MARA UNAWH ÂPAHLEI HAWPA NATA ÂTHY HAWPAZY EIMÂ UNAWH HAW HEIH

- Rev Dr Laiu Fachhai

(He châpaw (article) he na rei khai haw khiahta cha chi nata râh kyh a pachâpa pakha na châ hra.)

Ryuto vâta tlyma, lapinôzy vâta tlyma, lapinô nôpawzy vâta tlyma, sawnawhzy vâta tlyma, khisawzy vâta tlyma nata pachâ dâh nata kho dâhzy a lyu leipazy vâta chhaota unawhzy likawh liata a-eichhiana nata ahryuchhianazy tlô thei ta, atudaina nata unawh âthyna taih chhao a tlô thei hra. Unawh he â vaw pahlei thei hra. Su nanopa nata râh nanopazy liata rei pi pahrâ nano hawpa vâta unawh ama châna â pahno khao leipata katu-kamâhpa mo ta â moh thlah ha bâpa unawh â pahlei hawpazy rei awpa ama y hôlô. Atanoh khizaw râ nanopazy liata a pahrâ ngâpa Marasawzy pi he unawh âpahlei hawpa châ khiah pi maw tah thei’pa duahmo liata a dua ngâpa lyu pi ta, a châh ta cha unawh âthy hawpa eima lyuna chhao a y tyh.

Ahyzy ma chahawhta â pahlei hawpa Mara unawhzy cha? Mara reih liata mahchha lâta a pahrâpazy cha Khâkhaih-mo za tah tyhpa châ ta, mahthi lâta a pahrâpazy cha Mara-mo tahpa ama châ tyh. Chhaongai-Hnaro kao tawhta chho lâta apahrâpa Chapi-Ngiaphia kao lâ he Mara za tah ei ta, Chapi-Ngiaphia kao tawhta Zyhno nata Hawthai kao lâ Mara za tah pachhuah heih ei ta, Zyhno nata Hawthai kaozy tawhta Tlôsai-Siaha kao lâ Mara za tah pachhuah heih hra ei ta, Tlôsai-Siaha-mo ta Rakhai (Rakhine) nawh Mara ama za tah pachhuah heih. Chahawhna hra ta, Tlôsai-Siaha kao tawhta maw lâ (mahchha lâ) ta apahrâpa Zyhno nata Hawthai kao lâ cha Khâkhaih kaw tah tyh ei ta, Zyhno nata Hawthai kaozy tawhta Chapi-Ngiaphia kao lâ Khâkhaih kaw tah pachhuah heih ei ta, Chapi-Ngiaphia kao tawhta Chhaongai-Hnaro kao lâ Khâkhaih ama kaw tah pachhuah heih. Chhaongai-Hnaro (Lyutu) kao tawhta mahchhâ via lâ (Hiakha-Thlatlâpa, etc zy) cha Khâkhaih ama kaw tah pachhuah heih. Rakhai nawh ta “Mara” tahpa rehkah hnei khao leipa ei ta, a yzie cha Tlôsai-Siaha kao tawhta mahthi lâ liata “Mara” tahpa nata “Khâkhaih” tahpa reikah ahmâhpa chipho y khao veih vei. Chahawhna hra ta, Chhaongai-Hnaro kao tawhta a mahchha via lâ “Mara” tahpa nata “Khâkhaih” tahpa reihkah ahmâhpa chipho y khao veih ei.

He khaihna tawhta mopata, “Mara” tahpa nata “Khâkhaih” tahpa reihkah ahneipa nata ahmâhpa chiphozy he Marapa chipho, Mara unawhzy cha eima châ, tah sih la rei chhei aw ma pi. “Mara-Khâkhaih” vaw tah awpa châ taraw ta, “Khâkhaih” tahpa pahlao hlei leipata “Mara” tahpa sai ta hmâpa a vaw châ haw. “Mara” tahpa yzie chhopasiana hluhpi a y. He rohtuh pachâ dâh liata deikua cha “Mara” tahpa he “chho” (southerner) reina châ chai sa la ei pangiasa. Mara reih he eima mahnô-mahpawzy kha ta Chhainâ chho nochhi (south-east China) liata ama pahrâ no tawhta chei pathao hawpa châ sa la pangiasa a chhih ta, chho râh panyu pha tlua ta ama za sie laihna daihti liana kha ta, “Mara lâ na eima sie aw” za tah tyh ei sa la pangiasa â chhih. Cha ta, chho râh lâta zâ sie laihpa zydua cha Marapa lâta eima kaw pua haw ei aw. Chho râh lâta zâ sie hra leipa Hiakha-Thlatlâ nata mahchha via lâta zâ ngua hawpa eima unawhzy deikua cha Marapa châ thai awpa châ khao vei, Mara (chho) râh lâ ama za sie hra leipa vâta.

