India State hry liata leibâh pazai chaipa Mizoram

India râh liata state hry liata kô kha chhôhta sôh ama hriapapuapa (Gross State Domestic Product) tawhta reipatipa ta leibâh pazai chaipa liata Mizoram cha â sâh chai.

Sôhsa kô (Financial Year) vaw y heih awpa liana heta dâh atlychakapa ta sôh hriapapuapa zydua tawhta reipatipa ta 20% hlâta chyh viapa leibâh hnei awpa ta state zy cha tahpa châ ei ta, atahmâ duasu liata state 31 hryta 4 zy ngâlâh 20% ry lâ ama y.

Sawhkhâ  tawhta state nano nanopa sôh duasu achupasiana (analysis) tawhta â lâzie liata cha Mizoram cha a sôh hriapapuapa reipatipa ta leibâh pazai chaipa châ ta, Punjab nata Nagaland zy ta ama pazi.

Mizoram heta sôhsa kô 2022-23 chhôhta a sôh hriapapuapa khophie hlei (53.1%) po leibâh hneipa ta India râh pôhpalôhpa liata â sâh chai ta. Punjab ta 47.6% hneipa ta a pazi.

NCT Delhi cha sôh hriapapuapa zie tawhta reipatipa ta leibâh 2.2% ngâlâh hneipa ta â hnai chai ta. Assam (27.5 %), Telangana (28.2%), Chhattisgarh (27.1%), Madhya Pradesh (28.9%) nata Haryana (28.95) zy cha 20% chôta liata ama y sahlao hra.

Gujarat (19.5%), Odisha (15.75%) nata Maharashtra (19.0%) zy cha 20% ryta liata ypa ta, state-zy he industry-liata a pahniehpa sôh lapangiana hnawh liata hmah athata ama lapa vâta a châ.

Kô 2018-liata pananopa, Fiscal Responsibility & Budget Management (FRBM) Act-liata cha India-liata sawhkhâ pôhpalôhpa leibâh he a sôh hriapapuapa tawhta reipatipa ta 60%-ta pahnai achhuahpa châ ta. Sawhkhâ kôpipa leibâh hneipa zie cha 40% ta nata state-zy leibâh cha 20% ry lâta pahnai achhuahpa a châ.