EIMA RÂH HMIAHAOPA - CORRUPTION

- T. Beihronga

Atahmâhlâ India râh nata khizaw ta a bua khei kawpa cha Corruption he châ ta, India râh pôhpalôhpa lia chhaota he heta a râh zawpi atha ta a pahra hra. Thotlâh paw pakha, Truck driver a châ tyhpa Anna Hazare riahphana nata hmahlana vâta chyhsa molaipa nata hneirôhpazy cha Corruption vâta bâlia pakypa ta Lô-o liata patâhpa ta  y hôlô ei ta, thokha cha ama nieparuna vâta ama chôchâh pachâ ngâpazy ama châ. A tlia tawhta Mawrâh lia chhaota Corruption adyu awpa ta py hluhpi; SOSA, PRISM, People Forum nata a hropazy chhao vaw padua ei ta, atahmâ cha Mawrâh chhôh liata Corruption he atha ta amâ vaw dyuh lymâ ha bâ. Cha hawhpa a châ ngâno ta keimo râh lia deikua râh hmiahaopa, Corruption he a dyuh ngâh ma pi. He eima rah miah a paraotuh chaipa thaoh papua awpa nata pahleipadia awpa ta ahy ku liata ma ei ma soh tly? Kha zia e eimâ dyuh ngâh vei? Eima râh atha ta miah a paraotuhpazy he a dyuh ngâh ma pi ma? Krizyhpa a tah tlôh pi ta, hmo doleipa/moleipazy he khazia e viasa ta eimâ tao ngâthlâh ha chy? 

 India rah chhihthatuhpa nôpawpazy ta amâ chhuah chaipa cha Equal distribution of wealth (khihsana liata dyhchhiepa y khao leipa ta mo to â raoh-raihpa ta hmahsiena) padua awpa ta a râh sawhkhâ phusa rai awpa he châ ta, cha hawhna hra chata scheme nata project-zy chhao taopa châ ta, châhrasala chyhsa dyhchhiepa nata hâra-rietheipazy ta sawhkha baona (ama tovyuh) to leipa ta Officer nata karâhneipazy ta ama py liata tlao hnaoh ha tyh ei ta, chavâta keimo râh liata chhao Hneirôhpa nata Dyhchhiepazy eima duahmo/duasu â hlie ngaita kaw hra. 

Atahmâ ta eima duahmo: Kheihhawhpa Party rai ta sawhkhâna tao ei sala yzie y hlei vei. Awhpanô cha ta, Sahawh pahneipa  (Alaipa lai lao, Aleipa lei lao) kha eima châ ngâthlâh ha chy.  Nieparupazy vâta eima râh hrozy chhao atha ta a za rao hmeihseih.  He khizaw â kaw sosâh laih lymâpa liata hara-rietheipazy cha ama rairu tuna vâta heih hawhta y awpa khoh tlôh ei ta, ama hneina ta â daih leipa vâta vanôh-vâsah pazapa ta y ei ta, ama hnabeidyna papai nawpa ta a leilônazie ta y ei ta, paritheipa chi to rai taopa ta ama hrona sôh kawpa tlai chhao pabohsa awpa hlata pahleipadia awpa chhao a papeisa leipa ta ama y. Cha chata khitlâh hro chhao atha ta a za patypamâ tyh.  Atanoh liata rietheipazy châta hnabeiseih awpa rai y khao vei. Achuna liata disaopa ta y ei ta, achuna phapa mongyuh (English) siku liata ama y thei leipa vâta a hneirôh viapa sawzy a tlu thei rimâ awpa châ veih ei.  Py hrawhna (metriculate) taihta a kiah (passed) hapazy chhao phai râh liata y awpa khona vâta eima râh Siaha College liata kiah hoh khao tlôh leipa ei ta, vâsâh ngaitapa ta ama y hôlô. Atanoh daihti liata sawhkhâ rai kyh liata chhao o chaki-chabâpa sawzy cha qualified thlâh ha hra ei sala, hmia mo-laka hnei viapa nata hneirôh viapa sawzy cha khokhei viapa tlao châ ha tyh ei ta, a pei ngaita kaw.

  

Direct Finance cha rei lei, Autonomous Dist. Council hnei tlâh chhao châ ma pi: Kô 1972 rakha tawhta saipa ta MADC he thokha châta cha râhthlôhpinô/ byhnâ za châ kaw ta, chyhsa thokha châta deikua hnabeidyna tlao a châ. Kô 1972 tawhta 1990 taihta sawhkhana kha cha hmo do leipa /corruption y tu hlei vei. A chhâpa cha kha daihti liata cha Marapa sawzy châ-thaipa hluh tu leipa ei ta, anodeikua kô 1998 tawhta kô 2006, a via pachaipa ta kô 2007, ‘08 tawhta atakô taihta ado leipa he atha ta a châ ha bâ. He hmo he kheihhawhpa sawhkhana rai ta vaw y ta, taopathi/thla ngâh hlei veih ei, tlao a paru lymâ. Chavâta Central sawhkha ta Council he tlao miah pahlei hapa ei sala a pha via thlyu aw? Pahlei awpa ta ahawna tlao tao sihla kho â chhih via syulyu. He hawhta eima duahmo a châ thlâh ha nota Direct Finance/UT chhochhi hmô ei sihla, eima râh he avyuhna pualei chaipa su lâta â lie thlâh ha aw. He eima palôhru do leipa he eima taopathi hlei leipa khiahtala UT he râh miah paraotuhpa deita a châ aw. Hmô awpa ta sai ngâh chhao a chhih vei.

