INDIA : Pheisaih lana dâh 'Agnipath Scheme' vâta India a bua hai

India sawhkhâ ta pheisaih lana dâh thiehpa, 'Agnipath scheme' a taopa kholeina vâta palôhtlâhleina palâsana cha India râh su nano nanopa liata a paru via lymâ hai. He thâtih pachhuahpanoh hai no taihna heta he buana liana heta thyutliapa 1 ta hrona pahlei ha ta; Train hluhpi cha meita raopa châ ta, Bihar, Uttar Pradesh nata Telangana zy liata he buana he a paru pachaih. He hleikhôna heta, Madhya Pradesh, Haryana, Rajasthan nata Delhi liata he buana he â kapachhuah lymâ hai hra. He buana vâna heta State thokha liata cha 'Internet service' zy taihta chalihsapa châ ta; train 300 hlei tlai a râ thei leipa ta amâ taw hai.

AGNIPATH SCHEME CHA KHÂPA MAW?

He pheisaih lana dâh taopathipa, 'AGNIPATH Scheme' hawhna heta India pheisaih chi 3 (Airforce, Navy nata Army) châ awpa ta kôchareih thyutliapa kô 17.5 tawhta kô 23-ta uhtheipa, 45,000 tawhta 50,000 rachhôh la tyh awpa châ aw ei ta; He pheisaih châta lapa thyutliapa hluh viapazy he kô 4 chhôh ngâlâh châta pheisaih châ aw ei ta, ama hryta zakha liata 25 deita ngâlâhzy cha ama raihria phana reizie ta kô 15 chhôh châta lapa ama châ aw. 

He hawhta sawhkhâ ta pheisaih lana dâh thiehpa a taopa liata, kô 4 chhôh ngâlâh hria awpa ta â i leipa nata, pheisaih tawhta ama bâ tawhta chhao ta 'pension' a y lei awpa heta India ráh State thokha liata thyutliapa hluhpi palôh patlâh leipa ta, he hawhna heta buana a pua hapa a châ.