Siaha Thohna-O ta 'Kayakalp Award' dao

Târi Chhiepa, 2023 : District Hospital, Siaha cha atanoh khata Mizoram liata pathaihna kyh liata nata kyh nano nanopa liata a taopha chaipa ama châpa vâta 'Kayalkap Award' hlâpa châ ta, he palyupalihna heta Tlaw 6,00,000/- lymâ châta â chakaih pâ.

Atanoh khata Mizoram Health Minister Dr R.Lalthangliana sahlaota Taxation Conference Hall, Aizawl liata 'Kayakalp Award' raina daihti he hmâpa a châ.

India sawhkhâ ta pathaihna kyh liata hmahlana tôhpipa a siekheipa 'Swachh Bharat Abhiyaan' ry liata department zy hmahlana awpa nano nanopa bitai ta, Health and Family welfare ry liata  Sawhkhâ thohna O nata a chheipâh a pathaih kawpa ta mohôhpa a châ theina awpa ta Kayakalp hmahlana he siekhei ta. Ministry of Health & Family Welfare, Govt of India chata Sawhkhâ thohna O zy ta ama zyh awpa 'Kayakalp guidelines' taopa ta, cha cha 'Kayakalp' a vaw thaotôna cha a châ. Kayakalp (Award to Public Health Facility) scheme he India târi Patô 15, 2015 khata pathaopa châ ta, Mizoram liata cha Khihpa 9, 2015 khata Tourist Lodge Chaltlang liata siekheipa a châ.

Kayakalp he Hindi châ ta, a yzie cha 'Pathieh heihna’ (rejuvenating, to render young again) tahna a châ. He scheme ta â chhuah chaipa cha sawhkhâ Thohna O zy ta Quality Health Care Service Delivery piepa a châ. Cha tao thei awpa chata – pasana apakapachhuah theipa a hiezawh awpa vaipazy, thohna O didaoh nata puapa a pasopanô n'awpa dâh dopa ta hriapazy, a yna su a ngiana nata pathaihnazy, hriatuhpazy chyhsa thlahsa thaina nata leh thainazy panuana (Kayakalp checklist) nano nanopa ta hmâhpa ta, a tao phapazy palyupalihna nata alykheina châta sôh pha kawpa piepa ama châ. He heta Quality Health Care Delivery a tlôkhei haipa hleikhôta, sawhkhâ Thohna O zy zawpi hluh viapa ta hmâhphahnai ta, sôhthih hryuhpa [out of pocket expenditure (OOPE)] zy chhao zie-y via awpa ta a hnabeiseihpa a châ.

Kayakalp Award daotuhpazy :

1. District Hospital

a. 1-na : Siaha District Hospital – Rs. 6,00,000/-, nyungiapa nata ryuchâ.

b. 2-na : Champhai District Hospital – Rs. 5,00,000/-, Nyungiapa nata Ryuchâ.

c. 3-na : Mamit District Hospital – Rs. 4,00,000/-, Nyungiapa nata Ryuchâ.

'Eco-Friendly Award' liata Siaha ta 2-na lymâ a dao heih hra -

i. 1-na : Champhai District Hospital – Rs. 3,00,000/-

ii. 2-na : Siaha District Hospital – Rs. 2,00,000/-

iii. 3-na : Mamit District Hospital – Rs.1,50,000/-

Primary Health Centre (PHC) hry liata district nano nanopa liata lymâ ama daona dâh – sâkhana Rs. 2,00,000/-, nyungiapa nata ryuchâ ; sânona Rs. 1,00,000/-, nyungiapa nata ryuchâ; sâthôhna Rs. 80,000/-, nyungiapa nata ryuchâ, he hawhna heta :

Siaha District liata PHC taophapazy :

i. Chhaolô PHC

ii. Phura PHC

iii. Chakhei PHC

'Health & Wellness Centre – Sub-Centre (HWC-SC)' liata sâkhana ta Rs. 1,00,000 dao ta; sânona ta Rs. 50,000 ama dao. 

Siaha District liata lymâ daotuhpazy :

i. Chapi HWC-SC

ii. No-aotlâh HWC-SC