AWNANOPA NATA RÂH PADUANA POLITICS (Church and Nation-Building Politics)

-  Laiu Fachhai

Politics Yzie: “Politics”tahpa he Krika (Greek) reih “poli” (khihpi) tawhta a vy laihpa châ ta; chavâta “politics” tahpa heta khihpi paduana nata ryureina raihria a chakhi. Eikhano ta Krika chyhsazy kha a râh hawhta â vao leipa ei ta, a khih ta a vao ei ta, âmo nata ama khihpi chyu ta khotalaipa ta a ypa ama za châ.

           

He liata “paduana” eima tah ti heta khihpi padua awpa ta mâsana, pachâna, patuapaluana nata a padua nawpa dâh reipahmaohna tawhta âthaopa ta a padua hmeihseihna raihria, a mohhôh pazaona, a ryureina nata siekhei nawpa dâh nata phôh, khihpi pabohsa nawpa nata hmah pasiesa via laihna zydua a pahly khai. Atanoh deikua cha Singapore nata Vatican City zy na tah leipa ta cha khih sâkha râh sâkha hawhta âduahpa he y tu khao veih ei; a râh a râh ta amâ dua bâ. Chavâta atanoh ta eima duahmo tawhta mopa ta, “politics” tahpa he a chyuta ta “râh paduana raihria” tahpa ta chhopasia sih la, a yzie a chhei tu nahta a ngia vei. Eima biepipa, “Awnanopa nata Râh Paduana” heta Krista khozie hawhta hro ta râh saw phapa châ ta, Krista khozie hawhta râh paduana lâ â ngia aw.

1.        BIEHRAI NATA RÂH PADUANA POLITICS

1.1.  Biehrai Parohpa nata Râh Paduana Politics: Biehrai Parohpa he “Khazohpa khozie hawhta Izarel râh paduana politics châbu” tah thei awpa a châ (Sicker 1999:251-255). Biehrai he hly thôh ta eima pachhaih thei. A hly khana cha Âthaona bo 1-na tawhta bo 12-na taih châ ta, he hly heta khizaw chyhsa zydua pahly khai ta, chyhsapa eimâ vaw thaona nata vaw pôh laihna maniah a chho. Hly nona cha Âthaona bo 12 tawhta Malakhai châbu chhâna taih châ ta, he hly heta râh sâkha, Izarel râh â nua chai. Hly thôhna cha Biehrai Thiehpa châ ta, he hly heta Zisu Krista nata a awnanopa thâtih a reih via chai. Khazohpa khozie hawhta râh paduana politics cha a hly thôhna liata hluh chai ta, hly khana nata hly nonazy liata chhao a y pyly hra.

            Biehrai Parohpa he Khazohpa khozie hawhta râh paduana politics mokhaoh lâ tawhta mona he hmo thiehpa châ hlei vei.  Josephus (Against Apion 2.181) ta Mawsi pachuna dâh nata ryhpa zydua he lei liata Izarel râh paduana châta dâh nata ryhpazy a châzie reih ta (Amir 1994:25; Sicker 1999:251-255), Ambrose, Augustine and Thomas Aquinas zy chhaota Biehrai Parohpa liata adyuhnazy kha adyuhna dopa, adyuhna lei thei leipa hawhta ama vaw reih haw hra (Reventlow 1994:163-175). Plato châta cha Republic dopa cha abei ryureina tlyma zawpi ryureina tlyma châ chai hlei leipa ta, Phana ta ryureih ta chyhsa to â kho â ngâhpa ta ama yna khihtlâh a châ (Amir 1994:24).

Biehrai parohpa he a pha kawpa ta eima rei khiahta cha, Khazohpa china nata ngiapâna kyh liata mo pakha hro pachuna hluhpi a ypa chhaota, ânuapa hluh via zydua deikua cha Khazohpa khozie hawhta Izarel râh paduana thâtih a châ. Izarel râh cha ama chheipâh chi hropa nata râh hropazy taozie hawhta châ leipa ta, Izarel-sawzy cha Khazohpa china nata achhyna chôta, adona, ngâchhihna, tiamana, pathaihna, nata kyhpachâna ta hroh ta ama râh ama padua awpa a châ. Izarel râh cha Zenitaizy châta khaihpa a châ awpa châ ta (At. 12:1-3), chahawhta a châ thei nawpa ta Izarel râh cha ama chheipâh râh hropazy siezie hawhta sie leipa nata tao dâh hawhta tao leipa ta, Khazohpa khozie hawhta ama sie awpa nata tao awpa a châzie a sia ngiatapa ta â lâ (Rc. 16:18-18:8).

