Tirybalyh 'Titan' liata akiahpazy pachha hmâ khao vei ei!

Atlantic tilaipi ry liata a pamôh hapa, kô 1912 liata dâhhawtlo a supa vâta a raopa, balyh laipa Titanic moh awpa ta tirybalyh tatawpa, OceanGate ta ama taopa, 'Titan' balyh liata a kiahpa chyhsa 5 zy cha ama hrona pachha hmâ khao vei ei. Târi 18 Chhiepa, 2023 Abeipa Noh tawhta tilaipi ry a pathuh kawpa, zohkaluh hapa liata ama yna chybia pahnopa a châ khao lei tawhta nata, tiry a ngiana chhaichhi pha chaipazy hmâpa ta Noh 4 chhôh a pahâ leipa ta tluapa ama châ tawhta, Pohbie Noh khata, ama kiana tirybalyh keichheina hmôpa châ ta, a chhôh liata a kiahpa 5 zy chhao he, ama thi pâ ha hra, tahpa phuahpa a châ ha hra.

He kyh liata khizaw pahnopa ta biephuahtuhpa, US Navy chata, he tirybalyh he khôtho lâ tawhta bie amâ chhopahlie thei khao lei Noh khata, pyury paro kawpa, he tirybalyh papa pyu he châ sala pangiasapa theipa a châ, ama ta.

Pohbie Noh khata US Navy liata Rear admiral John Mauger - tluana raihria chhithatuhpa chata, Pohbie Noh khata Titanic balyh tawhta 487m (1,600ft) rachhôh liata he tirybalyh keichheina he hmôpa a châ, a ta.

Rear Admiral Mauger chata reih pazaopa ta : "He tirybalyh keichheina zy he he hawhpa kyh a pahnopazy eimâ saohiah tawhta, tirybalyh chhôh liata ziza acha-ie tu hapa chata tirybalyh cha a pakeichheisa hapa a châ.

"US Coast Guard vyuhpa ta, mâchhiesapa ama chhôhkhazy palôh hmeiseihpa ta ei taokhei ei" tahpa ta, athipazy a taokheizie a palâsa pâ.

TIRYBALYH 'OCEAN GATE' TITAN KHITLYNA

Tiry balyh tatawpa hmâpa ta kô 1912 liata Atlantic tilaipi liata a pamôh hapa, Titanic balyh a rao hapa, tilaipi ry liata a pamôh hapa moh awp ta tiry a ngiapa sahlao, târi 18 Chhiepa, 2023 (Abeipa Noh) liata bie a chhopahlie thei khao leipa ta a y hapazy cha pachhapapua hmâ khao vei ei. 

He tiry balyh tatawpa, 'Titan' ama tahpa he tilaipi ry liata a pamôh hapa, balyh laipa, mohpathâh kawpa Titanic moh awpa ta a sie khohpazy sievawkheina châta hmâpa châ ta, a chhôh liana heta chyhsa papangawh kiah thei ei ta, tiry liata ama y chhôhta zilih (oxygen) ama sy awpa dawh 70 tawhta dawh 96 taihta adaih awpa a y hra. 

Tirybalyh tatawpa chhôh liana heta chyhsa 5 - British billionaire nata adventurer Hamish Harding, 58,, Pakistani sôhpaliepa Shahzada Dawood, 48, nata a sawchapaw kô 19 ta uhtheipa Suleman, British râhchyhsa châna a hneipazy, CEO Stockton Rush zy, nata French chyhsa, kô 77 ta uhtheipa, tiry a ngia tyhpa Paul Henry Nargiolet zy ama kiah.

Tluana raihriatuhpa hrytahpa U.S. Coast Guard chata ROV (remotely operated vehicle) zy chhao Canada zawtheina ta tiry lâ tawhta pyury a theina su rachhôh liata tiry lâ ama pazawsa ha hra, tahpa ta, ama tluana su chhao he a kawh viapa ta ama tluapa kha a châ.

Pakhy Noh khata France lâ tawhta tiry achupasiana balyh, 'Atalante' ama tahpa, tiry â ngia pathuh thei kawpa cha tiry lâ pangiasa ha hrapa châ ta, he French tiry lâta pamôh theipa Robot balyh (submersible robot), 'Victor 6000' ama  tahpa heta tiry metre 6,000 ta a pathuhpa taihta a tlô thei.

Ama tlua haipa, tiry balyh tatawpa, 'Titan' ta tly awpa â chhuahpa balyh laipa rao hapa, Titanic he British balyh laipa he kô 1912 liana khata a khitlyna hmiatua chaipa liata Atlantic tilaipi liata dâhhaw tlo supa ta, tiry lâ â pamôh hapa kha châ ta. A chhôh liata a kiahpa chyhsa 1,500 hlâta hluh viapa thipa ta, tiry feet 12,500 (3,810 meters) ta a pathuhpa liata â pahâ molo thlâh ha bâpa a châ. He Titanic balyh raopa he chyhsa hluhpi ta tly byuh ei ta, achupasiana châta zy, hmô hrahro hr'awpa khohpa vâta nata, tiry khitlyna hawhta zy a tlyhtuhpa ama hluh kaw tyhpa a châ. 

He tiry liata a ypa Titanic tly awpa heta tirybalyh tatawpa, atahmâ ta ama tlua ngâhaipa he hmâ tyhpa châ ta, mopakha ta $250,000 cheihpa ta ama tly tyh.