MARA NOVEL : PHURIE BO 9-NA

Meithei pyu vaw puana lâ cha Dôthâ nata Vâchai cha ahy chho a ngiah hlei leipa ta a râpâ lymâ ei ta. Mohropazy chhao chata ama ngaipâ lymâ hra tahpa ama ao nata pyury tawhta thei thei ei ta. Meithei pana su ama kei tlôpa cha Biekhâ ta a sakhih kapa avaw paliepalâ ngâpa he kei hmôpâ ha ei ta. 

Mohropa zy chhao vaw y khai thlâh ha ei ta. Dôthâ chata thlai kei ngaipa ta sakhih cha kei mohpasia ta, sakhih taw a chhi haipa, a châ tahpa a kei pahnopâ haw.

Ama vaw sie chyta a pawpaw Mawkhu ta bie a chhopa kha avaw thei papuapa ta, sakhih tawzy ngiachhie amâ chhih awpazie zy nata, ama duasu liata a duah hrapa a châpa hawhta â pahnona cha vaw lai chaimâh ta, eikhapi ta a hie vaw hâhpa ta Biekhâ cha uahnaopa ta, “Biekhâ, he sakhih panô heta a cha vaw tlahnao ma? A taw a chhi ngâpa tahpa na pahno thlâh ha taraw ma? A taw nah ngiachhie amâ chhi kaw he zaw!” thlai tahpâ lymâ ta. Mohropazy chhao chata “Kha he?” tahpa ta vaw mohpasia lymâ ei ta, “Aw! A châ tlai he maw..a taw a chhi ngâpa tlai a châ he..a sâhpi chhao a tlia pha kaw hih..a taw cha hâta ei kha ei nota uhtheipa a châ hih..ngiachhie â chhih dâh cha la..” tah chyu hra ei ta.

Cha hawhta a mohnao kawpa Dôthâ ta Biekhâ a tahpa cha a pachâdâh châ tiarâh leipa ta, “Dôthâ, cha tah zua eina tah hra chi! Ei khoh khiah ei ka tlai! A taw cha taw hrawh chhao rai tlai â chhi aw..râhsa cha eima nie awpa vei mâ? Ei sakhih kapa ma na hiatlia ma? Cha tah cha zua eina tah chi..khâhma vaw reih khâ..he su liana heta nâmo zy hawhpa châta bierei theina hnei vei ei chi..avaw hnei..!” tahpa ta hiehâh kawpa ta Dôthâ cha a Meithei ta vaw nâpâ ta thlai avaw duahkhâh ta.

Dôthâ cha dua khoh tiarâh leipa ta, “Eeeee! Pasaihpha nâ tah hra vei mâ! Sakhih taw a chhi ngâpa chô liata mâ na pasaihphana cha na palâsa aw!? Na riahpha kaw khiahta cha he hlâta râhsa lai viapa nata a hrâ via awpazy ka châh chi!” tahpa ta hiehâhna mopadei chhaota Biekhâ cha a kaw tawpâ thlâh ha bâ hra. Mohropa zydua chhao chata Biekhâ cha thai pachâ vei ei; anodeikua, khâpa hmahta reih ngâhpa y vei ei..

            Biekhâ he ama hryta uhthei via chaipa a châpa vâta ahy hmahta a bie ei ngâh leipa ei ta. Anodeikua, cha hawhta Dôthâ ta riahpha kawpa ta â duapâ ngâhpa cha khâpa ma vaw tlô aw, tahpa ama mokhâh khai thlâh ha bâ.

            Biekhâ cha a hmia phaozie tawhta a hiehâh hmeiseih tahpa â lâ thlâh ha ta. A Meithei chaba leina lâ ku cha chahupa ta, Dôthâ cha mohnao hmi kawpa ta hmiadaisa ta tawpâpa ta, “Avaw hnei molo thlâh ha tyh. Nâ he ahy I nata awh ma na châ? Ei sa kapa liatazy nâ vaw chahraoh? Sakhi tawzy cha nâma hawhta tlâ ama châ bâ hra cha zaw!!” tahpa ta pahneipâna chôta thyuhnao â chhuahpa ta a ku kaw hy haw.

            Dôthâ chata a Meithei cha a lei liata za thypa ta, a ku cha chahupa ta, taorâh a tawpâ thlâh ha bâ hra.