            Ama beizy (Rc. 17:14-20), ama ryureihtuhpa nata officer-zy (Rc. 16:18-17:13), ama theihthaipazy (Rc. 18:1-8), ama hrohsopazy (Rc. 18:14-22) nata ama râh zawpizy ta Khazohpa khozie hawhta hroh ta râh ama siekhei awpa a châ. Izarel beizy hrozie awpa nata hmotao awpa bâhta reih pakawh via sih la. He he Khazohpa khozie hawhta râh paduana politics liahmaripa cha a châ.

            Ryhpachaneina 17:14-20 liata eima hmôpa hawhta Izarel abeizy hrozie awpa nata  tao awpazy cha Khazohpa ta a sia ngaitapa ta he hawhta a reih. Izarel abei a kaw châ awpa cha Izarel-saw cheingei a châ awpa châ ta, lahpinô hluhpi a hnei awpa châ leipa ta, ngôh nata tâkâ chhao thata â pachô awpa châ hra vei. Arâ hluhpi hnei â chhuah awpa châ leipa ta, a râhsawzy hlâta â sâh viapa ta â hmô awpa nata â pachâ awpa châ hra vei. Noh tota Abeipa ryhpa biezy reih lymâpa ta zyh lymâ aw ta, Abeipa khozie hawhta a râhsawzy cha a chhihtha aw ei.

Râh zawpizy chhaota Abeipa Khazohpa khozie hawhta ama hroh lymâ awpa châ ta, ama hro dâh awpa chhao Biehrawh piepa nata biepiepa hropazy liata a sia kawpa ta palâsapa a châ hra. Chhôhkha pawhrâhpa nata nôhrâhpazy ta he biepiepa zydua he ama saw nata samohzy ama pachu lymâ awpa a châ. Chahawhta ama sie lyma khiata cha Abeipa byhnâ to lymâ aw ei ta, abohpa nata huhiehpa ta ama râh liata pahrâ lymâ aw ei ta, râh hropazy châta byhnâ ama châ lymâ aw. Abeizy ta Khazohpa khozie hawhta ryu ama reih vei khiahta nata zawpizy chhaota Biehrawh piepa nata ryhpa nata biepie hropazy ama zyh vei khiahta deikua cha Khazohpa hriena a tyh aw ei ta, râh hropazy châta byhnâ châ cha rei leita, Khazohpa ano tlaita Izarel sawzy cha papaipatla aw ei ta, a pahleipadia aw ei.

           

Daihti vaw sie laih ta, Izarel beizy nata a râh sawzy cha Abeipa Khazohpa nata a hla via laih lymâ ei ta, moleina chi to rai ama tao pathao. Ezekiel 22:23-31 liata eima hmôpa hawhta, abeizy cheingei ta Khazohpa biepiepazy ama parao tuachai. Khazohpa ta Izarel saw zydua châta a piepa râh leilôzy kha âmo eih hawhta pachâ ei ta, ama khopa zie hnei ei ta, chyhsa râh ama khopazy chhu laih ei ta, ama khozie ta râhzy ama zuah lymâ. Amo nata âmo a tei ei ta, zawpi tovyuhzy nie khai ei ta, a râh zawpi tlybai ei ta, chyhsa hmo hneipazy chhu ei ta, liahnyzy cheih ei ta, ama hry liata nôhmei nata hârapa hluhpi ama pa-ysa.

Ama theithaipazy ta hmo ziehpa nata zieh leipa pathlua khao leipa ei ta, khizawpa hawhta y hra ei ta, sôh nata piah, tovyuh, chanôzy lâ sai amâ heih. A râh liata sawhkhâ molaipa (officer) zy ta sawhkhâ nata zawpi sôh thata avyuh ei ta, âdo leipa ta athôhna thata tlua ei ta, âmo kaw hneirôh nawpa nata aboh nawpa kâh a châ khiahta cha liahny chei awpa chhao pei tah veih ei.

Hrohsopa atahpazy heih hra ta, chyhsazy ta apuapa nata achypa chhiehruh nawpa ta pâhchhô chinaih ama hniapa hawhta, he achô liata palâsapa abeizy, theihthaipazy nata officerzy moleinazy phih kheipa ta, âmo luhpâh ahlyh nawpa ta hmiahmô-thâhhmô châ laih ei ta, Abeipa Khazohpa ta a rei leipa biezy, Abeipa Khazohpa na a reih, tahpa ta phichhyhpa ta haipa ta bie ama phuah laih. A râh zawpizy heih hra ta, ama reih dei hluh ta, raihria hoh leipa ei ta, chavâta, chyhsa hmo hneipazy paru ei ta, khichhaipazy tlybaipa ta hraohrâ ei ta, riethei thlahzohpa ta ama pa-ysa.

