Mizoram : Mizoram liata lô-O/atâhna-O (jail) nano nanopa 10-liata atâhpa chyhsa 1,388 y hai

Aizawl: Mizoram liata lô-O/atâhna-O (jail) nano nanopa 10-liata atâhpa chyhsa 1,388 y hai ei ta, he hryta hrochhôh atâh awpa ta tahpa chyhsa 49 ypa ta, ama hryta pakha cha chanô a châ.

Prison department hyutuhpazy tawhta Mizo thâtihbu miakha ZALEN ta bie ama daona liata, atahmâ duasu liata atâh haipa chyhsa 876-zy biebuapa cha court-liata pachia haipazy châ ta, chyhsa 213-zy cha biebua laipa, hriena chhao a pasapâ kawpa ta pie awpa ta ma chôta bietluna tao hapazy châ ei ta, chyhsa 244-zy biebuapa cha biebuapa chyhnawhpa, hriena chhao nawhraih viapa ta hrie awpa ta ama chôta bietluna taopazy ama châ.

Jail nano nanopa liata hawtipa, chapaw 2 nata chanô 4 y hai ei ta, he hawtipazy he hmo paraopa ama hneipa vâta a ypa châ leipa ei ta, ama nô/pawzy ama ypa vâta a y hrapazy ama châ.

Central Women Jail (CWJ)-liata hawtipa papalih ypa ta, District Jail, Lunglei nata District Jail, Champhai liata pakha rairie ama y hra.

Atahmâ duasu liata Mizoram Jail nano nanopa liata atâhpa a ypa zydua 1,388 hrytra 1,223 cha chapaw châ ei ta, 165 cha chanô ama châ. Hro chhôh (lifer) atâh awpa ta thailei pachâsapa (convict) 48 hryta chanô pakha a hlao ta. Hrochhôh atâh awpa ta thailei pachâsapazy he ama zydua rô ta lianycheihpa ama châpa reip ama châ.

Hro chhôh atâh awpa ta thailei pachâsa hapa chyhsa 49-zy cha Central Jail, Aizawl liata patâhsapa châ ei ta, chanô pakha cha Central Women Jail-liata patâhpa a châ.

Prison department hyutuhpazy chata Mizoram liata jail nano nanopazy cha a theina hawhta tobi  pathi awpa amâ chhuah tahpa ZALEN he chho ei ta, nie nata do hleikhôta a bu nata sai etc.lâ chhao theina hawhta taopathi amâ chhuah, tahpa ama reih hra.

Source - Zalen