            Biekhâ chata, “Nâ hâra thorapa tlai chi ta eina thyuhnao hra chi…” tahpa ta âvaw zaw hnaopa cha Dôthâ chata vaw dôveipa ta, a hnôhkyh lâna chata Dôthâ cha â khu lâta a kei pao thlâh haw.  Dôthâ chata, “Hâra thorapa eina tah hra chi ma châ? He hâra thorapa na tahpa, na mohnao kawpa, laiphô chôna liata haipa bie hmâpa ta noh nah tlâh ta na zawpa kei Dôthâ heta ei cha thie ha tua aw!” tahpa ta Biekhâ â thy thlâh hapa cha kei thyuhnao a chhuah ta, châhrasala ama hryta satlia nata paw uhthei viapazy chata thlai vaw pachhaihpa ta, “Khihhrâ satlia sai eima châ hih…eima khihsawzy nata eima bei ta hnabeiseihna â sâh kawpa ta cha-ypi daihti châta eimâ dikhei awpa sapi-salai luh ama vaw mokhâh hai..lôhraohpa nata adyh kawpa ta sy..Vânoh nata Sakhia hmah dytha ha la pi” tahpa ta Dôthâ nata Biekhâ cha avaw duakhâh ha ei ta. Dôthâ chhao chata a hiehâh kaw hrasala, uhthei viapazy amâ vaw chahraoh hapa vâna chata khâpa hropa reih khao leipa ta a Meithei a huahpa ta riebu pangai haw ta.

            Biekhâ ta sakhi taw a chhi ngâpa a kapa cha, a tao n’awpa hropa a y khao vei tawh tly cha, cha zâ chata chhopâ ha ei ta, Dôthâ deikua chata kaw kha hmahta nie vei. A palôh liata deikua Biekhâ ta avaw mohnao zie nata, sawta a vaw sa leizie a pahnona chata pa-ysa molo thei vei.

            Cha zâ liana chata riebu ziza cha phie dia thlâh ha ta. Cha nohta hmotlôpa chata ama ziza pua a parao khai ha. Anodeikua, Biekhâ thaipachâpa rai y vei ei.

            Pati zy liahsa niepa ta, mei patihpa ta amâ tyu nonazy chata Biekhâ cha khâchâ a khu ha ta. Dôthâ deikua Vâchai kiah liata atyuhpa ta, a hmia liata khâpa ma a pachâ tahpa pahno theipa châ vei.

            Cha hawhta ziza a hri kawpa ta ama y hlâ nona chata ama hryta bielôhawh rei awpa pahno kawpa, paw a phawhlaw kawpa, Tlualai chata, “Mylâ noh vaw chhi bâ sala aw! Sapi salaipa tlahnao ta, ka awpa eina pahla bâ cha ly” kaw tah ta. Cha patawnah ta mohropazy chhao chata bie vaw reih pazao pâ lymâ ha hra ei ta.

            Ama hryta uhthei via chaipa, Puhpa Nokhâ chata, “Khihhrâ satlia sai u, he zâ hra cha pasih hmi kaw ta, eima mo hra ku tiarâh mâh tlô vâ…kheitarai châ sala, eima khih satlia, eimâ palaikhei kawpa sahlaozy châ ei chi ta. He, a eikha n’awpa ta Zôrihtlâh liata hmaohkha ta a riepa ta, khâpa sapi-salai luh ma eima phaoh aw, tahpa chhao pahno leipa ta zâ daihti eima pakhô haipa châ ta; kha he, eima khih satlia hry liana heta eima bei Thalai lochono a kaw tlu ei chi, tahpa mo n’awpa ta châpia eimâ pia tua vâ?” tahpa ta Khihhrâ satlianah cha za moh lai ta.

            Satlianah cha ama tha vaw pawh kaw ta, “Sy..Khihhrâ satlia, thatlô-bâhseihpa, eima khih thlalôhna zy pi, kha he sô khata cha duah eimâ pia tua vâ” vaw tah hôlô hra ei ta.

            Riebu khôtho, aby pha kawpa nata a ryh kawpa cha bâhta pathaipa ta, a pavâh viana hâh tahpa ta mei cha tô chhipa ta, châpia cha ama pathao haw.

            Puhpa Nokhâ chata, “Ahy avaw duah tua chai ei chi? Satlia kei a tahpa sai ei chi..khaw..Khihhrâ thlahlôhna chaipa, avaw duah tu khaw” tahpa ta a ziza vaw tao ta. Satlia hry liana chata ahy hmahta a duah awpa a chhuahpa rai y vei ei. Pakha pakha ta â moh ei ta, ama chao â hri kaw sai.

