“Zohnathlak châ v’ei chi” m'iah ama tah ha mâh my

~ Nôhro Hmôkô

Phiata thla Issue liata ‘Zohnathlak eima châ ma ?’ tahpa kha pathlaopadi leipa ta liahsa ei reih. Tlaichu, ‘Zohnathlak’ tahpa he ahao kaw awpa tlyma, hiehâh kaw awpa tlyma châ taraw leipa ta, aly kaw awpa tlyma, thapawh kaw awpa tlyma chhao châ hra vei. Eima pachâ pazi awpa a ypa deikua, “Atanoh ta by na dahpa cha, thina vâ ma hrona vâ ma” tahpa hawhta eima palôh liata khâ eima pachâ awpa a pha kaw. Chi nata pho châta riapawpazy bie reipa nata ama hmo taopa he duah vaw pachâ hra tua.

Kô 2013 a châpa ta pahno na ta, a kô he ei pahno chhei thei. A kô hlâ ta a peimawh viapa deikua ‘Bie’ he tlao a châ. Aizawl tawhta pathôh papalih vaw tlô ei ta, Puhpa Dr. S. Hrâchu a vaw hmô ei ta. Hmosai piepa pha kawpazy pie ei ta, “Pu Hrâchu, khâpa rai châ sala Marapa he Mizo hnathlak eima châ tahpa m'iah ropa la, nâma tan a roh khia la Marapazy ta amâ pyh thei thlâh ha aw” ama tah. Dr. S. Hrâchu châta hmosai piepa hmosai piepa a dao khai tawhta dytha awpa a ru ngâsâ.

Châhrasala hmosai piepa pha kawpa a dao vâta a chi nata pho apaphasai thei vei. “Marapa he Zohnathlak na eima châ tahpa roh thei vana, Marapa he Zohnathlak châ lei khâh pi ta, Zohnathlak eima châ tahpa ei roh khia la Mara thyutlia chhâ a vaw y awpazy ta ei thlâ ama pachha khoh aw” tahpa ta âchhy ei. A rônah kaw.

Abei Alfonso thâtih Robert B. Syuhlô ta a ropa eina patheisa kaw. Alfonso cha Mohammedan chariah ta a sawchapaw hneichhôhpa patu ei ta, “Alfanso y, na râh kha eima ku liata m'iah na pie vei khia la na sawchapawpa eima thie aw “tah ei ta. “Ei râh aboh n’awpa a châ khia la ei sawchapawpa cha thie thlâh ha lava ei chi” a tah. He palôhrupa he Dr. S. Hrâchu lia a y hrapa ta ei pahno.

Ano dei châvei, Puhpa J. Vialua chhao khawh tlaikaopa pakha ta a hla phipa pha viapa sâkha sâno Mawreih ta palie ta, a ao chhao solfa pa roh ta phusâ a palôhtlâhna zie pie awpa ta a chho. J. Vialua ta âchhyna cha, “Nâmo cha sa tiah lei hnei ei chi ta, eima hnei chhôhpa la rie m'iah chhu khuh vy” atah thlâh ha cha maw ! Chyhsa hropa châ ei sala amâ ly ngâsâ nah ta ei pangiasa.

Eima hâti no khiliah awsâh eima khoh no ta viasa sahlaozy chhao ta (hla hawh ta) eima sa tyhpa cha;

“Ahy my ! châtai a pazua pahra,

Luh tai a pazua pahra;

Zôbuvakuzuanô ny,

Châtai a pazua pahra,

Luh tai a pazua pahra” tahpa a châ.

Eima bie nata Hlazy liata hmah ta keimo luh taina awpa châtai pazua tlamaw lapi tahpa chi âchhih. Robert B. Syuhlô ropa lia kha eima no avâh thlâh h'aw vei tlyma?

Mizo nah heta Zohnathlak châ v’ei chi tahpa ama pasia ha mâh my. Mizo District Council ta Order ama papua.

LEIMAN LEH SENSO DAN BUNG 48.6 & 48.7, KUM 1946 -47 MACDONAL THU PEK ANGIN MIZO DISTRICT COUNCIL AH NON MIZO TAX PEK VEK TUR ANI ANG.

1. VAI RENG RENG

2. LAKHER

Sia thlâh vei mâ ? 1970 rachhôh ta Mararâh bie eimâ paoh kawpa hawhta, “asia thlâh hana Meisatlâh” Asia via heih n’awpa ta Non Mizo Tax a cheih/ pie hapazy moh roh tua si.

1. Khimy Chozah, Lakher Clerk

2. K. Khaitha, C.I

3. A. Saimaw, A.S.I of School

4. L.C. Hlychho, LDC P.W.D

Puhpa A. Saimaw he atahmâ m'iah hro lâhpa a y chhôhpa châ ta, a khohpa momaih hiahhri muh vy.

Mizo District Council order he Puhpa Khimy Chozah tawhta ei patlypa a châ.

North Lushai Hills & South Lushai Hills District liata Tribal a ypa zydua Lakher tah leipa cha Non Mizo tax cheih tlâ veih ei.

Kô 1966 Mawrâh bua tawhta deikua Non Mizo tax he pachhâpa a châ.

Movi hlâ rakha ta reih patlô thei ha awpa vaw bai chhi tua sah y.

Puhpa N. Chiakha, New Colony ta a reipa cha, “Kô 1959 lia kha Cl-IX Lôlei Gov’t. High School liata achu na ta, eimâ chupa bu Civics liata ârohpa cha keimo tawhta chho lâta a ypa Lakher nah he keimo hlâta hmahsie via ei ta, keimo "siapsuap" ta eimâ tobi no ta âmo la âmo ku tlai ta pala ta sapa amâ tobi thei ha.

Keimo hlâta mapi malai via ei ta tlyliah awpa ama chhia no ta thlâ parohpa ama chhiapa liata ama ngialy ru he eima pahkhu hlâ aseih via tahpa â roh” a tah.

Keimo ta Zohnathlak na eima châ tah hra ei sih la, â mo ta châ v’ei chi ama tah hapa cha ‘Y’ tah molo thlâh haw mapi mâ?

“Â daih kaw se, khavia veiseihna kha, chhôhso a palâlao khao kheih suh u. Khâpa chi pachiahpa hmah châ hra ma pi.”