US ta Manipur buana kyh liata India bao awpa ta â mâ thlâh ha a ta

India liata US Vyuhtuapa (Ambassador to India) Eric Garcetti chata zâhnia Pohbie Noh khata United States cha Manipur buana kyh liata India cha bao awpa â mâ ngâthlâh ha, a ta. Garcetti chata US châta cha, Manipur buana he "chyhsapa châna a veipâpa" châ ta, he su liata buana he paipa ta, Adyhna a y khiahta cha US ta hmahlana hluh viapa â vaw ngiakhei thei aw a ta.

Pohbie Noh khata, Manipur notla Imphal West district liata nô pakha kasaopa châ ta, he he siku ama pahy pathi heih tawhta nohkha a khô dyuta tahpa liata hmo a tlôpa a châ. Manipur buana he Pamih thla liata Meitei chiphozy ta 'Scheduled Tribe' liata pahlao hra awpa ta amâ hawpa kholeina palâsana châta 'Tlâhchyhsazy Apôhkhana Lâthlôh Achhihna' ama hnei tawhta a thaopa châ ta. He rakha tawhna heta, Meitei nata Kuki chyhsazy likah buana vâta chyhsa 100 hleita ama hrona ama pahlei ha bâ.

US vyuhtuapa Eric Garcetti chata, "He hmotlôpa he hmahlana/sôhpaliena/râh pabohsana kyh liata athôhna pachâpa vâta khâsiapa lâchhâh aheihpa ta reih vana, chyhsa eima châna hawhta chyhsapa chôta hmotlôpa pachâna vâta a châ. He hawhpa buana vâta hawtipa nata mohropazy ta hrona ama pahleipa ngâpa khâsiapa awpa heta, India chyhsa na châ cheingei awpa a ngiah vei" a tah hra. 

Kolkata liata thâtihthiehpa chyhsazy â pakyhna liana heta Eric Garcetti heta, "Manipur kyh he na pareisa tua t'u. Aryhna a y theina awpa ta thlah eima chhâ. United States ta a vaw pachâ hra ma tahpa kyh na hiahrih ei chi ta, keimo ta eima vaw pachâna kao la sawhkhâ hawhta athôhna tlyma lâta châ vei. Chyhsapa eima châna kao lâ tawhta eima vaw pachâ kaw hra." a ta.

US ta a bao thei aw tahpa reihpa ta, Garcetti chata, "Khâpa kao lâ tawhta rai ta bao awpa ta miah amâ haw khiah eimâ mâ thlâh ha. India chyhsa châna nahta a hniahnipa a châ tahpa la eima pahno. Bietapa miakha ei rei khohpa cha — India Nochhi lâ nata Maw-nochhi lâ he United States chata a pachâ peimawh kaw. A chyhsa pahrâpazy, a su nata râhzy, theina a ypazy nata hmialâ daihti liata US châta a phahnaina awpazy mopa ta eima pachâ kaw,” a ta.