a hmiakô ta liata Biekhâ ta Ngôki nata a nô tho a pahreihkhei no cha kei hmô thei ha ta.

Nohhro chhao Biekhâ heta Ngôki nô palôh pahnie a chhuahpa ta tho vaw pahreihkhei tyh ta. Atanoh chhao raitly tyhpa cha bao hnaihta, a heih satliazy ta râh amâ khie ngâkaw nota Ngôki nata a nô tho phaona lâ a zi heihpa he vaw châ ta.

Ngôki nô cha thokô ry liata dawhkiah ama paduapa liana chata tho vaw pasâ ngâkaw ta. A yna tawhta â hla tu leipa liata, Dôthâ hnôhchhypa ta Ngôki chata Biekhâ tho patlawpa cha vaw mokhâhpa ta, avaw tyupâ thlâh ha ta.

Biekhâ cha a tho patlaw ngâpa a chalihsaipa ta, Ngôki cha kaw uahnaopa ta, “Hmeiseihpa tlai maw…Dingô nahta amâ vâ-ia hra rai khiah maw? Dingô ta a mona dâhzy kha amâ tlaichhai hmi kaw bao..Kha zâ kha la satlia hropa a y hrapazy chhao ama hiehâh kaw. Anodeikua, ‘Hâra thorapa, nôpaw chhoreituhpa a hnei leipa cha la, ano y ta tlâ y lahvâ!’ tahpa ta tlao amâ chalihsai hapa kha a châ” tahpa ta tho cha patlaw pazao ha heih ta.

Dôthâ chata Biekhâ haiphiahna zie cha a pahnopasia via ngâkawpa vâta a hnôhky lâ tawhta a zawthlu ta, a rao kei rie awpa cha byuh kaw hrasala, bie hropa thei via awpa a y aw, tahpa ta a hmiakô liata haipa bie, biedopa hawhta a lohpapua ngâpa cha sai pazao ha heih ta.

Ngôki chata, “A uh Dôthâ cha cha hawhta a y rai mâ? Chyhsa a reisipa, chanô kiah liata ydâh a thai kawpa, rei awpa nata rei lei awpa a pachhaih thai kawpa châ tlô. Cha hawhta ngâsâ cha a y rai mâ?” tahpa ta zo lei hmi kawpa ta Biekhâ cha hiahrih heih ta.

Biekhâ chata a thopahreihpa a chalihsai hlei leipa ta, “A! Ngôngô, hmeiseihta la kei chhaota ei tah hra. Dôthâ he hârapa hmahta châ taraw hrasala, siana kao chhao a hnei hluh kaw hra. Châhrasala, chhoreituhpa a hnei leina zyu khi âvaw lâpapua ha tyhpa ta ei pahno. Rei hluh byuh vei..Dingô hiahrih la a cha chho khai thlâh ha aw” tahpa ta a tho patlaw ngâpa cha thyusaipa ta Ngôki kiah liana chata a kaw tyuh ta.

Dôthâ chata mo a ru a tah kaw bâ tlaina…haipa bie, pakahpaleih pahnia kawpa ta biedopa rei ta a rei lymâ thlâh hatuhpa cha â nyuna su tawhta kaw pua ta, Ngôki hmiakô liata taikhy ta, chanaoh awpa cha a chhôhmaruhpa lâ tawhta kaw tuahtuhpa chata pakhâ thei sala a ngia khao vei! Châhrasala, ‘Nâ zaw hlâta na tlana awpa mo ha tua tyh ma y’ tahpa ta a nônô ta a pasyuna bie kha khâchâ zyhpa ta, a hiehâhna vâta â chalyu ngâpa cha a nyukhei thlâh ha chy ta.

Biekhâ chata Ngôki cha a kei hniapa ta, “Ngôngô, Dôthâ thâtih la paso bâ chy tua sih châ! Eima pano likah he tlao pasia abyuh tah mâh hra va chi mâ? Ei cha khozie chhao pahno khai chi ta..na nô nata paw zy chhao ta na khoh thlâh ha hra ei. Khâpa rairuna ma na hnei rai tly? Atanoh taihta na palôh dopa chhao eina chho khoh vei chi?” tahpa ta Ngôki cha kei chaku achhuah ta.