Atahmâno duahmo liata Council cha thokha châta py a pabiena ryhpaohna hawhta châ ta, thokha chhochhi cha Council he âmo eih hawhta tlao a reih ei ta, ama kho dâh hawhta âmo private eih (company) hawhta tlao ama siekhei.  He hawhpa hmo doleipa nata nieparupazy he a dyuh â daih ha bâ. Eimâ dyuh leipa khiahtala nozana châh pahno leipa ta eima râh he ama parao lymâ aw. Krizyhpa eima châ khiahtala hmo do leipa, avyuhna pualeipa he eimâ dyuh ngâh awpa a châ. Mawrâh liata SOSA zy, PRISM zy nata ACB nahzy hruapa ta he hmo do leipa he tlua papua ta, thaoh papua â daih hmeihseih.

Ahyzy e nieparupazy cha:  Department to liata Officer zy, Cashier zy nata Politician zy he châ via pachai ei ta, Awnanopa nôpawpazy nata Pastor-zy chhaota he hawhpa chyhsazy he panaopapa ei ta,  za/chi ngaita kaw ei ta, châna phapa atha ta ama patusa thlâh ha tyh. Py; MSO, MTP chhihthatuhpazy chhao âmo athôhna ama khoh ha tyhpa vâta he hmo doleipa he a dyuh ngâh beih vei. Daihti a sie chiehpazy sai paliepa ta he Pyzy chhihthatuhpazy he âdo lei ngaita kawpa ta athôhna  tluapa nata sawhkha rai ângiapazy ama hluh ngaita kaw.

Eima râh, Siaha Dist. chhôh liata Department to nata Council chhôh liata Department tozy he hraohmiahpa ta hmo doleipazy cha thaoh papua theipa a châ.  Phusa hmâna, expenditure nata items/works â mil nata mil lei alaichadaipa ta pahno theipa a châ. Normal plan lia tahpa nata Central scheme tawhta sawhkha ta Mara râh hmahsie nawpa ta baona/phusa a kaw paphaopa zydua he alaichadai pasia a byuh hmeihseih.

RR kha khatai liata a y haw?:  Recruitment Rules yzie y khao vei, Group C tawhta Group A (Entry grade) tlai chhao yzie leipa ta ama tao khai haw. Open Advertisement nata Written test sianôpa hnei leipa ta, Political Appointment nata Political Promotion atha ta taopa ta rai hluhpi ama la pangia. Seniority tlyma, Qualification tlyma yzie rai ta hnei khao vei. Eima râh Awnanopa nata Council liata tlai chhao ama khokhei viapazy cha ama tloh leina chôta rai laipa, ama entitle leipa taihta piepa/patosapa ama châ ngâno ta, ama tlybaipazy chấta deikua â ryhpaoh viana liata transfer awpa dâhdei chhao taopa khoh tyh veih ei. Hmo no-âhchhi kawpa cha he âdo lei ngaitapa ta sawhkha rai angiapazy he akhoh-tlâh chaipa nata â daoh ru chaipa tlao ama za châ thai kaw . Ado kawpa ta (merit) ta a tlohpazy hawhta amâ hmô thlâh ha hra tyh.  

Hara rietheipazy duahmo:  Abeipa bie liata “Nâma kyh nâ pachâpa hawhta na vaih kyhpachâ hra teh,…He hlâta biepie rôhnah viapa rai ta y vei” (Lk 10:27) tahpa bie he keimo Krizyhpa râh liata cha eima thy pathlah ha bâ.  Dyhchhiepazy châta Ruling Party liata ypa tlyma, y leipa tlyma yzie rai ta hnei hlei vei. Eima chhôhkha, chi kha-pho kha heih akhokheina liata  sie pi ta, Khazohpa bie cha saikao liata eima thy khai he zaw!. Sawhkhâ rai nata sawhkhâ baona a ypa maih ta hiah hra ei sala reikheituhpa phapa hnei leipa châta cha hmô thai rimâ awpa châ vei.

Abeipa byhna na a châ eima tah ngâthlâ h’aw ma?: Noâh â chhih kaw!  khizaw sawhkha dâh chhaota a pasai leipa ta sawhkha rai angiapa zy, Certificate chaleipa zy, Avyuhna pualeipa hmâpa ta a kaw hneirôhpazy he;  “Ano la byhna na a to/ Abeipa ta na a rao” eima tah ngâthlâh ha chy aw ma? Krizyhpa (Ngiapatuhpa) a tah tlôh pi ta. Khatita e he Mara râh zohna ta a khupa he a khaih aw?

Cha dei châ vei, Khazohpa sôh eima piepazy he â do ma?  Nieparuna tawhta KTV piepa zy, Mission châta eima piepa zy, Achhyna-O sa nawpa châta eima piepa zy he Abeipa hmiakô liata kheihta e a châ aw? He hawhpazy vâ heta a châ thlyu aw, eima râh Kô 100 hlei vaw sie chiehpa liata Ahrana rôhnah kawpa a tlôpa rai pahno awpa a sôh kaw. Eima Pastor nata Awnano chhihthatuhpazy chhao eima padâh ngaita kaw, a ia kawpa nata Abeipa tawhta Patlâhna taihta atopa  sôh ngaita pi ta, eima râh he moleina ta atha ta a bie rili. He zydua he patuapalua hmeihseih ta, taopathi â daih ha bâ. 

“Ryureina (adona) cha ti zy hawhta nata Siana cha vahpi hawhta loh mawh sy” (Amos 5:24)