NICK VUJICIC : SASYH A PAHNIENA

Nick Vujicic he Dushka nata Boris Vujicic likah liata kô 1982 liana khata Melbourne, Australia liata vaw pih ta. Hawsaih hri-iah pathaih kawpa a châ tarawpa ta, Nick heta ku nata phei deikua hnei vei. Unawh pano Michelle nata Aaron hnei ta; athaota nota cha Nick he Victoria state dâhpipa ta hawti sovâh kawpa a châ tarawpa ta heih-lyupa hawtizy kiana sikua liata pakiasa awpa â ryh tah leipa ta. Anodeikuala, Vujicic he he dâhpipa pananopa a châ tawhta heihlyupa hawtizy kiana liata heihlyu leipa a kiah tua chaipa a châ. Anodeikua, siku liata hawti hropazy ta athata pasipasawh tyh ei ta, he heta ano liata sasyh a hmô pahnaina athata a pahneisa hapa a châ. Kô charie a châ nota anosasyh hrona la awpa

achhuah ta, kõ hrawh a chã nota ngai asina ti a opa liata anysao awpa âvaw chhuah hra. Châhrasala, a nô nata paw kyh a pachâna chata a hrona la lei awpa ta pasyuna a pie ha heih tyh. Ano tlaita a reina liata, "Khazohpa ta hmopha viapa â chhuahnohpa hawhta a pahnona nata hnabeiseihna chata thina tawhta a pachha ha heih tyh" a ta.

Nick heta Khazohpa hnohta athata thlahchhâpa ta ku nata phei pie awpa ta hiah tyh ta; a châhta chhochhi cha Khazohpa hnohna heta, a thlahchhâna hlao a patloh lei khiahta la a hrochhôhta reithai khao aw vei, a tah pâ ngâkaw. 

Khazohpa ryraona dâh deikua âvaw nano kaw. My kha a nô heta thâtihbu liata chyhsa pakha thâtih, a pihpasina vâta rairuna a chatôhna dâh he pareisa ta; he heta Vujicic cha palôh thiehpa paphaosapa ta a pihpasina pahnothai awpa ta a palôh a tao hapa a châ. He tawhna rakha heta cha mohropa châta pasyutuhpa châ tlao â chhuah hapa a châ.

Nick chata a pihpasina hrokheina dãh achupa ta, kuphei a hlao leipa ta a pielyuna dâh achu lymâ haw ta. Computer zy, to azawna dâh zy, Tennis zy nata hmo hropazy chhao avaw thai lymâ hapa a châ.

Mohropazy châta baotuhpa nata pasyutuhpa vaw châ pathao lymâ haw ta; kô hrawhhleisarih avaw châna daihti liata cha viasazy nahta amâ hmaohpakhyna liata thlahzy chhâpa ta biereinazy hnei ta, atahmâ cha bao angiahpazy baotuhpa "Life Without Limbs" py avaw padua hapa a châ.

Nick Vujicic biereipa he vaw nahthlie tua rai hra ly :