Ngôki chata thlai Biekhâ ku cha vaw pazawpa ta, “A uh Biekhâ, hmeiseihta la ei cha chho hih..uhta, rilâhpa a hnei leipa châ na ta. Nâma he ei uhta, ei rilâhpa hawhta ei cha hmôpa na châ. Na sietanô chô liata he hawhpa palôh na phaoh thlâh ha khiahta cha â do thai rai mâ? Nâma nata keila, siechaw hawhta tlao a hmô sihla a pha via na ta ei pangiasa” tah ta. A hmi liata pahneina hmi tlyma hiehâhna hmi tlyma hmô awpa y vei. Hmeiseih na, china nata thlahzohna nahta a pahlaopa tlao alyu viapa ta â lâ. Phoso zuah a châna deikua â pielyuzie liata palâsa heih ta; chanô hropazy hawhta a ngâchyu chakhyh awpa a châ leizie chhao â pielyuzie tawhna chata Biekhâ tlai chhaota a pahnothai kaw hra aw.

Dôthâ chata â nyuna su tawhta amâ pielyuzie cha khâ vaw moh thlâh ha ta. Biekhâ hmiakawhzie nata noza hmiachhie a pahnoleizie zy, laihsa hluhpi cha tahraruapa ta avaw pahnie ha tyhna dâh zy pahno khai thlâh ha hra ta. Ngôki chhao cha a pachâ ngaita kaw. Châhrasala, ama kiahpâhta liata Ngôki nô a y thlâh hapa vâna chata kheita y hraoh bao va ei, tahpa ta a hmiakô liata a kyhpachâpa, haipa bie hmâpa ta pahnie a chhuah haituhpa Biekhâ a pielyuzie cha a reikah leipa ta a sai pazao ha heih.

Biekhâ ta Ngôki achhyna reikah a theipa cha, ano, chyhsa a palaipa nata a khotlâhpa, ‘KEI’ â tah hrapa châta cha thei a ru kaw tlaina!

A hmiaphaozie avaw nano ta, a hmia cha cho vâ na, a tah thlâh ha bâ. Yna ziana chhao pahno leipa he lyu ta, eikhapi ta thyu ta, “Ngôki, hmeiseihta la naw, Dôthâ vâta na palôh na pahypa thei va chi, tahpa he ahy asaohiah a ngiah leipa ta ei pahno. Dôthâ zy hawhpa, ahy ta ei I nata awh, ama tah leipazy hmiakô liata la ei sâh tu ha. Khihhrâ paw hneirôhpa, Khailua saw châ vâ na mâ? Hâra thorapa Dôthâ zy hawhpa ta ama pho thei awpa chyhsa châ va na..vaw ngia ma y..khatita ma la ei tovyuh na châ pyly aw…cha tita la ei ngiachhiena ahawpa ta, nâ ngiapachhina mothlih hru awpa ta einâ haw chi..vaw ngia ma y…” tahpa ta a aoki pua kaw pasâh khai ha ta.

Ngôki cha a no-âh ngâsâ tahpa a hmiaphaozie liana chata a lâ thlâh ha ta. Satlia uhtheipa dei châ leipa ta, laiheihpaw a châ hapa, Biekhâ hrozie cha cha hawhpa avaw châ aw, tahpa pachâna a za hnei leipa chhao a châ thei. A no pua raih ta, palôhtlâh lei kawpa ta ama vaw siena lâthlôh lâta a kua ngâkawpa Biekhâ cha no-âh tah hmi kawpa ta kei moh ta.

Ngôki nô chhao chata cha hawhta Biekhâ aoki a sâh kawpa cha avaw thei thlâh hapa vâta, “Ngôngô, khazia ma na uhta Biekhâ cha palôhtlâh lei kawpa ta a kua syulyu haw..tho chhao pahreih khai mâh pi vâ! Kheita ma namâ tah haw?” thlai vaw tah ta.

Ngôki chata, a ao a chalyu khaipa ta, a ao liata hiehâhna a kaw lâpapua awpa cha nyupa ta, “O lâ hmo peimawhpa tao awpa a hnei tahpa eikhapi ta pahnopapua ta, â lie ha kha maw” tlâ tah ta. A nô chata, “A raita chapaw tlaita â tyh rai dia ma a thai! Eikhazie ma na kiah liata â tyh bâ rai chuh…Dôthâ he la amâ vaw tlu lei kaw sai na” tahpa ta Ngôki cha kaw diah ta.

