Article : Hebrai reih thi hapa pahropathituhpa - Eliezer Ben-Yehuda

Hebrai he kô zabi 5-na (CE) rachhôh tawhna khata a hmâhtuhpa/cheihtuhpa ama y khao leipa vâta reih leipa (Extinct) hawhta pachâpa châ ta, Biehrai nata Zu zyhna ahniahnipa châbu liata a ro ta ropa reih (liturgical language) hawhta deita a y bâ. Châhrasala, Hebrai reih pahropathi awpa ta hmahlana vâta kô zabi 19-na liata cha atahmâhlâ Hebrai reih (Modern Hebrew) he acheihtuhpa 9 million ama vaw y ha bâ.

He hawhpa duasu tlô heih thei awpa ta hmahlatuhpa, Eliezer Ben‑Yehuda he târi 7 Nawh 1858 liana khata Russia liata vaw pih ta, a hawtita tawhta Russian reih a cheihpa a châ. A vaw pitloh tawhta deikua Hebrai reihkyhthaipa (linguist), grammarian, nata journalist a châ hleikhôta 'Hebrew dictionary' taotuhpa châ ta, he hleikhôna heta Hebrai reihta Thâtihbu pua tua chaipa HaZvi Editor a châpa a châ hra. Ano he Hebrai reih pahropathina/ahrapathina liata atôhpi chaipa a châ.

HEBRAI REIH PAHRO AWPA TA PALÔH PIE PATHAONA
Ei kha cha Paris khihpi liata _Sorbonne University_ liata 'History and politics of the Middle East' tahpa achu awpa ta a y nota, Jerusalem tawhta a vypa Zu chyhsa pakha, Hebrai reih a thaipa he a tyh chho ta. He chyhsa nahta amâ pakyh tawhta Hebrai reih cha pahropathipa ta, Israel phopi reih, Israel chipho zawpi reih pi chaipa lâta ama pahropathi thei heih aw, tahpa hnabeiseihna a hnei hapa a châ. Hebrai reih cha Israel chipho râh reih pi chaipa châ awpa ta pahrapathi, pahropathi theipa a châ, tahpa cha khâchâ â ngiapâ ha.

Hebrai reih cha Biehrai rona châhnawh nata, zyhna kyh liata apachuna kyh liata hmâ viapa a châ tarawpa ta, zawpi sâhpi reih châ khao leipa ta, 'Latin' zy hawhta châbu nata ropa lia deita hmô awpa a y ha bâpa, "Reih thipa (Dead language)", châbuzy lia deita hmô awpa a ypa nahta â lyu thlâh ha bâ. Cha cha Ben-Yehuda heta pahropathi ta, Israel zawpi zydua reih a hlypa, reih chei chaipa lâta papua heih awpa â chhuah hapa a châ.

Israel chyhsa, râh nano nanopa tawhta a vaw paihpakhypazy cha ama reih cheipa a lyu tlâ leipa ta, Hebrai reih a cheihpa nata a thaipa chhao y hliathâ khao vei ei. Ama thyutlianahzy chhao chata reih hropa cheih ha bâ ei ta, Hebrai reih cha reih thipa hawhta pachâpa a châ thlâh ha bâ.

Chatanachata, Ben-Yehuda chata he no rachhôhta reih hmâ a hlao chaipa, Yiddish nata kaohkâh reih thokha zy cha reih miakha hmâpa ta thla thei awpa a pangiasapa ta, hmahla awpa a chhuah haw ta. Khizaw râh nano nanopa tawhta a vaw paihpakhypa Israel chyhsa, reih nano nanopa a cheihpazy cha Hebrai reih miakha cheihpa ta, Israel râh reih lâta papua awpa ta hmah a la hapa a châ.

HEBRAI REIH PAHROPATHINA LIATA PEIMAWHPA BIESÂ/MOHCHHO THIEHPA PHINA KYH
Ben-Yehuda heta Hebrai reih pahropathi awpa ta hmah a lana liana heta,

"Committee of the Hebrew Language cha ama biepathlupa liata, "Hebrai reihta Mohchho/biesâ â khichaoleina/adaihkhyhleina a hneipazy cha, Committee chata Zu reih grammar nata reih siezie thabypa : Aramaic nata a eihpachaihpa ta Arabic reih thabypa_ a zipa ta Mohchho/biesâ thiehpa a phi aw/tao aw" tahpa pahlao awpa ta khâchâ â hnaw.