Hehawhta “Mara” tahpa nata “Khâkhaih” tahpa reihkah ahneipa nata ahmâhpa chiphozy he eima reih eimâ thei khai. He reih â thei khaipa chiphozy he RA Lorrain ta chi khapa nata reih khapa eima châzie asiapata hmô ta, Marapa (Lakher) chhôh liata maniah patlôhsa khai ta, mission sâkha ry liata reih kha hmâpata chakao awpata râh-ri taopata â pahawh. Cha Mara unawhzy cha rei siezie nata a kao nata a kâh siesie zipata hly lai kawpata hly charu â pachhaih thei: Tlôsai-Siaha Mara, Zyhno-Lialai-Heima Mara, Lochei-Hawthai Mara, Chapi-Ngiaphia-Saby Mara, Vyhtu-Leita-Iahbao Mara (Haka reih ta “Zophei”) nata Chhaongai-Hnaro Mara (Lyutu Mara). Thokha ta cha a kawh via heihpata Saihthâh (Sôhkhao, etc khihzy) nata Azyuh (Razao, etc khihzy) chhao Mara chipho liata ama pahlao hra. Saihthâh nata Azyuh kaozy rei pâ leipata hmahta he Mara chipho hly charupazy maluh he atanoh thysy no daihmâ a châ aw.

He Mara unawhzy he British sawhkhâ ta India nata Myanmar (kha daihti ta Burma) ta maniah a pachhaih hawpa vâta unawhzy eimâ pahlei pathao laih lymâ. A châhta cha unawh âphleipa chhao châ leipata, â thy hawpa eima lyuna daihti chhao a y tyh. Eima puhpa nata parâhpazy tlai cha katuh-kamâhpa mo ta mopata “Bâramâpa”, “Eidepa” eima tah bâ. Myamnar râh lâta Marapazy cha India râh liata Marapa hawhta sôh kyh liata Central sawhkhâ zawh chatlupo ta zi awpa ama hnei leipa vâta ama sipasa riethei kaw ta, India lâta ama unawhpa Marapazy hnohta ama zâ hlao tyh. Râh rietheipa liata a ypa ama châpa pahnokhei thai kawpata a dao kawpa nata a ngiachhie kawpa hluhpi ama y nota, thokha deikua ta cha ama unawhpa ama châpa ama pahno khao leipa dei châ leipata ama unawhpazy cha thy ei ta, ama za zuaoa awh, vao, mie, seih, satlaw, aoh-mâ nata ahropazy chhu ei ta, pachhiparypata a tu chhao ama tu pâ tyh. Thokha heihta amâ hlaona mâ a phathipata pie leipata ama dôvei tyh. Khahawhta Bârâmâpa tahpata India liata ama unawhpazy ta tu ei ta, ama hmo chhu ei ta, amâ hlao mâ pie leipata ama dôvei hawpa Myanmar Marasawzy kha atanoh cha molaipa nata hneirôpa, awnanopa chhihtuhpazy kaw châ hôlô bâ ei ta, India lâ ama zâ hlao tyh nota mohnaona nata rairuna amâ tyh tyhpazy kha Lialaipi, Sabyhpi, Ngiaphiapi, Yangon khihpi, Haka khihpi, America, Australia nata ama pahrâna râh su nanopazy liata phôhpa hawhta ama rei tyh.

A châ tlai, kha zydua kha phôpa hawhta ama châ khai haw. Atanoh la khahawhta châ khao vei; a pha kaw bâ. Unawh â pahlei ta a vaw thy tlamaw hawpazy a hmôpata a unawh pathi haw heih bâ pi ta khiahlôh a tlâh ngâsâ thlah ha bâ. Bâramâpa, Eidepa a tah khao leipata Nochhi Marasaw, Notla Marasaw tahpata a tlaichhai kawpa nata a pasô kawpata eima zao pha ngâsâ haw bâ. Hehawhta a châ awpa rai na a châ. He khizaw kawh ngaitapa liana he ta Marapa hropa y leipa ei ta, keimo Notla (India), Nochhi (Myanmar) nata Diaspora (khizaw hropa lâta a hie patlapa râh hro Mara) Marapasawzy deita he Marapa chipho a y chhôhpa cha châ pi ta, keimo nata keimo eimâ pasô vei khiahta cha maniah a pasô hro awpa y khao veih ei. Atahmâ khizaw geopolitics duahmo mopata râh (nation-state) sâkha chhôh liata y khoh heih thei nawpa la a rairu kaw chy aw. Chipho miakhapa eima châpa hawhta eima pahrâna râh sawhkhâzy pasaina chhôh liata azaona phapa hnei lymâ awpa deikua eima chhuah lymâ awpa a peimawh kaw. Cha ta leipata la unawh a pahlei tlamawpata eimâ thy tlamaw heih aw!