“Ei nâ bao hra he!” tahpa ta kaw pahneih pakhei ta.  A palôhrupa deikua â ly kaw tahpa a hmiaphaozie pakhâta ta vaw moh thlâh hatuhpa châta cha hmôchei theipa châ vei. Chatanachata, ama nôsaw chata tho ama patlaw chiehpa cha dawhkiah liana chata pasâ ei ta.

Ama kiahta liata anyu thlâh hapa, Dôthâ palôh cha alyna ta bie ta. Ngôki chô liata âlyna cha ma hluh via ma, Biekhâ noza hmiachhiena hmi chata ma palysa via ma?tahpa thlie hapa châ ei sihla, Ngôki chô liata âlyna cha a hluh via ngyu aw; châhrasala, Biekhâ noza hmiachhiepa hmi khata a palôh a pa-eih kaw..

Ngôki nô chata, “Ngôngô, kheita eima tao khao châ? Pawtho kiah thei hra pi vâ! Kheita thoraohpa eima ngie khao châ? Dôthâ kha eima vaw hrua vei kha maw tah tyh” tahpa ta nôpo hmi kawpa ta a vâ kaw uapa ta, ama kiah liata thokô lai kawpa, a chiah raoh pha kawpazy cha kaw moh laih ta. A uahva hmi kaw.

Dôthâ chata cha cha daihti ryhpaohpa tlai a châ, tahpa patu thai awpa ta ahy chho a ngiah vei. Anodeikua, eikhapi ta a kaw pua khiahta cha ano leipa lâta ama pachâ tlamaw aw, tahpa a chipa vâta a viasapaw, Vâchai ta avaw hâna su lâ cha za kua heih ta. A hmi liata thapawhna cha hmôchhei thaipa châ vei!

Ano vaw hâ thlâh hatuhpa Vâchai chhao chata Dôthâ a zu ngâpa cha a kaw hmô patawnah ta a hmi liata thapawhna a ypa cha avaw hmôpâ ha hrapa na a châ aw, “Chuah! Khâpa hmophapa rimâ cha ma na hmô haw? Na khyna lâ kha na hmia cho vâ na tah ta, nâ zuna lâ dia ma na hmia liata nohkhaihpa a baipa hawhta a vaw ta na vaw thlâh ha heih?” thlai vaw tahpâ lymâ ta.

Dôthâ chata, “Unawh, palo khâ..tavia hmoto ei cha chho khaw..akhy para tyh..” tahpa ta ama vaw siena lâthlôh lâ cha a kaw chhih pakhua ha heih ta.

Vâchai chata, “Unawh, nâ dia ma lâthlôhzy na pavia khai ha y. Noh khiahma na pari? Lôpi chavah ngaina lâthlôh cha he lâ hih. Khalâ kha cha khih lâ eima kua heih aw tahna ma?” tahpa ta palôh châpâ lei kawpa ta a chai chahnaopa ta a paraparô kawpa ta nata a huatlâ kawpa ta ama vaw siena lâta a kua ngâkawpa Dôthâ cha kei uahnao thlâh ha ta.

“Akhy thlâh tyh..Tavia ei cha chho khaw…” tahpa ta hmohropa reih hlei leipa ta Dôthâ cha a para kawpa ta khy lymâ ta. Vâchai chhao chata hiahrihna hropa hnei khao hlei leipa ta a reikah leipa ta Dôthâ cha pazi ha hra ta.

Amâ zâ chhihpa lâthlôh tawhta lâtlei avaw y tua chaipa cha a chhih heihpa ta, buakha ama sie tawhta Dôthâ chata Vâchai hnohna chata, “Unawh, Ngôki nata a nô tho vaw pahreih ngâkaw ei ta. Tho ama pahreih chiehpa a chyhpâ hapa vâta thokô liata a raohpa ei ngiepa tua aw ei, tahna ta..na reikah leipa ta vaw y thlâh ha ma y. Ama ypa a pahno leipa hawhta eima y awpa â ngiah” tah ta. Ngôki nata a nô yna lâ cha pangai ei ta.Ngôki zy ama y tahpa pahno chhielie leipa hawhta ama yna lâ cha kei puapahlie ei ta.

