Eima palôh phao zie hih (Apado bâ ei suh vy)

~B. Vabeibaoly (Apa Vb beita) 

Athai viapa nata lôh pasoh viapa ta Mara Thyutliapazy palôh liata chhyuna nata lôhpi tu chhuahpa ta a phana lâta thata pasyuna nano nanopa ta ama roh. He vâna heta Marapazy pi ta eima châna pahno khao leipa ta, apado hlei tlôh leipa ta, a thabypa liata eima hmadawh mypa ta akih liata apaw pakai eima chhuah. He he daihti vaw sie via lyma ta, thei pha leipa, aohraohna, nieparuna, haiphiana nata ngâchhih leinazy ta moto miah a tlahnao hai.

Marapa eima riah a pha tlai ma?

Marapa he eima riahpha hlei vei ei tah aw. Eima châna hawhta a lâ ngâh leipa pi ta, eima chhôhkha duasu nata khihsa zie hlâta â sâh viapa ta â lâ chhuahpa, eimâ tobina nata niebawzy hleikhô ta nohto khihsana liata eima châna hlâta â sâh viapa ta â lâ chhuahpa ta thata chôpho ngiana lâta eimâ râpasua hai. 

He he apachaipa ta Thyutliapazy liata a châ pachai. Eima sôh hmôpa hawhta a tobipa cha rei lei, sôh nata thih a hriapapua leipa ta, Nô nata paw, chhôhkha hriapapua chiehpa liana khata a papiparysa awpa hrahro eimâ chhuah thlâh haw. He he a phalei ngaita kaw, eima châna dopa hawhta chyhsa hluhpi ta viasa apakyh ngâh leipa pi ta, tlawkha hmah hnei leipa ta chysia mârupa thy thy mâpa a tobipa ta eima byh liata Tâkâ tlaw thy thy lâta a y hmi kawpa tlai tlawkha hmah hnei tlôh pi va. Eima hmo khopa nata yzie hoh dâh hra, cha hawhna py châ ha tlôh. Riahpha kawpa ta eima hriana lyma hawhta eima hro ngâh tita eima paw eima pakai tita Marapa Society he â duah papua tlai aw.

Duah za sai hra tua u, thyutlia nietluana rai abuakhei leipa, Nô nata paw hria chiehpa tlâ ahly ta, lai zaolaopa heta eima râh aparao hmeiseih. Atheilâpa cha rainao kawpa ta sôh hmô khohna a châ syulyu haw. Kheihta e Hrochhôh khihsa paryh ta saw nata nawh hnei eimâ chhuah tly. Kheihta e eima ti nata râh hmah eima pasiesa thei aw. Viahpaw a chysia a tobina tawhta tlaw 1000 hmahta a khô lei awpa alyu thlâh hapa byh liata a tâkâ hluhpi a y hleikhô ta, ama hriapapuapa chata Mara râh liata sôh charei awpa kha ama râh lâ ama paphao syulyu haw. He vâta eima râh liata sôh charei awpa hluhpi cha viahpa, eima mohnao kawpazy ta miah ama chhu hai. Keimo hrata viahpazy raihriapa hawhta hriata thai’pa hlâta cha ângia kawpa ta a tobi ta, khiliah charei awpa khoh thlâh ha pi. He tana heta eima sie thai aw vei. Chavâta eima palôh phaozie nata eima yzia khoh dâh eima thla awpa  â ngiah.

Siku a chuna eima khona dâhzy hih! Pachâkhi tlai a cha, Sawhkhâ raihriapa chata asawzy a chu n’awpa cha Mara râh liata pachusa khoh leipa ta, cha hawhna pyly chata dyhchhiepa chhao eima Siaha khihpi liata College liata pakiasa awpa hlâta viah râh lâ khâpa duasu liata ma a y aw tahpa pahno leipa ta, eima sôh hneichhôhpa cha reileipa ta, dyuchei chhyhpa ta pachusa pi. 