            Dôthâ chhao cha a duah awpa a chhuah hlei leipa ta, anodeikua nohchhôh lâta Biekha ta a tahna dâh khata a palôh a chakheipâ hapa vâta, he daihti he phuhlana pathaihpa patlôsana daihti a châ thei aw, tahpa a hnabeiseihpa ta a kaw duah haw ta. 

            Dôthâ, cha a kô nata khih a hawti kaw chypa vâta châpia liana cheingei ta ama khih satlia thokha ta amâ ngâcho kawpa tlai a vaw châ ei aw, â duah tua chaipa cha amâ nawtawpâ hapa ma a châ ma, Biekhâ nata satlia hropa zy cha thlai a kaw duah para ei ta. Puhpa Nokhâ chata, “Dôthâ ahy e nâ pia tua chai aw? Satlia Khâdô sy..” vaw tah para ta. Biekhâ cha a pia byuh kawpa hawhna heta a hmi a zâ pachhiepa ta, dusawta ta a zâ tyuh ta.

            Satlia Khâdô he satlia vyhpâ thlâh hapa, thatlô hmi kawpa, pôhraoh vâtlâh kawpa he châ ta. A bâh thaby nata a byhpi chhao a lai pha kaw. Dôthâ cha a reikah leipa ta a duah thlâh ha ta, Khâdô chata a ngâcho hmi kawpa ta, “Kha he, Dôthâ, ei tha khophie ma ei cha hmâpa ma?” tahpa ta pahneipâna chô heta vaw ngai ta. Dôthâ chata biereih hlei leipa ta avaw pakiethlu ta.

            Châpia amâ vaw pia haw…Khâdô chata â ngâchopa hawhta Dôthâ cha kheita taotiah thei tiarâh vei! Â ngâpa hawhta vaw châ vei, tahpa cha Dôthâ ta ei thôh tlai a taikhy tawhta nata a chalo tawhna cha a pahno kaw bâ aw.

            Amâ pia khai tawhna chata Khâdô chata Dôthâ cha liahsa pasâhsa hmi kawpa ta mohpa ta, “Ei nawhta Dôthâ, kô nata khih liata nawhta châ hra la, tha nata zâh liata la ei uhta tlaina na châ” tahpa ta â tyuna lâ kua lilaw ha heih ta. Amâ piana su chadôpa ta a tyuhpa satlia hropazy chata Dôthâ cha ama ngiaroh hmi kaw bâ.

            Khâdô pazipa ta Laihnua avaw duah ta, Khâdô hlâta hmahta â daih parei lei via. Dôthâ chata â thânô lei kawpa ta avaw taikhy ha heih. Ano vaw pazipazy chhao chata pyly…Biekhâ pachâdâh châ khao vei, pahlie a kaw duah ta, “Keima nahta sy, Khihhrâ satlia châpia thatlôpa Biekhâ nahta sy…” tahpa ta a kaw duah ta..Dôthâ chata taorâh avaw moh thlâh ha..Dôthâ cha a tha a chhâpa ta chhao â lâ vei.

            Biekha chata thlai vaw ngaipâ lymâ ta. Dôthâ deikua â duana su liata a pasie leipa ta Biekhâ a pielyuzie cha avaw tawpâ thlâh ha.

            Liahsa ama dua a peihpa zy taopathipa ta, amâ duapâ tawhta amâ pia haw. Biekhâ he niepha-bawphapa nata, a hneipa saw cha bao hnaihta, a sabia pha kaw hra ta. Dôthâ hlâta bâhta a pôhraoh lâta cha a lai via thlyu aw. Heta mopa ta cha Biekhâ heta Dôthâ he thlaita taikhy sala hmo no-âhchhihpa châ thlyu aw vei.

            Amâ vaw pia haw..nohchhôh lâta hmotlôpazy vâta nata, Khihhrâ khih liata Biekhâ ta satlia â iekhyh chaipa â piakheipa vânazy chata Khihhrâ satlianah cha atyuh molo theipa rai y vei ei, Dôthâ nata Biekhâ zy a heihna lâ maih cha ama mokhaoh nata apielyuzie cha a pazi tah thei awpa na a châ, ama khâsia ngâsâ ha.

