Article : Frailty, thy Name is woman?

William Shakespeare-ta _Drama_ a ropa, *Hamlet* liana khata, atanoh taihta chyhsa hluh pi ta khâ amâ pyhpa, mochao sapatu ta ama patupa reikah alâluah kawpa thai kawpa ta zie ta. A pawpaw ta a paw sahdô liata lôh ngâh kawpa ta â zia molo thlâh hapa, châmaih hmâpa ta tlahnaopa ta a hrona sôh kawpa a lapa hapa vâpa ta, mâchhie a sana noh a pasihzie kha he châbu a reih hapazy ta cha nama pahno kaw sai tlai aw. Khatlupo ta a paw thina tao pasa ta, heihlyuleipa hawh taihta â pa-ysapa ta, thai kawpa ta a paw thina dâh â laichadai papuana dâhzy kha a rei pha ta, palôh pahnie ta; he _Drama_ liata arohtuhpa *Shakespeare* ta khizaw reikah â ngia chaipazy hmâpa ta husothlupa ta, hrona hneipa ta a paduana dâhzy khaw!

A paw thietuhpa, a pawpaw, *Claudius*-ta, chapawsaw tlai ta, cha tlupo ta a paw thina kyh liata mâchhiesapa ta, vâsâh chhâna a taopa hawhta a hrozô a pakhôsapazy cha eilawpa ta, pasipasawh ta; cha a pawpaw ta a paw thina kyh vâta a pasipasawhnazy cha hmahta a pasa bâ awpa thlâh na ta, a nô, a paw kyhpachâ kaw tyhtuhpa hawhta a pahnopa ta, a paw a thi tawhta noh hluh chhao a khô hlâ, a mâchhiesana mothlih dâhdei chhao a hi hlâta, a pawpaw vahpa châta a hnei thlâh ha heihpa chata *Hamlet* cha pasasa via rilipa ta, a vâsâhna cha baichha via rili ta;  a nô hmotaopa vâna chata chanô zydua chôta a palôh phaozie zydua taihta â nano khai ha khiahma tah thei awpa ta, a nô a pielyuzie liana chata chanôzy châna dopa hawhta a pachâpa, reikah a lâluah kawpa nata, atanoh taihta rei a hlao kawpa reikah,

*"Dadiehna, na moh cha chanô a châ (Frailty, thy name is woman)”* 

tahpa reikah pachhaopapuapa ta, a nô cha a tlahnao hapa kha a châ. 

He reikah, _‘Dadiehna, na moh cha chanô a châ’_ tahpa heta, ‘Chanô zydua cha dadiehpa nata, hrozie nôchâ liata a icha leipa; thlihua zipa ta ama ngiaryhna lâ maih a zi thei thlâh hapa’, dadieh kawpa hawhta palâsapa ta, chanônah cha chapaw hlâta ngâchhih lei viapa nata, lôhliena a tao thei lei viapa hawhta pachâ thei awpa ta he reikah heta a nô cha chhie a sa hapa a châ! He reikah nohpahlihpa liata a ziepa, ‘Chanô-zy duasu â hnai viapa ta sona nata, chapaw hlâta dadieh viapa hawhta pachâpady thei awpa ta biephôh’ Hamlet ta a nô chhie a sana reikah he, hlâno daihti tawhta chipho nano nanopazy hry liata chhao khâ a vaw zie zôzawpa nata, khâ ama vaw hrokhei zôzawpa, atanoh taihta chipho nata, zyhna thokha azituhpazy hryta ama pathleih thei mâh leipa, chanônah châta chhiesana a châ pazao lymâ chypa chhao a châ hra. 

Hindu nata Muslim zyhna a zituhpa hry liata a lapasa viapa, ama zyhna a siekhei pasa viapazy chhochhi ta cha, chanôzy he chhaichhi miakha, chapawzy hmobaoh miakha hawh tlupo ta pachâna ama hnei khiahma i? tah pâ ngâkaw awpa ta cheihchalopa cha rei lei, atanoh taihta tlybai ei ta; apachaihpa ta Muslim râh thokhazy liata chhochhi cha chanôzy cha ama laki tawhta ama pheipazah pawhmao taihta khupa ta, khihliah ama puapa chhao ta, âmo deita pua thei leipa ei ta, ama chhôhkha ahy tlyma chhâ ta ama zi awpa a châ, tahpa dâh nata phôhzy taihta hnei ei ta; châ amâ chu awpa nata, khizaw phasana nata, khizaw asosâhna theilâpazy chhao ama padi hra awpa rai pasaipa châ vei ei. He hawhpa dâh nata phôh paraopa chanôzy cha, alô ta daisaopa/vawsaopa taihta hrie theipa ama châ. Ama duasu a chhie ngaita.  