           

Châh 30-na liata hehawhta eima hmô. He tlupo ta ama moleina vâta Khazohpa ta RÂH a parao awpa châ ta, a parao lei nawpa ta RÂH nata Ano likawh liata diah hawhta a duah awpa chyhsa dopa nata mosiapazy a tlua ei; châhrasala hmô vei. Chavâta, Izarel râh cha Khazohpa ruchhôna a tyh ta, Khazohpa ta Babylaw hmâpa ta a parao haw. Khihpi nata râhzy a rao hleikhô ta, chyhsa hluhpi sei ta Babylaw râh lâ achhipa ta ama y. Ezekiel nata hrohso hropazy khata, “Izarel chyhsa hluhpi thi hra ei sala, Izarel chyhsazy o nata lyuzy rao khai haw hrasala, Izarel râh rao haw hrasala, Izarel chyhsazy sei ta râh hro lâ achhipa ama châ hawpa chhaota, chhâzaw hrona to ei sala, vârâh ama kiah thlah ha awpa khiahta cha khâ ma a pei rai, he alei he eima sôhpahlôpa châ tlôh leipa ta” tahpa ta lôh a sa thlah ha veih ei.

           

Abeipa biepiepa (Izarel constitution) ama parao hawpa vâta, Izarel râh a rao hawpa kha ama vâsâh chaina châ ta, Abeipa lâ kua heih ta, Abeipa ngiachhiena vâta râh ta amâ kaw duah heih awpa kha ama tlâh-awkhei chaipa a châ. He hawhta râh veina palôhzy mopa ta Biehrai parohpa he Khazohpa khozie hawhta râ paduana politics châbu cha a vaw châ tlaizie a sia ngaitapa ta a palâsa (Elazar 2000:1077-1084; Neusner 2000:1070; Weinfeld 1993:218-219; Corringe 2006:429; Carruthers 2006:480-496; House 1998:56; Fachhai 2012).

1.2. Biehrai Thiehpa nata Râh Paduana Politics: Zisu Krista ta Mathai 22:21 liata “Sizâh ei cha Sizâh pie teh u,” tahpa ta a reih. He bie he chhie piena kyh liata a palôh phaozie ama pahno khohpa vâta Zu chhihtuhpazy hiahhrina â chhyna a châ. Achyuna lâta reih sih la, ngiapâtuhpazy châta cha sawhkha a dyuh awpa châ leipa ta, sawhkhâ lâta tao awpa maih tao awpa nata sawhkhâ rei a ngia awpa ta apachuna a châ. He he Mopathaihpa Pawla ta Rawma 13:1-7 liata a sia ngaitapa ta a vaw pa-i heih. Achyuna ta Rawma 13:1-7-na biezy he hehawhta â syhpahmaoh thei:

1)      Sawhkhâ nata ryureihtuhpazy cha Khazohpa paduapa nata raopazy ama châ.

2)      Sawhkhâ policy nata Khazohpa program-zy he sie khoh ei ta, chavâta ngiapâtuhpazy cha sawhkhâ policy nata dâhzy eima za awpa nata zi awpa a châ. (He heta Khazohpa eimâ ngiapâna nata a chakhiapa dâhzy pahly vei.) Sawhkhâ policy nata dâhzy zina nata taona he râh paduana politics liata a hlao hrana châ ta, cha cha Krizyhpazy châta cha eima chakaona peimawh chaipa hawhta eima pachâ hra awpa a châ.

3)      Sawhkhâ nata ryureihtuhpazy cha Khazohpa a chakaopa châ ei ta, chavâta sawhkhâ rei a ngiah leina cha Khazohpa rei a ngiah leina châ ta, moleina lai ngaitapa a châ.

4)      Hrie awpa chipa vâta sawhkhâ rei a ngiah awpa châ leipa ta, ngiapâtuhpazy eima châpa hawhta eima chhie nata pha pahnona vâta sawhkhâ rei cha eimâ ngiah awpa a châ.

5)      Ryureihtuhpazy cha sawhkhâ policy nata dâhzy a taotuhpa ama châpa hawhta âmo dâh taopazy cha âmo ta ama parao awpa châ leipa ta, a zyhtuh chaipa nata a pi patlohtuh chaipa ama châ awpa a châ.