            Dôthâ chhao chata mohropazy â thânô leipa hawhna ngâsâ ta Biekhâ cha tao thei hra vei, tahpa cha â lâ thlâh ha ta. Buakha chhôh tlai â taikhy a chhuahpa ta amâ chatôh tawhta, Dôthâ chata chado-chadaona rai rai y leipa ta eikhapi ta Biekhâ phei chachâh lâ cha a phei ta kei thiahpa ta, Biekhâ a duana dâh â kaw huarypa cha ryhpaohna ta hmâhpa ta, Dôthâ chata eikhapi ta chalopa ta, alei liana chata a za taikhy haw…satliana pyury cha a pha kaw tlai na! Vâchai chhao cha a unawhpaw, Dôthâ ta ano a iekhy kaw tuhpa a taikhypa vâna chata aly ngâsâ thlâh ha ta, a kaw rahao leipa deita na a châ.

            Biekhâ cha thlai a kaw duah para ta. Kaw pahneihpâpa ta, “Dôthâ dia na taikhy thlâh ha hra..kha he tao heih tua sih châ” tahpa ta avaw paryhparipâ heih ta. Mei khaihna hry tawhta Biekhâ hmiaphaozie vaw saihtuhpa châta cha, cha hawhta a mohnao kaw tyhpa nata, sawta a sa leipa, Dôthâ ta a taikhypa cha la pasa kaw ta, a hie a hâhpâ, tahpa cha hmô chhei thaipa châ vei. Ama pano likah liata nohchhôh lâta hmo a tlôpa vâna chhao khata, ama pano heta ama hiehâh chhielie tah thei awpa a châ. Dôthâ hmiaphaozie deikua a nano hlei leipa ta, anodeikua, pakhâta ta saituhpa châta cha, a mopadei liata lôhrâtlôna mei hawhta kaw iapa nata, phuhlana mopadei cha hmô chhei pyly hraw vei ei.

            Liahsa a paryhpa ta, â pia awpa ta amâ mâ ha heih. Dôthâ chata khohleikhoh kawpa ta ziza kaw sy ha tua ta, Biekhâ deikua chata a paraparô kawpa ta Dôthâ chai cha vaw paza para ta; Dôthâ chata thlai Biekhâ ku cha vaw phaihpa ta, ano cha a pahiehpa ta, a chatlie kawpa heta Biekhâ cha a hnôhkyh tawhta a chai vaw riepa ta, kaw chalo ta, Biekhâ â tlieh ngâpa cha a luh chô lâ kaw pazawpa ta, Biekhâ cha â chiehpâ kawpa ta â zâ thy ha heih. Atahmâ ta Dôthâ ta a pazawpa he cha a pasapâ hapa cha ma a châ ma, thlai thyu khao vei. Thlai mohropazy chata kei buakhei para ei ta, Biekhâ chata ano buakheituhpa zy cha, “Pasa vei, pasa vei..eimâ pia heih aw” tahpa ta abâh ta a kaw chaka heihpa ta a kaw duah â chhuahpa cha a duah thei khao vei.

            Dôthâ chata, “Uhta Biekhâ, â daih bâ sy..mylâ râh a khiena châta eima thazy tlao a mochhih tua sih châ..ei tha khophie ei kaw hmâh daihmâ hra chuh” kei tah ta.

Cha reikah chata Biekhâ cha a pasasa hapa cha ma a châ ma, eikhapi ta kaw thyu ta, a viavôpâna chôta, “Dôthâ, a vy tyh..eikha la eimâ pia heih tua aw..a pia na khoh khao lei khiahta la tâkô ta chhao rai eimâ chhawh aw..a vy tyh” tahpa ta vaw ngai lymâ ta. Mohropazy chata thlai vaw pakhâ ta, “â daih bâ sy Biekhâ, na pahnie ngâsâ vei khaw..tlao na tha a padâh tyh” tahpa ta Biekhâ cha patu ei ta. Dôthâ chhao chata, “Biekhâ, â daih bâ sy…na hoh khao vei..he tawhta khih eima tlô heih tita sy..cha tita la he hâra-thorapa satlia heta ei tha zydua ei cha hmâpa thlâh ha bâ thei” kei tah heih ta. Biekhâ hmi liata hiehâhna cha mo khoh â chhih lei kaw…

            “Kheita â!? Dôthâ…” tahpa ta ama patuna tawhtapa cha a tliehpapua a chhuah ta, châhrasala ama patu pa-I kawpa vâna chata a tliehpapua thei rimâ vei..