Âmo hnôhchhypa ta ama dawhkiahzy vaw paryhpari ngâpa Ngôki nata a nô zy thei thei awpa chata Dôthâ cha kaw pakhu ta. Ngôki cha thlai avaw heihpa ta Dôthâ hmi avaw hmô patawnah chata, a palôhrupa liata avaw pachâ ngâ nota âvaw luah thlâh hapa vâta ano-âhna nata Biekhâ biereipa a pachâ no a châpa vâta pua a pahlawpâ ta; Dôthâ avy ngâpa cha thlahmipa a vy ngâpa hawhta no-âh kawpa ta vaw tawpâ thlâh ha ta. Eikhapi ta â kaw theipapua hapa ma a châ ma, “Einâ! A uh Dôthâ, nâma dia!” tahpa ngâlâh he kaw reih ta. A nô chata Zithai ta a aw khiahma tahpa ta a hnôhkyh lâ avaw heihpa ta, “Ngôngô khâpa maw?!” tahpa ta Dôthâ nata Vâchai zy avaw pazi ngâpa cha vaw hmô h’aw hra ta.

Ngôki nô ta Dôthâ avaw hmôpa cha âly kaw hra, tahpa a  hmiaphaozie liata â lâ thlâh ha! Dôthâ chata cha hawhta Ngôki ta no-âh hmi kawpa ta avaw tawpâ thlâh hapa cha vaw pakiehthlupa ta, “Chuah! Ngôngô, Nônô, nâmo nôsaw dia? Nônô tho ma nama phaoh?” thlai kei tah ta.

Ngôki chata, “A Uh Dôthâ, pua eina pahlaw khai ha ei chi chuh! Ei cha vaw pachâ ngâkaw nota na vaw pua thlâh ha bao…Uh, hih ei nâ nahta tho phaoh pi ta, chapaw eima hnei hra leipa bao hnaihta eima phao khi chhao hmô thei ma pi hih. Thokô hra kiah thei pi vâ..Khâpa tah awpa ma namâ chhuah rai?” tahpa ta Dôthâ cha kei moh ta. A nô chhao chata, “Dôthâ, kha he nama viasa pano ta nama vaw sie chhopa cha thohaw awpa chhao eima hnei vei hih, maniah vaw thlâpa tua u!” thlai vaw tah lymâ hra ta.

Dôthâ chata, “Lôpi chavah lâ eima sie aw, tah pi ta. Nâmo nôsaw dei ma za sie ei chi? Khazia chapaw pawtho kiah thaipazy namâ zâ pazisa vei?” tahpa ta Ngôki nô cha kei mohpa ta, “Nônô, thokô cha kha he vaw kiah sa y, ei vaw thlâ lymâ hih” tahpa ta thokô cha kiahpâ lymâ ha ta. Vâchai cha pua a kâchhie khai ha ta. A unawhpa, a viasapa a pielyuzie cha a pahneichhipâ tlô; Ngôki nô mopadei cha pahnothai thlâh ha hra tlô, a no a raih kaw. 

Buakha chhôhta Dôthâ chata Ngôki nata a nô phaoh tiah lei awpa tho raohpa cha za pathla hmâ thlâh ha ta. Ngôki hmia liata alyna cha hmôchhei thai awpa rai châ vei. A tlaichhai chaipa, a kyhpachâ chaipa apielyuzie chata a nô palôh pahnie hra vei sala, ano palôh deikua a pahnie chaimâh tlaina!

Dôthâ thokô tawhta a za chô tawhna chata Ngôki dawhkiah liana chata tho cha pasâkhei heih ta. Vâchai chhao chata Ngôki nô cha thlai bao hrapa ta, Dôthâ ta thochiah a thlâpazy cha pabopa ta, Dôthâ zy yna tawhta a hla tu leipa liana chata bua kaw hra ei ta.

Ama kiahta liata tho tô lai kawpa a zawh thlâh hapa chô liana chata Ngôki cha a kaw tyuhpa ta, Dôthâ ta thochiah a thlâ chiehpa, dawhkiah liata phao thei awpa ta a pabo ngâ nopa cha mohpa ta, “A uh Dôthâ, atanohla ei cha vâ pachaihpa ta na ei pahno. Nâma sai na ei cha pachâ thlâh ha” tahpa Dôthâ ta a tho pabo chiehpa a kaw hlâpa cha dawhkiah liata vaw pasâ lymâ ta.

Dôthâ chata, “Keimo zy cha miah nama pachâ hmeiseih hraw vâ ma i?” tahpa ta saisopa ta Ngôki cha kei diah ta. Ngôki chata a nô thei thei lei awpa ta a ao za pazyhpa ta, “A uh Dôthâ, biedopa reipa ta la atanoh tho eima za phaopa cha ei nâ ta ‘Na uhta Biekhâ hrua tua sih’ a tahpa vâta a zâ chhi pi ta. Na thâtih na chho chaimâh ta..Dingô-nah O liata nâ pielyuna dâh zy chhao khaw na chho ta..” tahpa ta Dôthâ cha kei mo ta.