Hlâno Marapazy chhao khata, *Hamlet* reikah nahta ahniahni kawpa reikah, chanônahzy châta chhiesana reikah a tlohpa, chanôzy châta reikah kho a chhih lei chaipa hryta pahlaotlâh a châpa reikah, _‘Cha-ia luh lei, chanô lôh lei’_ tahpa reikah vaw hnei ha hra ei ta. Cha-ia heta luh tah awpa hnei leipa ta; cha hawhna pyly chata, chanôzy cha sona a phahlapa, hmo pachâpali theina nata, palôh a hnei kawpa a châ leipa hawhta pachâpady thei awpa ta he reikah heta hlâno Marapazy palôh liana khata bie a ngiapâpa, nôpaw biephôh, bieso hawh tlupo ta rai vaw hriapa ta, cha chata chanôzy cha chapawzy hawhta a y thei lei awpa, chapawzy tovyuh hawhpa a to thei lei awpa, chapaw hriapa nata taopa a tao thei hra lei awpa hawhta pachâna lai kawpa kha sapapuapa ta, kyhtotie liata chanônahzy cha dadieh pachaihpa hawhta pachâna palaiseihsapa ta, Hamlet-ta, _‘Dadiehna, na moh cha chanô a châ’_ tahpa ta a nô chhie a sana reikah hawh tlupo khata, Mara chanô zydua cha, dadiehpa hawhta a pachâsa khai ha ei.

He hawhpa chhiesana reikah vâna heta, hlâno mahnô-mahpaw daihti, hruna meihdo ta Mararâh nata Mara chipho a khu nona khata cha, chanônah duasu kha a vaw chhie kaw tyh thei tlai aw, tahpa pachâpady theipa châ ta; O chhôh lyukah mohôhna nata, chhôhkha mohôhna kyh liata tha nata zâh, pachâna palôh zydua hryuhpa ta, ama mathlai chhaota ama vahpa, sawchapawzy châta, a môzia leipa ta noh nata daihti ama vaw pakhôsa tyh tarawpa khata, thâpha ama hlao kaw na ta pangiasa a chhih leipa ta; cha thota, O chhôh-khaohkha ryureina nata amohôhna kyh liana khata tovyuh a sâh kawpa, biehneina lai kawpa hnei ei sala pangiasa a chhih muarua vei. 

_‘Cha-ia luh lei, chanô lôh lei’_ 

tahpa pyly kha ama reikah daopa a châ heih tyhpa a châ. Châhrasala, khizaw a vaw sosâh laihpa ta, thâtihpha khaihna ta hruna meihdozy vaw papaipa ta, nopavâhsapa ta eima vaw y tawhta deikua, hmo to â vaw nano khai haw! 

*William Shakespeare*-ta, a nô hrozie, a vahpa a thi tawhta daihti rei chhao a khô hlâ, a mâchhiesana mothlih chhao a hi pathlah hlâta, vahpa hropa a chadaipa ta, *Hamlet* paw nawhta, vahpa châta a hnei thlâh ha heihpa vâta, chanô zydua cha a nô hawhpa, hrozie nôchâ dadiehpa, ngâchhihleipa nata, chapaw hlâta a icha lei viapa nata, palôh a nano para ngâthlâh hapa hawhta a hmô thlâh hapa he, a pachâ chhei ha khiahma i? tah thei awpa châ ta; he hawhta a châ nona heta, Shakespeare-zy daihti nota chanôzy hrozie nôchâ deikua za pahno pha thei rimâ khao ma pi! Shakespeare heta, chanô pakha vâta, he hawhna heta khizaw chanô zydua he a bai thlâh ha aw mâ? Châ bao vâ! 

Chavâta, *William Shakespeare* heta rie n’aw pachâthai sala, *‘Hamlet’* hmâpa ta, chanô zydua cha dadiehpa, chapaw hlâta ngâchhih lei viapa nata, hrozie nôchâ a icha lei viapa hawhta reihpa ta, ‘Dadiehna, na moh cha chanô a châ’ tahpa ta lyuhbie a vaw paryh hapa he, ama daihti nota chanôzy hrozie nôchâ tawhta a vaw thliena dâh chhao a châ thei aw! Mara chanôzy deikua, ‘Dadiehpa’ tahpa ta aw thei rimâ awpa châ khao vei ei!

Atahmâ cha, hrozie nôchâ dei châ khao leipa ta, kyh totie liata chapawzy heta chanôzy he tlao eimâ tlu khao vâ ma i?tahpa pachâna taihta pih pathao ha ta. Thaina sona achuna liata chhao, niebaw tluana kyh nano nanopa liata chhao, chanôzy hmahsiena nata, ama tiamana nata hriapasanazy he hmô chhei thai awpa châ khao vei! 

