LÔMAOH DAIHTI

~ Fc. Henry, Siaha

Biehmiapa

He khizaw chhiesana râh, khohleikhona nata aohraohna ta bie thlâh hapa, aleipazy lei lao ei ta, alaipazy ama lai laona râh lia he hmô ta, a chhôh liata charei hra awpa cha khoh tiarâh va na. Anodeikua cha, ei nâ chata khizaw noh khaihpa ei hmô hra cheingei awpa cha na khokhei kawpa ta thapi phiapa ta nâ zeih ta, a rie chhao a thei kaw. Khazohpa ta Adâh nata Ivyh chhie a sa hapa kha khâ athei thlâh hana chôta ei nâ ta na sâh papua awpa â chhuahpa cha ei tha hneichhôhpa zydua papuapa ta khâ achhâhparai hra na ta, anodeikua cha nô sâhpi eikha dâhdei chhao pazy mâh leipa tha nata nôhrâhpa tha cha avaw hlie kaw ta, ngiaroh kawna chô chata rietheina râh khizaw cha ei vaw tly ha hra. Châhrasa la ei palôtlâh lei zie palâsana châta ei mo cha châra ta padeih khoh tiarâh leipa na ta, thata cha chaimâh na ta.

Chhâhchabi thiehpa

Tho vi lei, alô vi leipa cha Hiahvânô byhnâ topa ta, ei thla nata nohzy chhao cha vaw hluh via laih hra ta. Ei nâ nata ei pâ chata khizaw thaina nata sonazy achu hra awpa ta viahpa châdi na pachusa ha hra ei ta. A- py nata B- py cha ei Pass pa chhao apahno hmâ leipa ta, py khana cha achu thlâh ha hra na ta. Kô chhâna Result vaw pua ta, zâlâ pati eima nieno ta ei ngiarohpa hawh tlaita ei pâ ta ei Result cha na hiahri ta, chatawh cha ei Result reih awpa ei ngiaroh tu hapa vâ chata thata cha chaimâh na ta, na pangâ via ei ta, ei chapa tlao paro via rili ta. Ei pâ chata cha leipa ta ei Result cha chho awpa ta reikah nai kawpa ta ei na thlyu vâ chata athlachhie kawna chôta ei Result cha reih papua ha na ta. Chatawh cha eima chhôhkha dua chata thata na pahneisao ei ta, kei hra cha ei kâchiepa vâta nata ei nozapa vâ chata thata cha via ngâ kaw heih na ta, ei pâ ta cha khao lei awpa ta nata 1st Divition, 1st Possition liata ei Pass vâta Awti nata Rs.1/- na pie awpa ta bie ei nâ taih tawhna chata ei chapa chhao cha ngâh ha na ta. Tlai chuh, Lômaoh daihti lia khata cha Rs. 1 hlâta Rs. 3 ta hmo ahluh via â chalei thei tahpa ei pahnopasia kawpa vâ khata 1st liata Pass pa hlâ khata cha 3rd liata Pass awpa kha tlao ei khoh via vâta a châ.

Achuna asâh viapa liata Lômaoh hro

Saku tlô patoh awpa kha eimâ chhuah hleikhô ta chapaw nah eimâ patahtheisa chaina kha thlalâ kaina eima hnei theipa kha a châ. Chano nah chaopasyry mo n’awpa ta hmâ tyh pi ta, Class chhôh liata chano nah chaopasyry rôh kha eima reih papua heih tyh. Kha daihti lia kha cha Thlalâ kaina kha atahmâ hlâ ta Internet nata Facebook tawhta Sex Video nata Link hmâpa ta chanô nahzy thâ apachhiena nah heta chi â chhihna kha a hlie tu thlyu vei aw.