British sawhkhâ kha ta Mara râh he India nata Burma ta a pachhaih hawpa dei châ leipa ta, Myanmar liata cheingei chhaota Vyhtu-Leita-Iahbao (Zophei) kao nata Chhaongai-Hnaro (Lyutu) kaozy cha Marapa tawhta la nano ta, Zophei circle nata Lautu circle tahpata a eihhrâhpa ta a padua haw. Cha ta Miram (Mara) circle, Zophei circle, Lautu circle tahpata Marapa cha a pachhaih haw. He pachhaihna zie he Myanmar sawhkhâ chhaota zi pazao ta, Mara unawhzy eimâ pahlei via laih lymâ. He vâna he ta atanoh Myanmar râh liata Chhaongai-Hnaro (Lyutu) nata Vyhtu-Leita-Iahbao (Zophei) kaozy liata Marapa thokhazy cha Marapa hawhta a pachâ khao veih ei. Hehawhta unawh â pahlei hawpazy â hmô heih ta, unawh eima châna â pahno heih ta, eimâ pasô heih thei nawpa ta, Mara opi, Mara Autonomous District Council (MADC) ta hmah a la awpa a peimawh kaw. MADC chhihthana ry liata Notla-Nochhi Marapa MTP, MSO nata MChP zy chhaota hmah la hrapata Zyuphieh (Zophei) Mara nata Lyutu Mara kaozy nata parawkarâ nano nanopazy patohpatia khoh lymâ theipa châ sa la, azaona pha viapa y aw ta, unawh â pahlei hawpazy a hmô heihna nata a pôhkha heihna lâta chhao â chhi thei aw. India râh liata Mara râh nata Marapa thokha chhao (Paithâ kao nata kao hropazy) eima unawhpa Lai nawh râh lâta baipa a châ haw. A pei kaw, tah hr’ei sih la tao pathi thai awpa châ khao vei. Eima unawhpa ama châzie khâ a thei ta, Paithâ mozy, Botlâ, etc mozy he pasô ta abyuhna hawhta eima deichhy lymâ awpa he eima tao thei chhôhpa a châ bâ.

Achhâna liata, eimâ pahlei heih tlamaw lei nawpa nata eimâ thy heih tlamaw lei nawpata pahno awpa nata tao awpa sâkha sâno a y. Atanoh khizaw zydua liata a ypa Marapasawzy ta khihpi eima hnei chhôhpa cha Siaha khihpi he châ ta, chavâta he khihpi lâ he Notla, Nochhi nata Râh hro (Diaspora) Marasawzy ta ama vaw ngai lymâ aw. He he hmo phapa a châ. Siaha khihpi he Mara reih cheina khihpi pachâsa lymâ awpa ta, he khihpi liata a pahrâpazy hry liata Marapa eima hluh chai lymâ awpa a peimawh. Chahawhta a châ nota pâtie pawliti vâta tlyma, awnanopa atlyna pawliti vâta tlyma, awnanopa py pawliti vâta tlyma, hiatliana vâta tlyma, mohnaona nata pathlua pa-ina vâta tlyma, eima unawhpazy hmahchhah tei tlamaw ta, thy tlamaw ta, chi hropazy kei tlamaw nawpa a nao kaw. Chahawhta eima hro daihti liata cha eima unawhpazy Siaha khihpi nata Maraland puasai lymâ aw ei ta, chi hropazy ta Siaha khihpi nata Maraland lâ a vaw ngia lymâ aw ei ta, Siaha khihpi he Mara khihpi a châ khao leina daihti tlô thei aw ta, Maraland liata Marapa hlâta chi hropa ama hluh viana daihti chhao a tlô thei aw. Siaha khihpi he Mara reih cheina khihpi a châ lymâ thei nawpata nata Maraland he Marapasawzy râh a châ lymâ thei nawpa ta, Mara unawhzy keimo nata keimo â tei leipata eimâ thy lei awpa a byuh. Cha dei châ vei. Nochhi Mara râh lâ tawhta Notla Mara râh lâ a zâ paihpa chhao y pazao chy thei aw ei ta, Myanmar râh a vaw pha laih tita cha Notla Mara râh tawhta Nochhi Mara râh lâ apaihpa chhao ama y laih thei hra aw. Nochhi nata Notla Marapasawzy râh hro lâ (Delhi, Malaysia, Australia, USA, etc) liata eima tyh laih thei hra. Khataih su lia rai châ sa la, unawh eima châna khâ a thei ta, a pasô ngaita ta eimâ pôhkha laih lymâ awpa a peimawh ngaitakaw.