Dôthâ chata, “Cha Biekhâ cha kheita ma ei thâtih cha a reih rai? Thophaohna lâ a cha za zipa cha taihlâ a y haw?” tahpa ta palôhtlâh leipa hawhta Ngôki cha moh hlei leipa ta vaw palie ta.

Ngôki chata Biekhâ ta a thâtih a reina dâh zy, a zo leina zie zy nata Biekhâ â tyhna dâh zy cha phie chho khai ha ta. Dôthâ chata a pahno khai thlâh ha tarawpa ta, Ngôki pakah tawhta mohropa eih a châ leinazie â châhkheina châta cha hawhpa bie a nahthlie chanei heihpa chhao cha no-aina rai hnei vei. Ama likah liata tlao a hnia viana tlôkhei ta; ngâchhihna paw a pakai hapa tawhta ngâchhihna roh, a pahâh viapa ta tlao a papuasa ha heih. Henah pano he la, ama likah parao awpa achhuahtuhpa ama hluh viana châhki ta, tlao amâ pazaona â I via tyh tlô ta.

Dôthâ chata, “Ngôngô, hmeiseihta la Biekhâ heta einâ iekhyh kaw, tahpa cha ei pahno thlâh ha mâh my. Anodeikua, kei cha heta he tlâ châ na ta. Nô paw hnei khao leipa, ahy ta ei I ei awh ama tah khao leipa ei châ. Nohkha noh liata vâchhiena zy hmah avaw tyhpa ta, duasu chhie viapa liata ei vaw duah heih chhochhi khiahta cha, mohnaona torai taopa ta, khihtlâh hmiakhâ khao lei ngâna taihta a y theipa duasu liata a duahpa ei châ. Cha hawhpazy cha rie tlô leipa sala, tahpa ta hiahvâ ei hiah tyh mâh my! Châhrasala, chyhsapa he, hmialâ pangai hnolo awpa ta paduapa eima châna he my leipa na ta, hnôhlâ hmozy mypa ta, nohphapa vaw chhi awpa cha khâ eima mokhâh tyhpa tlao a châ…cha hawhpa palôh ei phaoh theina chhâpa chhao, nâma vâ deita a châ. Duasu a hliena vâta eima likah he a rao awpa pasaih vana la y..” kaw tah ta.

Ngôki chata, “A uh Dôthâ, nâma châ iekhytuhpazy ta nâma nahta a ti thai awpa eima châ leizie zy, eima duasu a hlie zie zy eina chho tyh ei. Châhrasala, chhaolei lia he ei sâhkha vaw pih chanei heihpa hmahta châ hr’aw sala, châ paphasai aw vana tahpa bie ei châ taih. Chyhsa hropa zydua ta ama cha pathlua nota chhao na kiah liata khâchâ a duah aw na ta, nâ lyna cha ei lyna châ aw ta, na pachârôhna chhao ei pachârôhna a châ hra aw. Hiahvâ ta hmialâ meithâh a zawhpa miah papaipa aw ta, khatita ma la syna Opi miakha liata nawhly a pyhpa ta saduthliena eima papitlohsa cheingei aw…A uh Dôthâ, nâma dei leipa ta la ei khizaw pakituhpa y vei ei mâh my..” tahpa ta a pakah tawhta bie kaw puapa vâta noza pakhua ha heihpa hmi phaohpa ta Dôthâ mokhaoh liana chata kei mohpa ta a khu heih ta.

Dôthâ chata thothih hryta pavaw sâh ngâpa pyuzy chata Ngôki ao nata reih nai zualuahpa cha ama patla pasu kawpa ta pahno ta; thlihua vaw pathlipa ta Ngôki sâ nai zualuahpa ta avaw hmôpa ry liata khochhihna zydua palaona, a kyhpachâ chaipa hmi chata, a châna zydua pamysa ta, Ngôki châta khizaw liata satlia a y chhôhpa hawhta â pachâna palôh za hnei leithei tyh vei.

Daihti he paduasa theipa châ ha mawh sala cha, Dôthâ chata Ngôki ta nozana hmi phaohpâna chôta, lyuhbie thlôh chaipa a hlâ nopa cha daihti y khao leina taihta chalihsa awpa a khoh tlai aw!