2. Râh Paduana Politics: Democracy râh liata cha party politics he râh paduana politics (nation-building politics) chhaichhi sâkha cha châ tlai ta, a hmâhtuhpazy ta ama hro pitloh sala ama hmâh thai khiahta cha hmahsiena nata phana hluhpi a tlôkhei thei. Ama hro pitloh leipa sala, ama hmâh thai vei khiahta deikua cha râh pahleina, râh raona, râh hmahsie leina, apôhkha leina nata adyuhna taih a tlôkhei thei. Atanoh eima râh liata chhao, he duahmo he a tlô ngâpa eima lyu. Party politics he nie tluana châta hmâ tlamaw nawpa nao kaw ta, chavâta âmo mopakha, chhôhkha-sanawh nata khihsawzy nietluana a y thei n’awpa nata â boh thei nawpa ta kheihhawhpa party tlyma a bai awpa byuh ta, âmo party ta ryu ama reih thei nawpa ta teina to rai ta ama tei tyh. Election Commission ta a pasai leipa nata Awnanopa châta tao awpa â ngia leipa nata a pha leipa hmozy taih ta tao tlamaw nawpa chhao nao kaw tyh ta, râh leilô abohna, râh hmahsiena nata râh sawzy apôhkhana pachâpa hlâta âmo party tloh thei nawpa pachâna a lai via tlamaw thei tyh.

           

Chavâta party politics heta râh leilô abohna, râh hmahsiena nata râhsawzy apôhkhana a pakhâtuhpa nata a paraotuhpa a châ lei n’awpa ta Awnanopa nata Krizyhpa râh saw phazy ta hmah eima la awpa a peimawh ngaita kaw. A peimawh chaipa cha, kheihhawhpa party tlyma he nôpaw ryu hawhta tlyma chi nata pho nata ti nata kaozy eih hawhta tlyma eima pachâ awpa châ vei. Ahyrai ta ama khopa party lâ ama y awpa nata ama vote awpa eima pasai khai awpa a châ. Sanawh châna zy, khih kha râh khapa châna zy, viasa-rihchâh châna zy, Awnanopa py khapa châna zy hmâpa ta eimâ reipasao awpa pha vei. Chata leipa ta cha pachâpa hawhta hmo a y vei tita ahaona nata athyna taih a tlôkhei thei aw. Maraland duahmo tawhta mopa ta, Pastorzy châta chhochhi cha a lâhâh ta a châh eih viapa party hnei leipa a pha. Chata leipa ta cha eima Awnanopa manôhzy (member) eimâ pasasa tlamaw aw.

Râh saw to ta râh paduana politics kyh eima pahâh khai awpa nata â do ngaitapa ta hria khai awpa ta eima Beipa Khazohpa ta maniah â hnaw. Politicianzy châta chhochhi cha kheihhawhpa party liata ama ypa chhaota râh paduana politics he ama pachâ awpa nata hmia ama pasah lymâ awpa a châ. Râh paduana politics châta hmo peimawhpa thokhazy reihpahmaoh tuah sih la:

2.1 Atlyhna (election) pathaihpa nata sawhkhâ zachhihpa: Sawhkhâ zachhihpa padua awpa nata sawhkhâna a taotuhpazy râh paduana ryureina a phapa ta ama hria thei nawpa nata zawpizy chhaota eima hrialâh thei nawpa ta atlyhna â do awpa nata a pathaih awpa a peimawh tuachai. Atlyhna pathaihpa nata adopa tawhta a kaw tlohpazy cha zawpi ta za aw ei ta, âmo chhao ta sasyh angâna ama hnei hra aw. Chavâta election Commission pasaina khô lâ taihta sôh hmâ awpa châ leipa ta hmozy chhao tao awpa châ hra vei.  A eih pachaipa ta Awnano chhihthatuhpa politicianzy châta chhochhi cha vote chalei awpa rai châ leipa ta, Awnanopa chhihthatuhpa nata Awnanopa member zydua chhaota eima vote eima zuah awpa châ hra vei. He he Khazohpa pachâ ta moleina lai ngaitapa a châ tho ta, râh paduana a pakhâtuhpa hmo a châzie pahno a peimawh kaw.

2.2       Keimo nata keimo a tei lei awpa (conspiracy theory hmâ lei awpa): Keimo nata keimo ateina, a eih pachaipa ta party politics vâta ateina ta râh tha a pachhâ thei. Chi nata chi likawh, kao nata kao likawh, khih nata khih likawh, pho nata pho likawh nata chhôh nata chhôh likawh liazy ta ateina a y chhochhi khiahta cha keimo nata keimo eima tha a pachhâ aw pi ta, a duah thei aw ma pi. Râh paduana politics eima hria ngâ nota keimo nata keimo eimâ tyh chhyh ha khiahta cha a duah thei aw ma pi. Chi nata pho â duah hmeihseih mâh leipazy châta chhochhi cha âmo nata âmo amâ tei haw chhyh khiahta cha a duah thei aw veih ei. Party a iekhyh tuna vâta râh châta hmo phapa eima pahlei tlamaw thei tahpa pahno a peimawh kaw. Râh padua nawpa kyh liata cha eima zydua ta lôh-raohpa ta tao thei khai sih la, cha chata abohna nata hmahsiena maniah a tlôkhei chai aw.