Siaha Thohna O liata Unit thiehpa 2 pahypa a châ

ZMC 1st Batch zy ta Internship ama patlô tita Phurâ, Tipâ nata Chhaolô PHC zy ta Dawhty ama hnei thei bâ na ta eimâ hnabeiseih - Health Minister

|DIPR Mizoram|

Siaha 24 Chhiepa, 2023 : Atanoh my dawh 9:30 khata Mizoram sawhkhâ liata Health & Family Welfare Minister Dr.R.Lalthangliana chata District Hospital Siaha liata hawsaihpa/hawtipa mohôhna 'PAEDIATRIC INTENSIVE CARE UNIT(PICU)' nata 'HIGH DEPENDENCY UNIT(HDU)' a pahy. He PICU nata HDU pahyna apakhyna he DMS Hall liata hmâpa châ ta, Puhpa Lalhmunsanga Hnamte, DC Siaha ta a chhihtha.

Health Minister heta Mizoram Health Systems Strengthening Project (MHSSP) ry liata District Hospital Siaha chhao Tlaw thysy 276.7 (lakhs) hryuhpa ta tobi pathi achhuahpa a châ, a ta. He project ry liana heta 'Mortuary room' sapa zy, Administrative Building, OPD building, Trauma Centre, Main Building rôh hnia pathipa, obâ nata slab raopa taopathipa, siphiah nata pâhchhô baipa (tile) phaw pathipa hleikhôta, su peimawh viapa liata CCTV pangai pathipa zy a hlao aw ta, Khihpa thla tawhta la rai pathao thei awpa a hnabeiseihpa a châ, a ta.

Minister chata, "Zoram Medical College 1st Batch, 'Internship' tao haipazy ta ama vaw patlô tita cha Tipa, Phura, Chhaolô PHC zy ta chhao Dawhty ama hnei cheingei na ta eimâ hnabeiseih," a ta. 

Atanohta District Hospital Siaha liata Unit pahy thiehpa liana heta rakhô 12 ypa ta, Paediatric ICU-liata rakhô 4 nata HDU-liata rakhô 8 y ta, Unit 2 zy he khaw nata chhaichhi nano nanopa 16 ta tobipa ama châ.