India Maw-nochhi : Tilaipa vâta chyhsa 31 ta hrona ama pahlei ha

Siaha, târi 18 Chhiepa, 2022 : Noh no a khô hapa chhôh khata vâsuapa nata Tilaipa vâta Assam nata Meghalaya liata chyhsa 31 ama thi ha. Assam district 28 liata pahrâpa chyhsa maluh Thysy 19 (lakh) zy ta rairuna atyh hai ei ta, chyhsa Thysy 1 hlei tlai deichhyna su (Relief Camp) liata mohôhpa ama châ hai.

He thâtih pachhuahpanoh hai nota Maw-nochhi State thokha duasu tlâhpipa :

Noh no chhôhta Tilaipa vâta hrona a pahlei hapa hryta, Assam liata 12 thi ei ta, Meghalaya liata chyhsa 19 ama thi ha hra.

Tripura khihpi Agartala liata chhao athata ti lai ta. Agartala khihpi heta dawh 6 chhôhta vâsuati '145 mm' ta hluhpa a dao.

Meghalaya liata Mawsynram nata Cherrapunji-zy liata kô 1940 hnohlâ ta vâsuati ama dao hluh chaina daihti a châ; Meghalaya Chief Minister Conrad Sangma chata hrona a pahleipazy cha luhty ₹ Thysy 4 (lakh) sai ama chhôhkhazy hnohta piepa ama châ aw, a tah.

Assam liata, khih 3,000 tlai Tilaipa heta vao ta, râh, chicheipa chheina 43,000 hectares ta kawhpa cha ti ta a vao khai ha hra. Lâthlôh nata tihrykyh chhao a rao hôlô hra.

Prime Minister Narendra Modi chata Atanoh khata Assam Chief Minister Himanta Biswa Sarma bie a chhopa ta, Tilaipa ta hmo a paraopazy hiahrihpa ta, sawhkhâ kôpipa ta a theina hawhta a bao awpazie a chho.