Ukraine Buana : Civil chyhsa 351 ama thi ha - UN

Russian President Vladimir Putin chata Notla râhzy ta Russia chô liata hriena ama chaluahpa cha adyuhna nahta hmo miakha a châ, a tah. IMF chata Russia nata Ukraine buana chata khizaw sôhthih (Economy) duasu liata yzie a hnei kaw aw, a tah.

Russia nata Ukraine buana a siehaipa liata thâtih alâluah viapazy :

1. President Vladimir Putin chata Pachyhnoh khata Notla râhzy ta Russia chô liata hriena ama chaluahpa cha, adyuhna phuahpa nahta miakha tahpa ta, Ukraine râh dady liata zawtheina a zaw awpa pakhâna (no-fly zone) a y khiahta cha, Notla râhzy cha adyuhna liata amâ vaw hlao ha hra, tahna a châ aw, a tah.

2. Moscow nata Kyiv chata daihti rei leipa chhôh akachaheihna (Ceasefire) ama phuapa ta yzie a hnei leina chhâpa kyh liata a bai rairie ei ta, he akachaheihna heta Russian pheisaihzy ta khihpi ama chadô haipa liata zawpizy ta â boh kawpa ta khihpi ama puasai theina awpa ta daihti a pie aw, tahpa a châ tarawpa ta, yzie hnei khao vei. Russia ta Ukraine a tlahnaopa vâna heta Ukraine chyhsa riahpaihpa 1.5 million ama y ha bâ.

3. Ukraine President Volodymyr Zelenskiy chata US Senator zy nahta bie amâ chhona liata Europe Nochhi râhzy cha "Russia taopa adyuhna zawtheina" Ukraine pie awpa ta athata â haw.

4. Ukraine ta a pazao awpa khâ â chhuah tyhpa NATO, chata Ukraine President Zelenskiy ta Ukraine ziza liata zawtheina a zawpa pakhâna phuah awpa ta â hawna cha a pyh leipa ei ta; He hawhta hmah ama la khiahta cha buana chata Ukraine khôtho lâ taihta a kia aw, ama tah. He hawhta a châ nona heta U.S. Congress chata Ukraine cha $10 billion adyuhna chhaichhi nata zawpi baona (emergency military and humanitarian aid) hawhta pie awpa â chhuah hai.

5. Putin chata Ukraine cha râh liahpa (Neutral) râh châ awpa ta a khoh, tahpa ta "adyuhna chhaichhi a hneipazy pasopanôpa"  awpa nata and "Chipho a pathluana" y lei awpa ta a khoh a tah.

6. Putin nata Israeli Prime Minister Naftali Bennett zy cha Ukraine buana kyh liata Kremlin liata apakyh ei ta. Israel heta buana liata aryhna rai pahriasa awpa ta amâ mâ thlâh ha, ama tah tarawpa ta, Ukraine nata Russia likah liata aryhna he a rairu hmi kaw.

7. Ukrainian vyuhtuapazy chata Russia vyuhtuapazy nahta Hriatuanoh khita amâ tyh heih aw, tahpa reih ei ta. Atyhna ei no ama vaw hnei hapazy liata Hlaotlohna y leipa ta; Ukraine President Zelenskiy chata Russia ta Ukraine a bomb-pa cha a chalihsa ha tua awpa a byuh, a tah.

8. United Nations ta âchupasiana liata Ukraine civilian 351 thi ha ei ta, chyhsa 707 ta hmah ama phaoh ha. UN chata he athipa zie he ama hluh via syulyu thei hra, a tah.