Sports : A ei 7 n'awpa ta Sevilla ta Europa League Nyungiapa ama chalo!

Sevilla chata a ei 7-nawpa ta 'Europa League' Nyungiapa chalo heihpa ta, zâhnia zâ Final akhaihpa liata Italian Serie A club, Roma cha 'Penalty' liata ama pahnie. Puskas Arena, Budapest liata akhaihpa liana heta Roma coach Jose Mourinho ta a medal daopa zawpi lâ a pazaw pâ.

Gonzalo Montiel, World Cup Final liata Argentina ta France ama pahniena akhaihna liata goal a khôtuhpa chata Roma nahta daihti tyhpa liata nata daihti piechhipa liata 1-1 ta amâ pahniethai tawhta penalty hmâpa ta tlô viapa tluana liata, chaphie pathipa, pahniena goal khô ta; Roger Ibanez nata Gianluca Mancini zy ta Roma lâ tawhta penalty khô vei ei.

Spanish club, Sevilla heta Final ei 7 a ngiapa ta, pahniena to khai ei ta; Captain Jesus Navas a hlaohlina hmiatua chaipa kô 2006 liata Middlesbrough ama pahnie tawhna khata ama Captain sahlao heta ei 7 po Nyungiapa ama chalo ha.

Roma pahniepa ta Nyungiapa ama chalopa vâna heta La Liga liata 'Top 4' liata a hlao hra vei sala, Season heihpa Champions League akhaih awpa ta amâ chapie patloh ha tahna a châ hra.

'Special One' Mourinho ry liata hnabeiseihna asâh kawpa hneina chôta ahrapathi haipa, Italian Club Roma châta cha palôh a y khoh kaw aw. Mourinho heta European ataopasuana nano nanopa final ei 5 a tlô hapazy liata nyungiapa vaw chalo khai ha ta, Roma tlai chhao he ataopasuana thiehpa, Europa Conference League Nyungiapa a vaw chalokhei hapa kha a châ.

Europa League Final liana heta 1st Half liata Roma châta Paulo Dybala hmiasahna goal za khô ta, Dybal heta Roma defender Mancini ta ball pha chaimâhpa a piepa cha Sevilla kao lâ a chadai pangiapa ta, Sevilla kaovaohtuhpa Yassine Bounou thei rimâ lei awpa ta kao chachâh lâ a khô hapa a châ.

Châhrasala Serie A club Roma heta he ama goal khapa pabohsa awpa heta atymâna amâ tyh chaimâh, amâ tliehpasa pâ hapa hnaihta ama coach Mourinho ahlaopa ta player 14 nata coaching staff thokha cha Referee ta châhnamaihpa a chaluahthlu ei.

2nd Half amâ thao tawhta minute 10-na liata Sevilla ta si kha ama phaopa cha amâ kaw supalie ha heih hra; Navas ta chachâh lâ tawhta ball a vaw pathluahpa cha, Roma kaohâtuhpa Mancini ta taochheipa ta ama kao lâ a pangia tlamaw haw. 1-1 a châ haw.

Roma heta pahniena to awpa ta daihti ryhpaohpa ama hnei pha via tyh tarawpa ta ama vâdua zâ a châ ha ei tly, Tammy Abraham nata Ibanez zy ta ryhpaohna ama hmôpa hmâh phahnai leipa ei ta, Andrea Belotti ta Lorenzo Pellegrini free-kick chapiepa tawhta ball a vypa cha kao khôtho lâ a chapie syulyu ha hra.

Sevilla chhao heta penalty chapie angiah leipa ta pahniena to theina ryhpaohpa hnei ei ta; penalty hmô awpa hawhta amâ pachâpa cha English referee Anthony Taylor ta VAR â saohiah tawhta a dytha ha heihpa vâta chapie khao vei ei.

Minute 30 piechhipa liata minute 11 a y bâ aw tahpa liata Chris Smalling ta kaokhâh (crossbar) a luhta a su thlupa cha ziza tao chaipa tlâ a châ ha bâ.

Daihti piechhipa chhâ ta, Penalty hmâpa ta tlô viapa tluapa châ ta, 4-1 ta Sevilla ta pahniena topa ta, a ei 7 n'awpa ta Europa League Nyungiapa ama chalo ha heihpa a châ.