Real Madrid nata Barcelona FC akhaihna, ‘El Clasico’ tahpa ta Football khizaw ta a pahnopa he athâtih, a History a sianô viapa ta na pahno tlyma? Na pahno khoh khiah vaw reih hra tua. Football vâ deita a iekhyhna a châ leipa, El Classico thâtih na pahnopasia khiahta la a mopha na tah via heih cheingei aw.
Spanish reihta ‘El Clásico’ (The Classic) eima tah tyhpa he reipasia angiah leipa ta atahmâhlâ Football khizaw liata cha a iekhyna lai chaipa nata mopha chaipa, Real Madrid nata FC Barcelona-zy akhaihpa he a châ tahpa eima pahno khai. Athaota liata cha ‘El Clasico’ tahpa he Real Madrid nata FC Barcelona-zy ta Spanish championship amâ khaihna reina châta hmâ tyhpa châ via tyh ta, atahmâ deikua he Club mianopazy ta amâ hmiachhyna akhaihna : UEFA Champions League, Copa del Rey, nata ahropa zydua chhao El Clasico tahpa a châ khai ha bâ.
He Club mianopa a iekhyhna he khihpi lai kawpa ama châ rairiena tawhta avaw thaopa a châna kao chhao y thei hra ta. Madrid nata Barcelona-zy he Spain liata cha khihpi lai chaipa miano châ ei ta, Politics liata chhao a iekhyhna ama hnei tyh. Real Madrid he Spanish chipho thapasana (nationalism) pamosana châta hmâpa a châ nota, Barcelona he Catalan chipho thapasana (nationalism) hawhta hmôpa a châ hra. He Club mianopazy a iekhyhna he Sports khizaw liata a iekhyhna lai chaipa hryta pahlaopa châ ta; thokha ta cha a iekhyhna lai chaipa ama tah hra. Real nata Barca he khizaw liata Club hneirôh chaipa hryta khâ a hlao tyhpa châ ei ta; kô 2014 Forbes ta cha khizaw liata Club sôh saipa mianopazy avaw tah ha hra. Fans pazai rairie ei ta, khizaw kaoki to liata he Club mianopa achâhtuhpazy he a pachhaih chhiechhu ei ta. Media khizaw liata Football fans nata fans leipazy chhaota ama tlua hluh chaipa ama châ hra.
Atahmâ duasu liata Real Madrid heta El Clasico liata pahniena to hluh via chypa ta, ei 95 pahniena ama to ha nota Barcelona heta ei 91 to ha ei ta. Athletic Bilbao a hlaopa ta âmo sahlao he eikha ta hmahta La liga tawhta tla beih leipa, ‘Relegate’ beih leipa a y chhôhpazy ama châ.
Barcelona nata Real Madrid a iekhyhna he Football liata palâsapa a châ hlâ syulyu ta, Politics liata avaw thao ha ta. Club President atlyhna kyh liata chhao athata Politics â chahraoh tyhpa a châ.
Kô 1930 rachhôh syulyu liana khata, Barcelona "he Catalan chipho ngiana hawhta pahnopa nata hmôpa châ syulyu ha ta; Madrid sawhkhâ ta Spain râh ryureina ama ku liata ama hnei hluh via lymâpa cha ama vaw chaka kaw tyh". Kô 1936 liata Francisco Franco ta Spanish sawhkhâ thy awpa âchhuah nona khata, Barcelona President, Josep Sunyol, Republican Left of Catalonia, manôh nata Deputy to The Cortes cha Franco-zy ta patupa ta a chôchâh pachiana chhao y leipa ta a hrona vaw la ei ta.
Barcelona cha sawhkhâ adyuhtuhpa Franco py zy ta pahleipahlô awpa ama tahpa hryta sâkhana liata a hlaopa ta, Franco ryurei nona khata, Barcelona khihpi chyhsazy ta a ryureina siekheina dâh cha athata amâ vaw dyuh tyhpa a châ.
Miguel Primo de Rivera nata Francisco Franco ryureina daihti liana khata, chipho reih eihhrâhpa nata chipho châna palâsa theipazy cha athata vaw riepako ei ta. He daihti chhôôh heta Barcelona heta ama biepipa Motto ‘Més que un club’ (Club dei châ vei) tahpa vaw hmâh pathaopa ta, he he a chhâpa cha Catalan chipho thapasana nahta khâchâ amâ pazaopa vâta a châ.
He hleikhôna heta he Club mianopazy a iekhyhna he ‘Ultras group’ ama tahpa ama vaw padua tawhta paru via heih ta. Kô 1980 liana khata ‘Ultras Sur’ ama tahpa, Real Madrid â châhtuhpazy avaw duah heih ta, he he kô 1981 liata Boixos Nois ama tahpa, Barcelona a châhtuhpazy avaw duah heih hrapa nahta khâchâ amâ iekhyh hapa a châ. He py mianopazy he ama peihria hohna vâta pahno hlao kaw ei ta, Barce a châhtuhpa ‘The Casuals’ ama tahpazy amâ vaw duah chhi heih tawhta chhochhi cha ama likah a iekhyhna cha mei hawhta a ia via ngâpa a châ.
Chyhsa hluhpi châta cha Barcelona he "Club atypa (Rebellious Club)" tahpa ta pahnopa châ ta, Real Madrid he siezie parohpa pabohsatuhpa ‘Conservatist’ hawhta hmôpa ama châ hra.
