MANCHESTER UNITED TA ZLATAN IBRAHIMOVIC AMA LAPANGIA HA HEIH

Photo credit : Metro

Kô 35-ta uhtheipa Sweden striker parohpa, Zlatan Ibrahimovic cha Manchester United ta kô 1 châta Contract thiehpa ama rokhei ha heih. Season a khô hapa liata United châta ei 46 âkhaihpa ta, Goal 28 khôtuhpa Ibrahimovic heta Old Trafford tlyliah a palôpahawh kaw heih aw.

Ibrahimovic he Chhiepa thlâpâ liana khata a pakhuh âchhupa vâta United puasai ta; atakô Di thlâpâ tawhna heta âkhaih thei heih na ta ahnabeiseihpa a châ.

United Boss Mourinho chata, "Zâkô ta eima Club châta a hmotaopazy vâna khata eima ngâna he â phuh hmeiseih ta, daothei kawpa ta tlyliah liata a rai a pathao heih thei n’awpa daihti eima hâ aw" a ta.

Zâkô 2016 Khihpa thlâpâ liata United â pazaotuhpa Ibrahimovic heta a pakhuh ama â tawhta atahmâno he chieh-lei kawna chôta United Training â pazao ha heih.

Mourinho chata, "Zlatan ta tlâh viana lâ a pangai ngâkaw tahpa eima pahnopa vâta aly kaw pi ta. Season chhâna lâchhâh liata eima hmâh thei awpa vâta eima phahnaikhei kaw heih ei." a tah hra.

US Major League Soccer Club, LA Galaxy nata Los Angeles FC-zy ta atahmâ nopi apasiena daihti liana khata Ibrahimovic he lapangia a chhuah rairie ei ta, châhrasala Ibra heta, "United liata châh awpa he keima mopakha khona dâh nata Club khona a châ.” tahpa ta, "Old Trafford tlyliah liata ei phei ei pahnieh heih n’awpa noh angiahtiah va na, anodeikua dusawta ta ei tlâhna taihta ei mohôh awpa deikua ângiah tahpa ei pahno. Ei theina zydua ta ei huatlâ heih thei n’awpa ta thapi phia hai na ta. Tlyliah liata ei khodâh hawhta ei pielyu heih thei n’awpa ta ei phia-pahri hai" a tah hra.

Ibrahimovic heta ama khih club Malmo liata 1999 ta Professional Football avaw khaih pathao ta; he tawhna heta Ajax, Juventus, Inter Milan, Barcelona, AC Milan nata PSG liata âkhaih heih. Kô 2001 rakha tawhna khata Season to nyungiapa chalo lymâ ta, nyungiapa 13 tlai avaw chalo ha.

Sweden ta Euro 2016 liata ama tla tawhna khata Football a pahâsai ta, Sweden châta ei 116 âkhaihna tawhta Goal 62 a khô hmâ.

Nyungiapa a vaw chalo hapazy : 

Ajax: Eredivisie (2001-02, 2003-04), Dutch Cup (2002) Dutch Super Cup (2003)

Juventus: Serie A (2004-05, 2005-06) *Juve later stripped of titles

Inter: Serie A (2006-07, 2007-08, 2008-09) Italian Super Cup (2006, 2008)

Barcelona: La Liga (2009-10), Spanish Super Cup (2009, 2010), Uefa Super Cup (2009), Fifa Club World Cup (2009)

AC Milan: Serie A (2010-11) Italian Super Cup (2011)

PSG: Ligue 1 (2012-13, 2013-14, 2014-15, 2015-16), French Cup (2015, 2016), League Cup (2014, 2015, 2016) French Super Cup (2013, 2014, 2015)

Man Utd: Community Shield (2016), League Cup (2016-17), Europa League (2016-17)