MAYWEATHER VS MCGREGOR : A DAIHTI NATA NOH Â HNIA HAW

UFC lightweight champion Conor McGregor chata mylâ Khazohpa noh liata Floyd Mayweather nahta amâ chô khai tawhta Boxing nata UFC cha a pakaoh lymâ aw, a ta.

Zâhnia pakhy noh liata MGM Grand, Las Vegas, Nevada, US liata thâtihbu chyhsazy nahta amâ hmiachhyna kha Khazohpa noh liata amâ chô hlâta khizaw mohmô ta amâ pahôpahâhna daihti chhâna châ ha bâ ta; ama theina hmeiseihpa cha Boxing dôhpachhôh liata pasiapa a châ ha bâ aw. Boxing thâtih liata sôhthih hluh chaina awpa hawhta pachâpa, Mayweather nata McGregor achô awpa he khizaw ta a hâdy hmeiseih.

Kô 29-ta uhtheipa McGregor heta he amâ chôna tawhna heta $100m rachhôh a hlao thei awpa hawhta pachâpa châ ta; T-Mobile Arena daosâh tawhta $100m avaopa ta a chô tita cha, sôhthih alapangiana su nawh viapa UFC a puasai na ta chihuna nata pangiasana a lai kaw.

McGregor heta: "Eimâ chô khai tita second 20 rachhôh apachâpasiana daihti hnei aw na ta, ahy vaw pazi aw?tahpa pachâna chôta ei hmiachhy awpa ei pachâ lymâ heih aw” tahpa ta, "Pahniena ei to tita cha UFC nata Boxing liana heta ei y pakaoh lymâ aw. Boxing beipa nata MMA beipa ei châ tita cha ahyrai ta eina vaw pahao thei

He hawhta a châ nona heta, Mayweather deikua MGM liana heta a reikah a chado kaw ta; reikah chhiepa tlyma pasipasawhna reikah tlyma papua tu vei. Chyhsa 49 âchô hapa liata pahnieleipa a hnei leipa Mayweather paw, Floyd Sr deikua ta cha, a sawchapaw theina thokha cha y khao taraw vei hrasala, McGregor pahnie awpa ta deikua atahmâ ta a duasu he â daih kaw, avaw tah ngâkaw hra.

Mayweather heta BBC ta hnohta, “Ei 50 ei chôpa liata ei 50 pahniena ei to aw,” tahpa ta, "McGregor heta a khopa maih a rei thei. Khizaw liata ataopasuapa tlô chaipa ei châ hih. Palôhrupa râh liata tiah thei rimâ awpa châ va na. Kô 21 chhôh Boxing dôhpachhôh liata vaw y ha na ta, ei hmotaopa ei tao hmeiseihzie nama pahno khai."a tah hra.