Manipur : Kuki chanô 2 thluahruapa ta lâthlôh achhihkheipa liata maophaohtuhpa patu

20 Khihpa, 2023 Pohbie Noh : Manipur liata Kuki chanô 2, thluahruapa ta lâthlôh amâ chhihkhei nopa video â hiezawh tawhta nohkha a khô tahpa liata he Video liata maophaohtuh chaipa ta ama reipa cha atanoh Pohbie Noh heta Police zy ta ama patu. He ama patupa he Heradas (32) tahpa ta pahnopa châ ta, Manipur liata Thoubal district liata patupa châ ta, Police zy he Video a hiezawhpa tawhta a hmi he pahnopa ta, ama patu hapa châ.

He chanô pano thluahruapa ta lathlôh a chhihkheipa video vâna heta Manipur liata Kuki nata Meitei likah liata ziza a sâh via heih ta. He hmo he târi 4 Patô, 2023 khata Kangpokpi district, Manipur liata a tlôpa châ ta, Manipur liata buana â thao Noh, târi 3 nohkha ta a khô tahpa Nohta a tlôpa a châ.

He kyh liana heta, Manipur Chief Minister Biren Singh chata peihriatuhpazy cha 'Thina taihta hrie awpa' taihta sawhkhâ ta palôhrupa a tao hai, a tah.

Police zy chata he hmotlôpa kyh liana heta chyhsa parupa, sahlaota patupakhipa nata liahnycheina biebuapa rohpangiapa châ ta, peihriatuhpazy patu awpa ta Police chhao py 12 lâta pachhaihpa ta hmahla haipa a châpa hawhta reipa a châ.

Police ta he kyh liata bie a vaw ngiapa ama vaw ngiana dâhta, he hmo tlô chyta liana heta chaihrai nata Meithei nano nanopa a chabapa chyhsa 800 tawhta 1,000 rachhôhta B.Phainom khih a ngiahnaopa ta, hmozy parupa ta, o zy rao ei ta. He sahlao he Meitei py miakha ama châpa ta pahnopa ama châ.

He hawhta ama tlahnao nona heta Khihsaw hryta chapaw 2 nata chanô 3 zy cha râhhmâhpa lâ a râ ei ta. A hnôhlâ ta Nongpok Sekmai Police zy pachhapapua taraw ei ta, su a bohpa ama ngaikhei nota Meitei zawpi ta Police zy ku tawhna heta chhu ei ta, ama hryta chapaw pakha cha a su liata thie pâ ha ei ta, chanô 3 pazy cha ama chysia pahluhpa ei ta, ama hryta chanô kô 21 pa cha patupakhi ei ta, a rilâhpa, kô 19 pa ta vaw pachha â chhuahpa cha, ama thie pâ ha hra, tahpa ta FIR liata ropa a châ.

He kyh liana heta PM Narendra Modi chata, "India châta nozana, nozana lai chaimâhpa nata, chanô chôta peihriana rarô-y ngaitapa a châ" tahpa ta reikah pasa kawpa maochhie ta; Supreme Court chata India sawhkhâ nata Manipur State sawhkhâzy cha a chatliena lâta hmotlôna dâh Report pangia awpa ta a pahnosa hra.