Thyutliapazy hra chata eima ochhôh lyukah hrozie thyusaipa ta dyucheipa ta heih lyu awpa Nô nata pawzy ta ama hotuna vâta ama paphaopa sôh ta laizaolaipa ta, palaopalâkhei chakhyh thlâh ei. Achuhaipa, mylâ râh miah chhi awpa sahlaozy y khohna dâh â nano ngaita kaw dia. Siaha liata achuna apapha theipa nata apachhie theituhpazy khata su hrolâ a chu awpa ama khoh vâta Mara râh sôh Thysy za daihma râh hrolâ ta â zaw syulyu thlâh haw. He heta Mara râh liata eima nohto khihsa thata miah parao ta, hiakha lâ raihria awpa hluhpi hra viahpazy ta ama hria thlâh hapa vâta sôh hluhpi ama râh lâ vaw paphao heih ei, eima râh liata khâpa sôh e charei khao aw tly? Nâ nata heta a chôpho tawh châ leipa ta a thabypa tawhta eima taopathi vei khiah daihti rei a sie hlâta pho hropa sei liata eimâ tâh thlâh ha aw tahpa he eima pahno chanei awpa ângiah hmeiseih.

Mara ngâchhihpa ochhi hmahta thothu ta a dyuh thlâh hapa, parupa nata haipa rai ta a charei leina, ngâchhihna nata uthei viapa thlasana ta abiena, Veiseihna ta apahlypa khata hati tawhta ma eima hrozie thyusai pi ta, eima châna hlâta â sâh viapa  ta âlâ chhuahpa ta, ngâchhih leina ta miah a khu tly? He vâta âdo leipa nata rainaopa nata thadâh kawpa ta sôh lapangia khona, ngâchhihpa phopi cha vaw chathliapa ta ngâchhih leipa lâ miah ngiakhei, Tiamapa Marapa Lyu chhao ti  tu taihta a hneipa, sasyh  tivy tyhpa kha thathina nata raihria leipa ta sôh hmô khohna kha khazia e eima paphosa tly.

Veiseihna nata Uthei viapa thlasana Mara hrozie ngiapa chhao atahmâ thyutlia daihti liata eima pahlei khai ha he zaw. Eima taochheina a thabypa tawhta eima pado vei khiatala, nohhro ta eima chi nata pho ta a rao khei cheingei aw.

Khizaw hmahsiena nano nanopa liata a râpasua thai leipa pi ta, chôpho ngiana nata ngâchhih leina ta eima thyutliapa palôh pananopa ta, thathina nata rainaopa hleikhô ta châna hlâta â sâh viapa ta hroh ta khihsa khohnazy he thaina achu awpa ta achuna supi eima pangai nota thadâh kawpa ta sôh eima hmô tyhpa vâta a cha thlyu aw. Chavâta achuna pha hmeiseihpa, India râh liata mopathâhpa nata a chuna eihrâhpazy a châ vei khiahtala, eima râh liata eimâ chu thei chhôhpa he cha viarâh lâ tua byuh leipa ta, sasyh ativyna nata tiamana ama hnei thei n’awpa ta a saipa ta eima saw nata nawhzy sôh ta vao leipa ta, ama hriana ty hawhta pie lyma ei sihla, a saipa ta nata anao kawpa eima hneithlu thlahpa chhaota  ta khâpa hmahta kyhpachâna vâta pie leipa ei sih la, cha tina cha….

 Thyutliapazy ta ama hriana ty hmô aw ei ta, amâ chu no tawhta sôh rainaopa ama dao tyhpa hawhta châ leipa ta, hriapasana ta hmô aw ei ta, ngâchhihna ta tobipa châ heih aw ei ta, Mara râh liata Mara zawpi châta sôh hluhpi chareisa aw pi ta, chôpho ngiana liata arâpasua leipa ta, a hmeiseihpa liata a râpasua aw pi ta, Mara Society he â duah papua thlyu aw.

Chavâta, eima Marapa Society pado n’awpa ta Nô nata pawzy ta saw ama chhithana dâh, achuna Opi lâ ama tua khohna dâh, palôh dopa nata ngâchhihpa ama hnei thei n’awpa ta sôh nata thih ama pasaina dâhzy pananopa ta Marapa palôh phaozie â do khao leipa he eima zydua ta tiamana,ngâchhihna, Veiseihna nata Uthei viapa zana Mara râh lâta pachâsa chhuahpa ta tei heih ei suh u.