Sports : Manchester City ta Europe ama tiah haw!

1st Half liata goal a ngia leipa ta amâ pahâ tawhta, Rodri ta Manuel Akanji nata Bernardo Silva zy tawhta ball a daopa cha a phei chachâh lâta Inter Milan kaovaihtuhpa Andre Onana patu thei rimâ lei awpa ta chapiepa ta, Man City tlôna nata Goal a y chhôhpa khôpa ta, Instanbul khihpi liata Manchester City achâhtuhpazy pyury a ru ngaita kaw.

Manchester City ta daihti vâropi chhôh ama vaw mokhâhpa Champions League nyungiapa cha ama chalo ha ha hra. Pachyhnoh zâcho (Abeipa Noh my) liata Instanbul khihpi liata UCL Final liata Serie A club Inter Milan pahniepa ta, Pep Guardiola nata a nawhtazy heta Season kha liata nyungiapa 3 chalopa ta, ama opa a iekhyhpa Manchester United hawhta 'Treble' ama chalo haw.

Premier League nata FA Cup ama chalo tawhta, City heta kô 1999 liata Manchester United ta Nyungiapa 3 ama chalopa kha amâ kaw kho ha hra tahna châ ta; he hawhpa duasu a tlô theipa English club panona ama châ pâ hra. He hawhpa tlô thei awpa ta City châta UCL Final liata pahniena goal a khôtuhpa cha Rodri châ ta; minute 68-na liata a khôpa a châ.

Guardiola nawhtazy he Pachyhnoh zâcho akhaihna liana heta he zâ ta akhaih pha kawpa nata achhuahnoh pha kawpa Inter Milan hmiakô liana heta cha hawh ngâsâ ta a pie pha muarua hra leipa ei ta, 1st half liata Kevin de Bruyne ta hmahphaohpa ta Tlyliah a puasaipa chhochhi kha cha ama thlahzohkhei kaw hra aw.

Châhrasala Inter hmiakô liata amâ pielyuzie nata, amâ khaih pha tu muarua leinazy cha City achâhtuhpa, Ataturk Stadium chhôh liata palopasah kawpazy châta cha ama chhôhso hria tu vei; UCL nyungiapa chalopa ta, ama club thâtih liata bo thiehpa ama kiah hapa cha thaphana ta bie leithei vei ei.

Guardiola châta chhao City UCL nyungiapa a chalokheipa heta Europe liata Coach rônahpa a chânazie palâsapa ta, a club parohpa Barcelona a mohôh nota ei 2 tlai a vaw chalo tawhta a ei 3 n'awpa a chalo ha heih tahna a châ hra.

Instanbul khihpi liata Final akhaihpa a châ hlâ via kha cha chyhsa hluhpi ta Man City heta Inter Milan he ama pahnie kaw awpa hawhta reihpa ta, pangiasa hôlô ei ta; châhrasala City he vâhnei vei mawh ei sala cha Inter Milan ta ama tlahnaona zydua khata thlahlôhpa rai paysa vei. Inter lâ tawhta Federico Dimarco ta a luhta a supa, goal pakhâhpa a khaipazy, Ederson ta Romelu Lukaku chapiepa a vaw pakhâpazy kha Inter ta chhao ama I kaw hra aw.

Champions League nyungiapa heta City nata ama puhpa, Guardiola - zy ta UCL nyungiapa vâta palôh pasana ama taopa, kô 2021 Final liata Premier League liata ama hmiachhy tyhpa Chelsea ama pahnie leipa kha, atahmâla ama my thei ha bâ.

Instanbul final liana heta Inter Milan heta substitute tawhta a ngiapa Lukaku ta a luhta a supa, Ederson dady liata a sie hapazy kha ama I kaw hra aw. Ama vâdua zâ a châ ha tawh tly cha, akhaih pha kaw hra ei sala goal rai khô thei vei ei.

Kô 2009 nata 2011 liata Barcelona a mohôh nota Champions League nyungiapa a vaw dikhei hatuhpa Pep Guordiola he atahmâ cha Barcelona hleikhôta, City châta chhao Coach rônah patluapa, City club nata ama fans zy ta khâ ama rei bâ awpa, City thâtih liata a thâtih khâ ama chaluah ha bâ awpa a châ ha bâ aw.

©maraliteratureSports