Article : Marapa nata Pho

Marapa liata Pho (Clan) eima tahpa he O chhôhkhaohkha phozy tawhta avaw thaopa châ ei ta. Marapa khihtlâh he 'Chapaw ryureina/Patriarchal' ta siepa a châ hapa vâta, chanô pho avaw hly beih veih ei. Chapaw chi pathlazy cha âmo apathlatuhpa pho amâ vaw hly lymâ tyhpa a châ. 

Pho paduahna kyh liana heta dyutlaina nata dyutlai leina heta yzie a hnei pasih kawpa avaw châ. Chanô ta pho padua thei vei. A vahpa pho kha â hly tyh. Chapaw pathlazy cha ama vaw pôh via lymâ na ta, pathlazy ama vaw châ lymâ. Ama pathlatuhpa moh cha ama pho châta vaw hmâh lymâpa ta, ano pathla, ano pathla tahpa cha daihti avaw sie lymâpa hawhta, pho lâta avaw pua hapa a vaw châ.

Hlâno Mara Khihtlâh/Society liana khata, khihsa tôtuhna, dyutlaina nata tlai leina nata, hmotaotheina mopâpa ta pho cha chhaih 3 (Hierarchical Order) lâta vaw pachhaih ei ta. Chazy cha :

1. Abei Pho 

2. Machhie Pho 

3.Sei 

tahpazy a châ.

1. Abei Pho : Abei pho athaona cha 'Hneirôna nata Hmotaotheina' vâta a châ. Chariah-Sahrâ adyuhna kyh liata vâtlâh apahniehna a châpazy cha Khihtlâh ta mo pasâhpa ta, ama chôta ryureituhpa hawhta mona vaw y ta. Cha chata dusawta ta ama chô liata ryureina raihriatuhpa lâta pachâsapa ta, Abei tahpa ta pahnopa ama vaw châ haw. He hleikhôna heta, hlâno Marapazy khata Khih thiehpa ama paduana daihti liata ama hry tawhta dyutlai kawpa ama y lei khiahta cha, khih hro râh hro liatahpa, Abei châta ama hrua/la tyh. Mararâh liata Abei Pho, Ti nata râh a hneipazy cha :

Hlychho, Chozah, Bohia, Nôhro-zy he a lai viapa châ ei ta. Chhachhai, Zawtha, Sawthly, Nôtlia, Tôpa Khaila, Nachhô nata Chhaihlô-zy chhao he Abei Pho ama châ hra.

Hlâno Beizy khata lahpinô pakha hlâta hluh viapa vaw hnei tyh ei ta. Anodeikua, lahpinô hmeiseihpa ta rei thei awpa cha pakha dei ama châ tyh. Ahropazy cha Nôtho tahpa châ ei ta; Nôtho sawzy he cha Abei tlâh ato theipa hawhta pachâpa châ veih ei. Hlâno Abeizy maohphaona kha a sâh ngaita kaw ta, chariah, sahrâ hmia liata Khihsawzy châta abohna nata thlahlôhna châ ei ta. Chakâh-chaphaona kyh liata maohphaohna ama la lymâ tyh. Biebua hlabuapa zydua kha âmo ta pachiapa ta, khihsawzy mohôhtuh chaipa ama châ tahpa ta chhao eima reih thei aw. He vâna heta Khihsawzy chhao ta za ei ta, Chhie, Abei tovyuh ama vaw pie tyhpa a vaw châ. 

Hlâno Marapazy khata Abei hnohta chhie vaw pie tyh ei ta, cha zy cha : 

'Râhpaw' : Lyurâh a hneipa Beizy ta ama khei tyh. Sâh lâta piepa a châ.

Sabai : Lyurâh a hnei leipa Beizy chhao ta ama khei tyh hra.

Sahaw : Lyurâhsa a kapa maihta sapalaih ama pie tyh.

2. Machhie Pho:

Machhie tahpa yzie cha Vâtlâh zawpi tahna a châ. Abeizy hnohta, Râhpaw, Sabai nata Sahaw a piepa maih cha Machhie Pho tahpa ama châ. Machhie pho ta khih thieh râh thieh padua sala, râh tlypa liata khih a padua khiahta cha Abei a châ thei hra. Machhie Pho liana chhao heta hneirôna nata dyutlaina nata tlai leina mopa ta, Machhie Pho phapa nata Pho a hnaipa ama y heih tyh hra.

3. SEI : Pho athaona liata Sei tahpa he y leipa ta, Sei ta a vaw pihpa chhao y taraw veih ei. Adyuhna liata ama patupazy, Leibâh athô thei leipazy, Nie nata do awpa aphahlana vâta Abei-O angiapazy, Abei sawchanô a parao tlamawpazy cha SEI ama vaw tah tyhpa a châ.

Sei nairu liana chhao heta Pho 2 ta y heih ei ta, Abei Ochhôh liata a ypa Sei nata Abei- O chhôh tawhta Ochâ a chôpa Sei, 'Saihza' ama tahpazy ama châ. 'Saihza' he a duahmo â sâh viapa ta reipa a châ.

Hlâno Marapa Khihtlâh liata Seizy kha ama duahmo a hnai leipa ta, anodeikua, Chanô Sei cha Chapaw sei hlâta a duahmo â sâh via. Hlâno Mara bei hryta pakha a thi nota, a sei chapaw pakha cha a thlâ liata a hrohpa tlai ta pabu hra ei ta, thlâ chhôh liata Viadawh cha Noh 9 chhôh a tô tahpa ta ama rei.