HEBRAI REIH LAISEIH AWPA TA A CHHÔHKHA TAWHTA A PATHAO
Ben‑Yehuda heta a sawchapaw, Ben-Zion cha a chyhta tawhta Hebrai reih ngâlâh cheih awpa ta mohôh ta. A hawtino tawhta a sawchapaw cha reih hropa rai a cheih awpa pasaih leipa ta, a lahpinô ta ama puana râh, Russian reihta nawh-eihna hla a sapa taihta rachhie ta a ra tyh. He hawhta a hmahlana vâna heta a sawchapaw cha - Atahmâhlâ khizaw liata Zu (Modern Jews) thyutliapa hryta a hawtita tawhta Hebrai reih a cheih tua chaipa a châ pâ ha hra

A sawchapaw khai tawhna heta Ben‑Yehuda heta a sawchanô, Dola cha a chyhta tawhta Hebrai reih deita cheih awpa ta a mohôh heih hra.

A HMAHLANA ADYUHTUHPA AMA Y
Zu zyhna kyh liata phahnai angiah patluapazy ta Ben-Yehuda ta Hebrai reih pathyupathi heih awpa â chhuahpa cha khoh leipa ei ta. Hebrai reih cha Biehrai reih châ ta, zawpi vâtlâh reih hawhta ama hmâh khiahta cha hmopathaihleipa Reina châta zy hmâh ei ta, pha vei, ama ta
A sawchapaw chhao cha Hebrai reih dei cheihpa ta a kaw laiseih khiah "A hrupa dei a châ aw" ama tah pâ hra. A hmahlana cha 'pahneichhi a chhihpa' tahpazy ta ama eilaw hra.

Ei kha chhochhi cha he hawhpa chyhsazy heta Ben-Yehuda nata a Puhpa (a lahpinô paw) zy cha 'Sawhkhâ adyuhnazie ta hmah ama la' tahpa ta sawhkhâ lâ lei ta, lô-O liata ama patâh pâ ngâkaw.

Ben-Yehud heta Hebrai reih pahropathina kyh liata peimawh kawpa, Hebrai ta thâtihbu 2 : HaZvi nata Hashkafa papua ta. A thâtihbu sâkha viapa 'HaZvi' chhochhi cha Adyuhna a hluh tu hapa vâta kô kha chhôh pakhâpa ei ta; achhâpa cha Biehrai reih, reih pathaihpa cha zawpi reihta hmâ awpa ama pasaih leipa vâta a châ.

Ben-Yehuda heta Hebrai reih pahropathina liata py peimawhpa, 'Committee of the Hebrew Language (Va'ad HaLashon)', a hnôhlâ ta 'Academy of the Hebrew Language' tahpa ama panano hapa paduana kyh liata a tôhpipa a châ ta, atanoh taihta he Committee he a y thlâh ha chy. He hleikhôta atahmâhlâ Hebrai reih 'dictionary' 'Ben-Yehuda Dictionary' pathaopatôtuhpa a châ hra.

Hebrai biesâ nata Mohchho thiehpa a phipa/taopapuapazy cha kholeituhpa, reipachhietuhpa hluh kaw hra ei sala, "Hebrai reih Pahropathituhpa" tahpa ta pahnopa a châ ngâthlâh ha bâ.

Hlâno reih, Aramaic reihzy nata Middle East reihzy tawhta Hebrai reih thiehpa liata Mohchho/biesâ a y leipazy cha lapa ta, baichhi ei ta; biesâ thiehpa ama taochhyh lymâ hra.

Joshua Blau ta Ben-Yehuda ta Hebrai reih Committee liata hmo â hnawpa kyh cha heta heta a rei :

"Hebrai reih liata Mohchho/biesâ adaihkhyhleina/akhichaoleina pakhipachao awpa ta, Committee chata Zu reih thabypa reih siezie nata grammar a zipa ta: Aramaic, Canaanite, Egyptian reih tawhta ama lapangia." a ta.

Hebrai reih, Biehrai nata zyhna kyh lia deita hmô awpa a y ha bâpa, zawpi ta ama daihny pathao hapa, reih thi awpa cha ELIEZER Ben-Yehuda thapasana nata tiamana vâta, reipachhiena nata Adyuhna hryta, pahropathipa dei châ leipa ta, atanoh taihta ISRAEL reihpipa, a râh zawpi reih lâta a vaw hrohpathi ha heihpa a châ.