            Puhpa Nokhâ chata, “Biekhâ, â daih bâ sy..Khihhrâ satliazy ei thlah a vaw lôh kaw na..Dôthâ he â vaw nyu thei kaw..avaw tlô chaimâh na..Biekhâ, nâ chhao tlô leina dâh na thai awpa â ngiah..nama nawhta satlia hropazy a mopâ chaipa nama châ khaw…khaw..mylâ cha thapi phiapa ta râhhmâhpa eima chathôh bâ awpa châ ta, eima thazy hmah chhâ tu ha la, ziahmo eima paryh bâ u sy” tahpa ta ziza sah kawpa cha vaw padia haw ta. 

Biekhâ châta deikua cha zâ cha maophyuhna, duachhie ta a duana â pahnopasiana zâ châ ta. A viasanah hmia dâhdei chhao kha khao leipa he alyu kaw. A viasapaw hlâta a tuapahaipahipa alyu viapa, Zaka nahta a kâ chai liana chata a ziapa ta amâ chalih thlâh ha.

Châhrasala, Biekhâ zy hawhpa he cha, khatluta noza hmiachhiena ama taopa chhaota, ama hrozie ro pyly lei awpa chyhsa châ ei ta. Tlao ama paru via ha tyh, tah awpa chi kha ama châ. Dôthâ chô liata khâpa ma a patlôsa aw, tahpa rai pahno awpa châ vei.

            Cha zâ cha lôhpahâh lei kawpa ta hmâh khai awpa ta a mô a chhuah pathao ei ta. Nohchhôh lâta ama vaw sienazy â hlapâ, ama riezy vaw theipâ a tah hapa hnaihta pahnawhpâ lymâ ha ei ta.

            Dôthâ deikua a mô thei vei. Biekhâ chôta â pielyuna dâh cha kyhkha lâta a palôh a tlâh kaw nota, âvaw lie heih awpa cha khâpa ma châ heih aw?tahpa pachâna za hnei leithei leipa ta. Biekhâ zy hawhpa heta cha chyhsa amâ iekhyh hapa, khâchâ ama mohnao hapa he cha pa-ysa molo vei ei, tahpa a pahno thlâh ha. He vâna heta, râhhmâh liata â hrohrua kaw awpa â ngiah aw, tahpa cha a palôh liata a pahno thlâh hapa a châ.

            Cha hawhta nohchhôh lâta Biekhâ nahta amâ tahna dâh nata châpia liata a taikhyna dâhzy a pachâpazi ngâpa cha â theihlô lei chhôhta avaw mô ha ta. Â vaw môpa cha ama vaw sie awpa zâ ta a mâ pyly kha a hmô ha heih.     

Atazâ ta a mâ deikua bâhta â nano via ha. Meih a chhohpa hryta Ngôki ao thei ta, kei paza awpa ta a bâ a kei pazaw khai tawhna khata, Ngôki ao vaw puana lâ tawhna chata thisaih he vaw loh chaimâh ta, ano cha thisaih ta pua vaw dâ khai ha ta. Cha hawhta thisaih ta a pôh zydua a dâ khai hapa cha eikhpina ta china ta vaw patupa ta, meih a chhohpa cha a râsaipa a chhuahpa ta â pahiehpa â chhuahpa cha alô he a chapia ta, laikathi lâ a hluah ta. Cha hawhta â hluahpa cha eikhapi ta lôkâ liana heta za tla ta. Cha hawhta lôkâ liata a tlapa â chahipa cha a kaw hra haw ta.

A mo a kaw padeihpa cha Vâchai heta vaw chalyu ngâkaw ta. A mâ sapa vâta âvaw tliehpa he vaw châ ta. Cha cha a kiah liata a ziapa Vâchai chata athata vaw chalyupa ta, vaw pahra a chhuahpa ta avaw aw ngâpa he vaw châ ta. A mo a kaw padeihpa cha a pôhpa cha a mathlai saita avaw bie thlâh ha.

Vâchai chata, “Unawh, khâpa mâchhiepa rimâ ma na sa haw? Athata a kaw tlieh chi ta, na reihchamaoh ngâkaw bao…Ngôki mohzy kaw reihpapua chi ta” thlai vaw tah ta. Dôthâ chata, “Unawh, eima vaw sie chyta ei mâ pyly khana ei sa heih. Bâhta â nano via, tah leipa ta la phie phieh â lyu” tahpa ta a kaw tyuhpapua ta. A mâ cha pachâpazi leithei vei.

(Bo 10-na thlai eima vaw pazao heih aw....)