Saku lâta Thomawtaw achei awpa hnei papha hapazy kha cha thata panaopapa tyh pi ta, lâpi chhutla lâta buakha chhâ kiah hr’awpa hnabeiseihpa khata nohsa nata vâsua chhao pachâ leipa ta, hnati nata mathlaiti chhaota eima tôh lymâ tyh. Kha daihto nota Saku lâ achei awpa Thomawtaw hnei theipazy kha cha atahmâ hlâta College kia n’awpa ta R15 Bike ahneipazy hlâ heta ama sôna kha ahnai via tiarâh veih ei.

Saku apahâ daihti vaw châ ta

3rd Term a ezâh khai pi ta, liahsa Result a pua ha tawh kha cha tao awpa hropa y khao hlei leipa ta, viasa sahlaozy chhaota thopahrei pakhy awpa kha eima palôh liata y chaipa tlâ a châ tyh. Eima viasa chanô nahzy nata eima siekhohpa eima thapawh tyh zie nata hmihpha eima tahpazy nata apahruapa ta, liahsa lâchao chhaota thopahrei eima pakhy khoh tyhpa chhochhi kha cha atahmâ hlâ châ mawh sala cha Restourant liata kyh apachâ kawpazy ta Dinner ama nie khoh tyhpa hlâ heta eimâ lyna kha ahnai via tiarâh vei. Eima pakah ta khâpa bie hmah reih hra vei ei sih la, eima pachâna palôhrupa deikua âhmô thai kaw tyh hra.

Akhaihpa eima pasô kaw tyh zie kha

Atahmâ hlâ ta English Preamier League nata League hropazy he pahno mâh tiarâh leipapi ta, Fifa World Cup deikua kha cha eima pahno kaw. TV a sôh kaw chy no a châ vâ khata chyhsa O lâ World Cup moh awpa ta eimâ thaopa kha eima Siliper a lei awpa chipa ta eima ku liata liahsa apaky khai ha tyh pi ta, sao daihti a châpa vâta reikah chhiepa chhao eima dao hluh kaw tyh hra. Anodeikua cha akhaihpa pua chy ta TV Antena pahieh chhyh awpa abyuh heih tyhpa kha la a bua kaw tyh hra tlai. Siaha liata Football akhaihpa a ypa rai rai kha moh cheingei awpa khoh tyh pi ta, akhaihpa mo awpa khata atahmâ hawhta Auto Fair nata Pocket Money ta miah pakhâ thei leipa ta, sao daihti liata chhâmeih rao chiehpa kha pazô khai chiehpa ta eima chaopasy byh pua kawpa liata akhô pi ta, sao daihti leipa liata cha College vaih tawhta thothu sâkha achaba pâna chôta athao pi ta, New Colony liata Toffee ama taopa nata ri pi ta, hmohropa rai kha uahva khao ma pi.

Anodeikua cha Fifa World Cup hlâ khata Dawbeih kha 3 pa apacheisapa ta Football eimâ khaih tyhpa khata eima palôrie a pathei via tyh. Eima richâhpazy hry liata Football hnei thei hapazy ta eima rie miah ama pathei tyh zie kha reih khohpa chhao châ vei. Football ahneituhpa khata Dawbeih kha 3 pa kha achhu awpa ta papua tyh ta, anodeikua âmo Team ama tlô lei awpa alyu ha khiahta cha pao ta, apalôh athei leipa apachâsa ta, akhaihpa eima pachhâsa chhyh hapa vâta kha Dawbeih kha 3 kha py hropa châta to awpa aru zie kha rei thai awpa châ tlai vei. Atahmâ taihta kha Dawbeih kha ato theipa y mâh leipa ei ta, a yna chybiapa deikua pahno thei awpa châ khao vei!