Atahmâ cha, hrozie nôchâ liata chapawzy he tlao dadieh viapa nata, a icha lei viapa ama za hluh via hapa ta â lâ ta; William Shakespeare ta ama daihti nota, chanôzy hrozie nôchâ hawhta a reipa kha, atanoh ta chapawzy hrozie nôchâ he châ sala tlao a lyu via ha bâ! Hlâno Marapazy ta, ‘Chanô lôh lei’ ama vaw tah tyhpa chhao kha, atahmâ cha, ‘Chapaw lôh lei’ tahpa lâta a pua daihmâ ha khiahma i?tah thei awpa ta chanô duasu he athata hmah a kaw sie ha bâ.   

Chanônah hih na pachâ beih ma? – 

_A nô nata paw siesaipa ta, a pahrâ beih leina, a y beih leina a vahpa O liata a vaw ngia ta; a vahpa châta chhôhkha padua awpa ta a noh nata daihti pakhôsapa ta, sathei nawhhly a vahpa châta a sapa awpa nona khata, thina saikao zohpa saopa ta, thlahzohpa ta nata, rietheipa ta a hrona a sokhâh mâh my! A hnatlâna sokhâhpa ta a vahpa nata a sawnahzy hnatlâna khâsia ta; ano alyna nata phasana awpa pahnolei a pachâpa ta, a vahpa nata sawzy châta riethei taopa ta, a pahâhpa nata, phapa toraizy chhao a tleihai tyh ei mâh my! Chhôhkha azaokhina phapa tao awpa ta thapi phiatuhpa châ ta; nô nata paw, chhôhkha sanawhzy likah liata pahneisilihna chô aryhna a tlua lyliah tyh mâh my! Chanônah he vaw dadieh chacheita vei ei!_

Khazohpa ta chanônah a taona dâh he phapatlua (Special) kaw ta - 

Ama ngiahtlâh zy cha khizaw liata phaohri a hri chaipa zy phaoh thei awpa ta thatlôpa ta taopa ta, cha hawhta a châ nona pyly chata chyhsa hna pangâh thei awpa ta naizualuahpa ta a tao pyly heih hra. Saw sapa riethei â chhihna zydua tao thei awpa ta chhôh lâta thatlôna pie ta, ama sapa, ama sawnah ta ama dytha hapa chhaota dao thei awpa ta thatlôna a pie hra ei. Mo hropa zydua ta hnabeidypa ta ama kuasai nota chhao tao hualua awpa ta chhyuna pie ta, tlâhlei ziahleina daihti nata sapa pôhpa a pasa nota chhao chhôhkha mohôh awpa ta thatlôna a pie hra ei.

Kheihawhpa duasu lia rai ta amâ duah hapa chhaota ama sawnah kyhpachâ awpa ta tobipa ta, ama saw, âmo ta ama sapazy ta ama pasasapa chhao ta tao hnolo awpa ta a tobi hra ei. A vahpa taochheina nata adoleina liata chhao thai pachâ lyliah awpa nata daodo lyliah awpa ta daotheina nata thatlôna pie ta. Vahpa phapa ta a lahpinô pasasa beih vei tahpa a pahno thei n’awpa ta sona piepa ta, achâhta a vahpa adoleina nata taochheina liata chhao a chhâh khâ â châh awpa ta thatlôna a pie heih tyh hra.

He tlupo ta tobi patluapa nata, pha patluapa ta paduapa, chanônahzy he, kheitazie ta ma *William Shakespeare* heta, _‘Dadieh kawpa nata, a icha lei kawpa hawhta’ a reih rai tly?_ He hawh tlupo ta pachâna palôh pasih kawpa a phaohpa chanônah he, hlâno Mahnô-mahpawzy khata, _‘Cha-ia luh lei, chanô lôh lei’_ ama vaw tah thei tly?

Atanoh he eima râh he sai ei sihla – achuna, nietluana nata kyh nano nanopa liana heta, mohmia pasaihpa ta achu laih ei sihla – chanô he chhyu viapa, tiama viapa nata, hriapasa viapa tlao ama châ ha bâ khiah ma i? He hawhpa zydua saina chô heta, William Shakespeare-ta, Hamlet hmâpa ta bie a vaw reipa, 

_‘Dadiehna, na moh cha chanô a châ (Frailty, thy name is woman)’_

a vaw tahpa he,

*“A do vei na; na rei chhei katô ha la y, mahpaw Shakespeare”* 

tah awpa a vaw byuh laih ha bâ khiah ma i?

- ROBERT B.SYUHLÔ, Siaha