Kô 1943 Copa del Generalísimo semi-finals
Târi 13 Chhiepa 1943 liana khata Real Madrid ta Barcelona cha 11–1 ta the Copa del Generalísimo, atahmâ ta Copa del Rey semi Finals 2nd Leg liata vaw pahnie ei ta. 1st Leg, Barcelona tlyliah Les Corts stadium, Catalonia liata Barcelona ta 3–0 ta pahniena ama to hra. Madrid ta 1st Leg liata goal thôh a ngiapa zydua he referee Fombona Fernández tao pado leipa sai, tahpa seisia ei ta; Barcelona achâhtuhpazy ta akhaih chhôh zydua Madrid eilawna châta pyury ama papuapa chhao cha Referee Fombona ta a pasai awpa châ vei, tahpa ta ama seisia hra. He tawhna heta cha Madrid liata Barcelona pahniena tona dâh cha a do vei, tahpa ta ama patâhsa lymâ haw. He chôchâh liata Barcelona player Josep Valle chata : "DND nata ABC thâtihbuzy ta athata haipa bie roh ei ta, Barca reipachhiena athata rohpa ta, he heta Madrid fans-zy ru athata a pachhôpa ta â lâ"vaw tah ta. He hawhta a châ nota Real Madrid kaohâtuhpa parohpa Eduardo Teus chata thâtihbu liata : "Barca tlyliah khata Madrid kao lâ sino ryh pachie ha ta, sithôh ama khôpazy kha â do kawpa ta ama khôpa y tlâ vei" avaw tah heih hra.
2nd Leg akhaih awpa chyta Barcelona fans-zy cha Madrid liata akhaih mo thei lei awpa ta pakhâpa châ ei ta. Second leg athao chyta liata Barcelona team-zy cha Hotel tawhta Bus ta ama vaw puana liata alô nata hmohropa hmâpa ta tlahnaopa châ ei ta. Barcelona striker Mariano Gonzalvo ta he hmotlôpa chôchâh a reina liata cha, "Eimâ khaih pathao n’awpa minute 5 a y bâ aw tahpa liata eima kao chaby cha phusâ thuapa ta a bie ha."a ta. Barcelona kaohâtuhpa Lluis Mir ta a kao chhao vaih phathi ngâh leipa ta, kao tôh likah liata â kei dua patawnah ta alô ta athata ama vaw tlahnao ha heih tyh. Francisco Calvet ta a reipachhuahna liata cha, "Reds! Alapa-eih khohpa!tahpa ta athata awh ei ta... chhiehra-ô sâkha chhochhi ta cha Sospedra khai daihmâ ha ta, chhei vei chhochhi mawh sala cha a thi thei aw. He zydua he achhuahnoh chhieliepa ama lyu kaw."a ta
Real Madrid ta thlaita 2–0 ta hmia a sahpâ ha ei ta. Goal thôhna he Barcelona player Benito García ta Madrid player Calvet a papao tawhta khôpa châ ta. Madrid heta minute 31', 33', 35', 39', 43' nata 44'-ta goal za khô lymâ ei ta, 8–0 a châ haw. 1st Half chhâ ta, Barca Player-zy ta 2nd Half akhaih khao vei ei, tah haw ei ta. Châhrasala, akhaih awpa ta khâchâ biepiepa ama châ hapa vâta akhaih heih ei ta, 11-0 ta tlô leipa ta, 1st Leg nahta pahlyhpa ta 11-3 ta Madrid ama tlô hapa a châ. Kha akhaihna kha atanoh taihta reihpapuapa châ ta, kha tawhna khata ama likah a iekhyhna he a ia via pachaih ha heihpa a châ.
Club mianopazy a iekhyh viana châ heih awpa ta Alfredo Di Stéfano ta kô 1953 liata Barca ngai leipa ta Real Madrid a ngai hapa kha châ ta.
Kô 1950 rachhôh liata Alfredo Di Stéfano vâta ama likah liata a iekhyhna he a paru ngaita kaw. Di Stéfano he Los Millionarios, Bogota châta akhaih ta, Barcelona nata Real Madrid ta lapangia achhuahpa ta ama tei rairie. Real Madrid nata Barcelona heta athata achhu ei ta. He Club mianopazy heta Di Stefano Registration ama hnei rairiepa hawhta â reih ei ta. Buana a y haw. FIFA representative Muñoz Calero avaw chahraohpa ta, Club mianopazy ta Di Stefano he Season eikha lymâ amâ vao pari tyh aw, tahpa ta paryh ta. Barcelona ama palôh a tlâh thei leipa vâta Di Stefano he Real Madrid ta ama la haw. He heta amâ iekhyna a parusa via lymâ haw.
He tawhna heta cha ama likah liata a iekhyna ia via lymâpa ta, târi 5 Khihpa 1968 liata Copa del Generalísimo final, Santiago Bernabéu liata Barca ta Real Madrid 1-0 ta pahnie ei ta. Referee ta a tôna dâh vâta ama hiehâhpa ta, Real Madrid achâhtuhpazy ta akhaihna chhâ chyta Referee nata Barcelona player-zy cha chhiehra-ô ta ama vawh lymâ ha heih. He akhaihna liata Referee Antonio Rigo â châhpa hawhta bai ei ta. He heta a iekhyhna ziza a pa-ia via lymâ haw.
Kô 2000 liata Luís Figo ta Barcelona tawhta Real Madrid a ngai nona khata a iekhyhna ziza pa-iasa via heihpa châ ta. Club mianopazy likah ziza cha a sah via lymâ ha heihpa a châ.
Real Madrid nata Barcelona Club a iekhyhna heta Football khizaw athata chalyu via lymâ thlyu aw.
No comments