Krisama roh liahsa a pahnâh ha bâ

Keimozy châta cha Krisama he a sôh pachai khiahma ei tah tyh. Bei thiehpa vaw pih awpa hlâ khata chysia thiehpa pa khata eima palôh liata bie reih via tyh ta, achhâpa cha kôkha chhôh liata chysia thiehpa eima hnei theina daihti y chhôhpa a châ vâta a châ. Chysia Quality pha kawpazy khata eima palôh liata bie reih hlei leipa ta, unawhta chysia alyupa eima hnei theipa kha tlao eimâ lyna chaipa a châ hri. Hiatliana nata khohleikhona palôrupazy khata keimo liata su to papha tiarâh vei. Pheiky phapa nata apua thiehpa tahpazy kha pachâ papha tiarâh leipa pi ta, Nike nata Adidas Company-zy chhao pahno hra leipa pi ta, Pohpheiky râhpa eima hnei theipa khata râh hropa nata su hropa chhao uahva hlei hra ma pi. Kha daihti liata Pheiky pha chaipa nata alâluah chaipa cha ‘Kungfu Shoe’ kha a châ. Bruce Lee –zy ta amâ ky tyhpa hawhta reipa a châ vâ khata viasazy nata apabua ha ei sih la, “ O lâ pheiky vâ ky ha tua sah y.” miah ama tah ha khiahta cha hawti via hmahta châ hrasa la, pheiky â ky chhôhta aru lâta adi awpa kha eima tao para awpa y chhôhpa tlâ a châ. Lômaoh daihti lia khata cha Kungfu athaipa hlâta cha Kungfu Shoe kha chi via pi ta, eima pasâhsa via hra.

Mylâ Krisama a châ bâ aw tahpa zâ liata eima nôpawzy ta “Atazâ la o liata vaw y ha ula, namâ ziana luhchô dady chyu liata Dawhrâ âkhu lâ ta vaw soh chyu u la, namâ mô chhôhta Krisama Paw ta hmopiepa a vaw soh aw.” miah tah ei ta, thathyu kawpa ta eima unawh zydua ta siphiah liata azia pi ta, amylâpa ta eima Dawrâ chyu liata Krisama Paw ta hmopiepa a vaw soh thlâh hapa eimâ ly zie nata no-âh eima tah zie kha chhopasia thai awpa châ vei. Eima nôpawzy cha khizaw liata hmo taothei chaipa hawhta eima pachâ chyuna Lômaoh palôhru pathaih kawpa kha a sôh kaw dia.

Eima opa liata keima hlâta uhtheipa he y ta, Krisama daihti liata Police Uniform âkipa ta chaleipa tyh ei ta, my chareih ta Solute ei pie leih khiahta cha a Pistol nothlahpa ta ka thlâh ha awpa ei châ vâta mydi ei thyu patoh tyh zie kha my khao aw va na.

Bieh nôhkhawpa

Tlai chuh, kha lômaoh daihti khochhihpa kha ei pachâ châhta la daihti khô chiehpa lôh lia vaw thieh heih ta, khiahlôh amô chiehpa ahra heihpa ta, sihnô kua thai khao lei awpa angiepa ta hmia lia meithâhpi azawh ta, mo lia zomyh hawh deita eina tikhâh heih tyh. Khâpa hmah pachâpahria leipa ta nata lôh lia paveihpa y tlâ leipa khata nolychhiki ta lômaoh daiti kha ahmâh pi ta, he khizaw riethei pachârôhna nata khihsa tôhtunazy heta lômaoh pachâna kha patypamâ tlâ leipa ta, khohleikhohna nata aohraohna chhaota lômaoh chhôsoh lia kha su raita to vei. Abeipa byhnâ topa ta lômaoh daihti cha pasaih lei kawna chôta khô ha pi ta, lochona daihti phapa chhao eima hmâh ha heih bâ. He daihti khochhihpa chhao he meikiah hawhta lopa ta eima khôsai heih hra aw, cha daihti lia chhaota lômaoh daihti deikua kha cha lôh lia my a ru kaw bâ aw.

(He Châpaw he Board of Mara Literature ta Châpaw Arohpasuana apachhuapanohpa liata Sânona lymâ adaopa a châ)