Monkeypox : Pasana a hiezawh haipa - Khizaw châta chi â chhih ma?

World Health Organization (WHO) chata atahmâhlâ ta pasana hri charei haipa, ‘Mokeypox’ cha khahlâ ta ama hmô beihleina suzy liata a charei hai, tahpa Hriaheihnoh ta ama reih. WHO chata monkeypox kyh liata pahno awpa nata zyh awpazy, amohôhna dâh awpazy chhao thlai ama phuah aw, tahpa ama reih ha hra.

Monkeypox he târi 7 Patô khata Europe râh 12-pazy liata hmôpa châ ta, he râhzy liata he pasana hri a kiahpa he ama zydua ta 92 ama tloh ha. WHO chata he pasana hri a kiahpazy nahtha ahniahnipazy cha he hri a kiah pachhuah theipa duasu liata amâ duah, ama tah.

Covid-19 hawhta he hri he â hiezawh thei hra ma?

Scientist-zy chata he monkeypox pasana he Covid-19 hawh ngâsâ ta cha a hiezawh thei sala pangiasa leipa ei ta; achhâpa cha he hri he cha SARSCOV-2 hawhta a hiezawh chatlie vei. Fabian Leendertz, Germany liata he pasana achupasiana su Robert Koch Institute ta a reizie liata cha : "He hri chareipa heta daihti reipi â ô na ta pangiasa a chhih vei. He pasana a hneipazy he cha a nao kawpa ta sopa-eih theipa châ ei ta, a mohôhna thohna, abyuhna hawhta hmâ thei pâ lymâ awpa chhao a y hra," a tah. He hawhta a châ nona heta, WHO luhpa chata he pasana he chyhsa apôhpakhyna a hluh via lymâna hawhta a pôh via lymâ thei aw, a tah.

Monkeypox mohôhna châ deita taopa thohna he a y taraw leipa ta, ‘Smallpox’ thohna deikua he pasana mohôhna châta pha ta, hmâ theipa a châ.

Monkeypox cha khâpa maw?

Monkeypox he chyhsapa pôhpa liata pasana kia nao chaipa hry liatahpa châ ta. Kô 1970 khata chyhsapa hry liata monkeypox a hneipa hmiatua chaipa hmôpa châ ta. He pasana he Central nata West Africa-zy liata hmô via chaipa a châ. Monkeypox he pasana chi liata ‘Poxviridae chhôhkha (family)’ liatahpa châ ta, he pasana chi liana heta smallpox nata cowpox chhao amâ hlao hra.

Kheita he pasana he â kaw lâpapua?

Monkeypox heta chasipa, rao pasapa/sawpa (sore throat) nata pasana nano nanopa tlôkhei thei ta. He pasana he hâta ei no chhôh tawhta hâta ei palih chhôh taihta â ô thei. He pasana vâta thina a tlô theina he zakha liata 3-10 rachhôh a châ. Atliata he pasana ama hmôpapua tawhta deikua thikheipa ama ypa pahnopa châ mâh vei.

Kheita â hiezawh?

Monkeypox he chyhsapa tlyma râhsa/sahrohzy ta tlyma hiezawh thei ei ta, he pasana hri a kiahpa hmozy tawhta â kia thei hra. Pavaw nata lôvâpazy ta chhao ama hiezawh thei. Smallpox hlâta deikua apakachhuah a rairu via.