MARA REIH HE A LEI THEI NATA NA PANGIASA MA?

~ Beihrua Lôdua

Marareih he a lei thei nata na pangiasa beih rai ma? Vaw lei hâ sala khapa vâta e a châ nata na pangiasa? Achhyna cha, Marasawzy vâta marareih he a lei thei aw...

A pahnopa nata a thaipa zy hluhpi y ei ta, mara literature liata eima pachy kawpa hluhpi chhao ama y tahpa ei pahno. Amo zy sahlao heta rei via ei sala cha kha tlu ta ma a pha va i? Keima mara literature liata hniehnô sâkha dâdei chao a tao thei leipa, literature liata a thabypa chhao hmahta a tlô mah leipa zy tlai ta ei vaw rei hrapa hela ei kâ a chhie kaw. Châhrasala, amo zy sahlao pahaona nata riapha viapata ama sie thei nawpa ta rie na vaw pachâpa ei sala tahpa deikua ei khoh ngaita kaw.

MARA REIH NATA KEIMA: 

Siaha khihpi liata Marareih ta Magazine nata Daily Newspaper zy a pua phathipa a y tlâ leipa kha ei vei chaipa nata y thei sala tahpa kha ei khoh chaipa sâkha a châ tyh. Marareih tha pasana vâta ao phapa nata music thaina rai ta a hnei leipa tlaina he ngâh lei kaw na chôta Gospel Outreach Ministry (GOM) liata ei ngia hra. Buakha cha GOM ta Gospel monthly magazine CANDLE cha vaw papua pi ta, eima thapaw kaw hra sala sôh rairuna vâta pazao thei khao lei pita, i kaw hra ei sih la eima chalih sai ha heih. 

Daihti vaw sie via heih ta Marareih cheingei ta Daily Newspaper pua thei sala tahpa khoh pasa tuna vâta viasa zy ngiachhiena a haw laih pata Deiva Daily newspaper cha kô 2 dua tlai eima vaw siekhei hmâ hra. He chhao he sôh rairuna vâ pyly ta pazao khao leipa ta eima pahâsai heih. 

He chhôh liana heta taka phusa lâta cha leikhaoh chapaopa tlai eima châ. Eima viasa sahlao ta athôna cha rei lei pata eima hnei tlakaipa zydua chhao pachhâ khai pata leibâ chhaota Deiva Nochareih thâtihbu cha eima chalih sai ha heih. Chanota, alyna thata na pahneisapa deikua cha he Deiva eima vaw papua tawhna khata marareih chôchâh liata mara zawpi zy thata eima vaw hrâ tahpa ei pahno papua, keima mo pakha liata alyna thata na pahneisa hra.

BO Chipho duasu:

India râh liata a ypa Nicobar & Island liapahlô liana khao ta BO chipho he y ei ta, hmialâ liana kha cha chipho hluh kawpa ama châ hra. Pasana hri vâta Potlana tha ta tlô ta, chyhsa hluhpi ta thina lytlâh ama khô. He hlâta a pei via heihpa cha, kô hluhpi khô pata chhâ hluhpi a vaw thyu, cha nota BO thyutlia zy cha chihropa reih pasâhsana a lai kawpa vâta ama reih cha hnôhchhy lymâ pata achhâna liata cha amo BO reih a thaipa chhao vaw y khao vei ei.

Kô 2010 pa liana khata BO reih a thai tlakaipa nô machâ pakha y ta, a moh cha Boa Senior a châ. Ano hra cha nôpi pi châ ta a hrona ta a daih khao lei tawhta cha kô 2010 pa khata thina lytlâh a khô ha hra. Chatanachata, amo râh liana heta BO chysa zy cha y hra ei sala ama reih ama thai tla khao leipa vãta BO chipho cha khizaw chipho rohna châbu tawhta thypa ama châ haw tahpa India thâtihbu liata papuapa a châ.

MARA CHIPHO HE ZAW?

A thai viapazy ta ei hluhpi reih ha ei ta, kei chhao reih chanei viapa ei khoh hra, Marareih he a lei khiatala marasaw vâta a lei aw tahpa hih. Reih hropa eima hmâh khohpa vâta marareih cha chihropa reih ta pahlao pahli pathao ha pita, he heta marareih he a zyh zyh ta ta a padâhsa via lymâ aw ta a chhâna liata cha a pahlei tla vai aw.

Chhâ vaw sie lymâ aw ta Mara chipho he maluh hluhpi y hra ei sih la, MARAREIH a thaipa ama y khao lei khiatala Mara Chipho he khizaw châbu tawhta thypata eima y hra aw tahpa chi a chhi ngaita kaw. Atahmâ no bawlaw hmata Marapa châ tlóh ta Mizo nah khih liata ama pahrâpa vâta Marareih thai khao leipa ei ta, ama Mara châna a lei pathao hai ba.

Marapa chyhsa liana heta mara sapa nata thisaih he bie pata khô pathla ngâ hra sala, Marareih ama thai tlóh leipa khiatala ama identity a lei thlah pyly aw. 

Marareih pabohsa thei nawpata atahmâ tawhna heta pasôh via pata cheih hluh via sih la, hmâh hluh via lymâ suh vy