Khizaw mokhâh haipa tirybalyh tatawpa hmô thei to mâh vei ei - ziza sy awpa hnei hluh khao vei ei

Tiry balyh tatawpa hmâpa ta kô 1912 liata Atlantic tilaipi liata a pamôh hapa, Titanic balyh a rao hapa, tilaipi ry liata a pamôh hapa moh awp ta tiry a ngiapa sahlao, târi 18 Chhiepa, 2023 (Abeipa Noh) liata bie a chhopahlie thei khao leipa ta a y hapazy cha pachhapapua hmâ cheingei a chhuahpa ta tlua pazao lymâpa châ ei ta, Pakhy Noh khata North Atlantic tilaipi ry lâ pyury ama theipa chata tluatuhpazy nah charao kaw ta, anodeikua he pyury he pyury hropa chhao a châ thei hra, tahpa ta tluatuhpa hryta hyutuh viapazy ta bie ama papua.

He tiry balyh tatawpa, 'Titan' ama tahpa he tilaipi ry liata a pamôh hapa, balyh laipa, mohpathâh kawpa Titanic moh awpa ta a sie khohpazy sievawkheina châta hmâpa châ ta, a chhôh liana heta chyhsa papangawh kiah thei ei ta, tiry liata ama y chhôhta zilih (oxygen) ama sy awpa dawh 70 tawhta dawh 96 taihta adaih awpa a y hra. Tiry liata ama yna chybia pahnopa ama châ khao leina tawhta a Noh 5-na châ ha bâ ta, ama Oxygen chhao heta dawh hluh â daih khao na ta pangiasana lei pathao ha ta, tluatuhpazy nata, ama thâtih mokhâhtuhpa khizaw zawpi pathi sâh a daih ngâkaw bâ. A tlâhbohpa ta ama pachhapapua hmâ ma? tahpa cha khizaw mokhâh chaipa a châ hai.

Tirybalyh tatawpa chhôh liana heta chyhsa 5 - British billionaire nata adventurer Hamish Harding, 58,, Pakistani sôhpaliepa Shahzada Dawood, 48, nata a sawchapaw kô 19 ta uhtheipa Suleman, British râhchyhsa châna a hneipazy, OceanGate Gate CEO Stockton Rush zy, nata French chyhsa, kô 77 ta uhtheipa, tiry a ngia tyhpa Paul Henry Nargiolet zy ama châ.

Tluana raihriatuhpa hrytahpa U.S. Coast Guard chata ROV (remotely operated vehicle) zy chhao Canada zawtheina ta tiry lâ tawhta pyury a theina su rachhôh liata tiry lâ ama pazawsa ha hra, tahpa ta, ama tluana su chhao he a kawh viapa ta ama tlua lymâ hra. 

Pakhy Noh khata Frence lâ tawhta tiry achupasiana balyh, 'Atalante' ama tahpa, tiry â ngia pathuh thei kawpa cha tiry lâ pangiasa ha hrapa châ ta, atahmâ duasu liata cha tirybalyh nata a chhôh liata kiahpazy yna chybia pahno thei mâh vei ei.

He French tiry lâta pamôh theipa Robot balyh (submersible robot), 'Victor 6000' ama  tahpa heta tiry metre 6,000 ta a pathuhpa taihta a tlô thei.

Ama tlua haipa, tiry balyh tatawpa, 'Titan' ta tly awpa â chhuahpa balyh laipa rao hapa, Titanic he British balyh laipa he kô 1912 liana khata a khitlyna hmiatua chaipa liata Atlantic tilaipi liata dâhhaw tlo supa ta, tiry lâ â pamôh hapa kha châ ta. A chhôh liata a kiahpa chyhsa 1,500 hlâta hluh viapa thipa ta, tiry feet 12,500 (3,810 meters) ta a pathuhpa liata â pahâ molo thlâh ha bâpa a châ. He Titanic balyh raopa he chyhsa hluhpi ta tly byuh ei ta, achupasiana châta zy, hmô hrahro hr'awpa khohpa vâta nata, tiry khitlyna hawhta zy a tlyhtuhpa ama hluh kaw tyhpa a châ. 

He tiry liata a ypa Titanic tly awpa heta tirybalyh tatawpa, atahmâ ta ama tlua ngâhaipa he hmâ tyhpa châ ta, mopakha ta $250,000 cheihpa ta ama tly tyh.