Noh 40 chhôh Amazon râhhmâhpa liata a leipa hawtipa 4 a tlâhbohpa ta hmôpa ama châ

Târi 1 Patô, 2023 khata zawtheina sâkha cha apiepasipa ta Colombia liata Amazon râhhmâhpa liata tla ta, a chhôh liata a kiahpa hryta pitlohpa 3 ama thi nota, hawtipa 4 zy deikua vâhneichhih kawpa ta aboh ei ta; noâhchhih kawpa ta Noh 40 chhôh tlai râhhmâhpa liata viavipa ta, ama lei tawhta, a tlâhboh kawpa ta hmôpa ama châ.

He hawtipazy he kô 13, 9, 5 nata kô 1 ta uhtheipazy châ ei ta; ama kei hmô nona heta ama thachhâ kaw ta, thohna O lâ thlai ngaikheipa châ ei ta, ama mahpaw Fidencio Valencia chata a samohpazy cha "Ama thachhâ kaw tarawpa ta, chhôhkha sanawhzy hmi miah ama hmôpa la ama thâpha ngaita" a ta.

He hawtipa 4 zy he târi 10 Chhiepa, 2023 khata hmôpa châ ei ta. Thla 1 hlei tlai cha Amazon râhhmâhpa liana heta ama lei tahna a châ.

He hawtipa sahlaozy he târi 1 Patô liana khata ama zawtheina a tlapa vâta ama yna chybia pahno khao leipa châ ei ta. He zawtheina tlapa liana heta ama nô nata, Pilot 2 ama thi.

Âmo tluatuhpazy ta a thla hlei tlai tluapa ta, râh liata ama hniehnôh nano nanopa - ama pheihnie nata theilâpa ama nie laibâhpa ama thypa tawhta zy alaichadaipa ta, achhâna lâta cha ama kei hmô hapa a châ.

Hawtipa hry pano, kô 1 pa nata kô 5 pazy heta ama Pina Noh cha râhhmâhpa liata Aly ei ta, ama hryta uhthei chaipa Lesly, kô 13 pa he reithaitlâh a châ kaw, ano heta a nawhtazy he kohki pha kaw ta, Noh 40 chhôh râhhmâhpa liata ama hrohpapua theina chhâ chaipa a châ chhao eima tah thei aw.

Ama mahpaw Valencia ta a reina liata cha, he hawtipazy heta zawtheina liata viahdie (flour) ama hmôpazy nata, chicheipa chikaopa hmâpa ta zy ama rih amâ pabie tyh, a ta.

Pachyhnoh khata Colombia President Gustavo Petro nata a hrialâhpazy ta hawtipazy he thohna O liata kei tly ei ta, chanô hawtipa Lesly cha a nawhtazy a mohôhna kyh liata ama reithai ngaita.

Ama mohôhna pheisaih thohna O liata pheisaih dawhty Carlos Rincon chata "ama sapa ta pati phapa a phahla ta" châhrasala "hmah chyhnawhpa vo a hliapa tahpazy rakha na tlâ ama hnei, ama vâhnei kaw" a ta.

Dawhty heta pati deikua nie thei mâh vei ei tahpa ta : "Liahsa eima mohpasia via tawhta pati he eima paniesa pathao aw. Ama duasu a pha lymâ khiahta la hâta ei no ei thôh chhôh la thohna O lia ama y chy aw." a ta.

He hawtipazy he Colombia liata chipho pahrâ tuapa Huitoto chipho châ ei ta. He hawtipazy tluana liata a luh chaipa General Pedro Sanchez chata Huitoto chiphozy ta tluana rai ama hriana liata ama baopa vâta â lyzie a rei.

He hawhta a châ nona heta hawtipazy tluana châta hmâpa, Belgian Shepherd I sâkha cha râhhmâhpa liana heta lei ta, ama tlua hai heih hra.