Ukraine buana noh 2-na : Ukraine chyhsa 137 ama thi ha

Russia pheisaihzy ta Ukraine chadie via lymâ ei ta, Russia ta Ukraine a tlahnaona noh 2-na liata meithothu (missile) pyury a paru kaw chy. Ukrainian President Volodymyr Zelenskiy chata khizaw râh nano nanopazy baona ahawpa ta, Russia chôta hriena chaluahpa ngâlâh cha a daih vei, a tah.

Russia ta Ukraine a tlahnaona noh 2-na taihna heta Ukraine chyhsa, Pheisaih Officer 10 a hlaopa ta chyhsa 137 thi ha ei ta, chyhsa 316 ta hmah ama phaoh. He hawhta a châ nona heta, Ukraine pheisaihzy heta Russia Pheisaih 40 hlei kasaopa hawhta amâ reih hra.

He hawhta a châ nona heta, US President Joe Biden chata Putin heta NATO râhzy a veipâ rai khiahta cha US chhao â chahraoh pâ ha aw, a tah. He Ukraine yna rachhôh liana heta NATO râh Lithuania, Latvia nata Estonia zy y ei ta, ama zydua heta US heta Pheisaih nata adyuhna chhaichhi a paphao ha ei.

Chutyhnoh zâcho khô lâchhâh liana khata, kô 1986 liata Nuclear ahniahnipa chhiena rarô-ypa tlôna su, 'Chernobyl nuclear Plant' yna su cha Russia pheisaihzy ta ama la tahpa Ukraine chata phuah ta; he liata hriatuhpazy chhao ama hraih pâ ha hra. 

Khizaw râh nano nanopazy ta Russia chôta hriena chaluah lymâ ei ta. He hawhta a châ nona heta China deikua ta cha, Russia â châhna palâsapa ta Russia tawhta 'Wheat' a lapangia pazao lymâ.