Dôthâ palôh cha alyna ta bieta; cha hawhna pyly chata Ngôki palôh cha chhopasia thai lei awpa alyna nata thlalôhna ta a bie hra.

Khizaw ta kheihawhpa hmo cha ma he satlia nata laihsa, duasu alyu lei kawpazy likah liana heta âvaw pahiehpapua khei aw, tahpa cha ahy pahnopa nata rei theipa châ hra vei sala, kyhpachâna pathaihpa paw pakai haipa khochhihna cha, a pahnothaikhei hra tlai aw!

Liahsa ama thophao awpazy ama pasâ khai tawhna chata, Ngôki nô chata Dôthâ nata Vâchai zy cha alynabie zy hlâ ta, O lâ tlô awpa ta a thao haw ei ta. Dôthâ zy chhao cha Lôpi chavah ngai awpa ta a thao ha heih hra ei ta.

Zâlâ noh tla awpa chata Khihrâ khih cha ai lei hmi kawpa ta notla tlâhthlôh chô tawhna chata vaw sai liahsa ha heih ta. Nopi daihti ta chasipaw daihti pho a chhuahpa ta amâ chatôh lichih a châ hapa vâta ziza cha â daihna rakha ta lalôh ta, charei paphasana rakha ta a chakua hra.

Khih hawka liana chata râh lâta a siepazy chhao avaw luah pathao ha heih ei ta. Khihchhôh lâ tawhta hawtipa ialia viapazy nata nôpipa zy ta ama nawhâpa padona awpa ta ama hla sa ngâpazy chhao thei awpa avaw y pathao ha heih. Chapaw hawti thokhazy ta khih hawka ngaipa ta a râ chhiechhu ei ta; cha nota thokha ta ama kahmi liata liahsa a tyuhpa ta laochhohpa nata bia chhohpa chabapa ta khih hawka lâ cha a ngiahtiah lei kawpa ta ama vaw sai hnolo ngâkaw hra.

Khih luh lâta nôpipa pakha ta, a nawh hâ ngâpa padona awpa ta,

“Ei nâ y, ei pâ y,

Vaw tlô chhailai tyh

Chyhsa nô, chyhsa paw,

Ti ta ti ta phaoh ha se

Mei ta mei ta kâ ha se,

Keimo nô keimo paw

Hleidy bâhkhâ avaw hli vaw hlâ…”                                                                    

tahpa ta nawh-eihna hla a sa ngâpazy, hawka daih lâta, hawti awhsâh ngâpa pyu nahta khih chhôh lâta irupa nga ngâpa pyu nata vaotaw sâh chhie ta a sâh ngâpa hryta nôsaw â awsao ngâpa pyuzy chata Khihrâ khih nohto hrozie a phuahluah kawna kao a za y hra.

Chata tly, khih thlahlôh a chhihpa, chariah china nata mokhâhna ta a pabua leipa khih ama châ ha tawhta tly chy, thlahlôh kawpa ta hawtipazy chhaota noh ama vaw pakhôsa tyhna khih a za châ hrapa a châ.

Lyu raihria a thao hmeiseih awpa ta lyu rao mâh leipa ei ta, râh â khiepa nata khih lâhnia ta liata tho hawpa cha nohto khihsa ama hmâna dâh châ chy; hmialâ daihti pachâna ta pabua muarua leipa ta, lypa nata thapha kawpa ta cha-yna daihti ama hmâh haipa a châ.

Chariah siehnaona daihti, hrâsiena daihti pha chaipa nata râh a khiena daihti pha chaipa ta ama vaw hnei tyhpa cha, Phiapi thlâpâ nata Patô thlâpâ likah chhôh he châ tyh ta. Khihhrâ khih chhao heta Hmypi thla chhâna lâ, ziza chakuapa a pai pasia hlâta râh a khie awpa ta amâ chhuahnoh. Daihti vâropi chhôh amâ vaw chhuahnoh hapa a châpa hnaihta O lâta tao byuhpa nata angiahpa, ama paloh hmâ leipazy thlai palohpa ta, O lâtapa hmota ama palôh la tu leipa ta, palôh pahâh kawpa ta râh amâ khie thei n’awpa ta amâ chhuahnoh chyu hra. 

(Bo 6-na thlai eima vaw pazao heih aw)