Châpaw : Chyhsa châna chhâ chaipa cha reih eima hneipa he a châ

Rohtuhpa ~ Dr. S. Hrachu (L)

Duah pachâ tua..reih he hnei vei mawh pi sala, chyhsa eima châna chhâpa y aw vei tah t’u? Reih y vei mawh sala khâpa hmah rei awpa y leipa aw ta, khizaw chhao he taona chhâpa a y lei awpa a châ. Reih a y vei khiahta cha Châbu tao byuh leipa aw ta, hla chhao y thai leipa aw ta, a phahnaina chhao y hra leipa aw ta, Siku chhao yzie hnei leipa deita a châ aw. Chavâta keimo Marapa hmâ awpa ta Abeipa ta reih eihpa khizaw hro lâ liata a y leipa, ahy ta hmahta ama hmâh beih leipa nata thei beih leipa maniah a taopa thlâh hapa a phazie nata â thuzie nata a sôhnazie he na pachâ pathu leipa vâ deita Mara reih sôhnazie pahno leipa ta pasôna châh a pahno leipa nata, a zakhei thlâh hapa chhao na châ thei ngyu aw.

Khizaw lia heta reih 6000 hlei tlai a ypa ta reih ei ta, cha hry liata eima reih he â kaw hlaopha thei hrapa a châ. Khizaw photo chyhsazy heta âmo reih athai khaipa pho kha hmahta y vei ei ama tah cha zaw! Marapa chhao pi he eima pikheipa reih athai khaipa pakha hmah y hra ma pi tahpa apahno a chhuah hra tua suh vy. Eima reih he hnotlai kawpa nata thai kawpa ta eimâ pachâ tlamaw thei aw. Reih pha kawpa, reih ru kawpa, athai leipa ta cha pahlaopahlipa ta cheih chakhyh thlâh theipa chhao châ hra sala, Hla nata Bie hmeiseihpa tlohpa châta cha ngiapâ tlâh a châ leipa a hluh kaw tyh. Chavâta eima reih he thai khai thei vei hra ei sih la, eimâ phana rakhapa lia chhâta cha â dopa ta hmâh eimâ chhuah awpa a châ.

Mohchho alyu thlâhpa ta eima pachâpa, â chhuahna anano kawpa zy, a châna dopa pahnopasia leipa ta eima pahlaopahli thlâh ha tyhpa zy vaw mohpasia laih tua ei suh vy. He hawhna heta:

1). Charua nata Chalyu alyuleina

Charua nata Chalyu cha a taotia dâh a lyu thlâh taraw ta, charua cha a chô lâ tahpa châta châ ta, chalyu deikua a ry lâ tahpa châta a châ.

2). Kuapa nata Aliepa alyuleina

Kuapa cha eimâ chhuahna su tlô hlâ tawhta kua hapa he châ ta; Alie deikua cha eimâ chhuahpa su tlô ha tawhta aliepa he a châ.

3).Pathliahpa nata Pangiehpa ananona

Pathliahpa cha a chô lâ tawhta a ry lâ za pathliahpa he châ ta; Pangiehpa deikua a ry lâ tawhta a chô lâta kaw pangiehpa/bangiehpa he a châ. 

Pamosana:  

(1). Keipa ei pathliah/ KG ei pathliah.

(2). Chhâmeih sao ei pangieh/ Hmiakhupaih ei pangieh.

4).Pie nata Chhai alyuleina

Piepa nata Chhaipa he ahmâh pahlao thlâhpa nata yzie pahno leipa ta a reih chakhyh thlâhpa chhao eima hluh ngaita hra.A yzie cha he hawhna heta a châ. Chyhsa hropa liata hmo eima hiapa vâta maniah ama piepa kha cha a saipa châ hra sala, eima hiapa vâta maniah ama piepa châ ta, maniah ama chhaipa châ vei. Chhaipa he cha saiheina vâ nata maniah ama daopa vâ nata maniah ama ngiachhiena vâta hmo maniah ama piepa he a châ. Cha cha eima hiapa vâta maniah ama piepa châ leipa ta, lôhthaita ta maniah ama piepa he chhaipa a châ.

Pamosana: Jerusalem khihthieh vâ lia yna eina chhai aw.

Jerusalem he eima hiapa vâ nata eima raihriana tha â hlao hrapa vâta maniah a pie awpa châ leipa ta, saiheina vâ deita ta pie awpa eima châpa vâta CHHAI he hmâpa achâ. Pie hlâta Chhaipa he sôh via ta, khokheina vâ deita ta chhaipa a châ. 

5). Adyhna nata Aryhna ananona

Chyhsa hluhpi ta ‘Adyhna’ nata ‘Aryhna’ tahpa he eima rei pahlao hluh kaw. Cha chata reih yzie eima chakhieh-charieh leizie a palâsa kaw hra. Adyhna nata Aryhna he miakha hawhta eima pachâpa vâta, Krisma noh liata cha eima reih hluh pachai tyh. A miakha vei tahpa â lâna cha, Dyna Bei tahpa he Ryna Beipa tahpa ta reipa Bible nata Hlabu liata hmô awpa y tlâ vei. Pamosana ta, Nôvah ama lahpinô arâpa he Lyuchâpa tuapa ta pa-awsa tyhpa châ ta, chyhsazy ta Lyuhchâpenawh kha , “Nama padyh thei ei ma?”, tahpa ta hiahri beih leipa pi ta, “Nama paryh thei ma?”, tahpa ta eima hiahri tyh ei tah t’u. Khâpa vâta maw? Adyhna cha Lyuhchâpenawh ta ama tao theipa châ leipa ta, a paryh dei ama paryh theipa a châ. Adyhna cha âmo nôvah likawh lia deita a y. Mohropazy ta taopa thai awpa châ khao vei. Chavâta Lei nata Vâ likawh liata aryhna cha Kalvary Kross liata tao khai ha ta, Khazohpa nata Adyh n’awpa deikua keimo nata Khazohpa likawh liatapa a châpa vâta, mohropa ta Khazohpa nata maniah padyhsa thei awpa he y hra vei ei tahpa he pahnothai a ngiah kawpa a châ. Miakhapa hawhta pachâ khao khah ei suh vy.

‘A ti adi’ tahpa nata ‘A ti athli’ tahpa heta khâpa â chhuah?

Achhyna: A ti adipa he cha a hawpa khoh pi ta; A ti athlipa deikua a tipa eima khoh tahpa a châ.

Hmo atipa rairie liata a kheihawhpa ma DOH tah pi ta, a kheihawhpa ma PAHRAO eima tah ha heih tly?

Achhyna: Ahawpa ahlao pâ leipa he Doh tah pi ta; Ahawpa (Sahâh) hawhpa ma ahlao pâpa maih cha Pahraopa sai a châ.