Elon Musk nata Mark Zuckerberg UFC kichariepa dôhpachhôh liata

Ama siena lâkaoh liata hlaotloh kawpa chyhsa a châ rairiepa nata, atahmâhlâ khizaw Social Media laipa miano Twitter nata Meta hneituhpa, khizaw chyhsa hneirôhpa rairie - Elon Musk nata Mark Zuckerberg - zy chata UFC Dôhpa, 'Kichariepa (Octagon)' chhôh liata kutô ta â hmiachhy awpa ama paryhsa.

Elon Musk chata a 'social media' Twitter liata FB, Instagram nata WhatsApp hneituhpa Zuckerberg he kutô hmâpa ta a chanaohkhei awpa ta pahao ta. He he Mark Zuckerberg ta vaw hmôpa ta, vaw ss (screenshot) pa ta, tawhpapua heih hrapa ta, "A su khataihlia châ aw?" tahpa ta Musk he â chhypalie.

Musk heta hetana heta Zuckerberg he â chhypalie heih hra : "Vegas Octagon lia sy."

'Octagon' he Ultimate Fighting Championship (UFC) amâ tu tyhna dôhpa, ki charie a hneipa, thua diahpai ta dôhpa a châ. UFC he Las Vegas, Nevada, US liata supipa ama hnei.

Musk, kô 52 a châ ha hrapa heta : "Ei chhaichhi pha chaipa, ei tlôna apielyupa cha "The Walrus", châ ta, ei tulâhpazy a byuhnie na ta, ei y molo thlâh ha tyh." a ta.

He hleikhôna heta : "Apatlâpazia (Workout) beih vana, ei sawnahzy chalo na ta, ziza liata ei pathluah tyh ei tah leipa ta la." tahpa a tawh pâ.

He hawhta a châ nona heta, kô 39-ta uhtheipa Zuckerberg deikua he cha Mixed Martial Arts (MMA) liata hniehnôh hnei hapa châ ta, Jiu-Jitsu ataopasuana liata chhao a vaw pua ha hra.

Atu hmeiseih hapa châ ei sala, Tesla, Space X, Neuralink nata Twitter hneituhpa Musk heta FB, Instagram, WhatsApp hneituhpa Mark Zuckerberg a pahnie thei ma?