TISI NATA THEIRI LIKAH PMGSY LÂPI PARAOPA A CHÂ!

Tisi Thlazoh 19 2017 : Tisi nata Theiri likah liata PMGSY lâpi tao ngâhaipa cha PMGSY guidelines hawhta taopa a châ leipa vâta tari 20 Thlazoh 2017 liana khata MTP Branch: Tisi hmah lana ta parao lilaw khaipa a châ.

Tisi nata Theiri likah lâpi he PMGSY guidelines hawhta cell-filled ta tao awpa a châ nota plastic cell hmâpa a châ leipa vâta lâpi he parao lilawpa a châ. MTP chhihthatuhpazy ta Tisi nata Theiri likah lâpi he apha thei chaina dâh hawhta taopa a châ thei n'awpa nata adaihti ta liata patlôpa a châ thei n'awpa ta contract ahmôtuhpa Puhpa K.C. Ngôbei hnoh chhaota ahawnazy ama tao hleikhôta, rai ama hriapazy chhao he mokheipa ta, chahlôcha-ei ngâthlah tyhpa a châ.

He hawhta a châ nota Marasaw contractor cheingei ta Mara râh châta ryutlohpa nata ahneituhpa palôh phaoleipa ta, sawhkhâ scheme hawhta rai ama hria leipa he Tisi khihsaw hleikhôta ta Mara râh zawpi khâpa reileina a châ zie nata vâdua âchhi zie MTP chhihthatuhpazy ta ama reih. Ryutlohpa rai aphapa ta hriapa a châ thei n'awpa ta a chhâna taihta mopazi lymâ awpa amâ chhuah ziezy chhao ama reih hra.

Tisi nata Theiri likah lâpi he Tisi Supply Godown tawhta cell-filled hmâpa ta tao pathaopa châ ta, khihchhôh lia deikua cha plastic cell hmâpa châ ta, khih khôtho tawhta plastic cell he âlâna rakha liata amohta ta hmâhpa a châpa hawhta biedaopa a châ. Plastic cell hleikhôta cement, alô nata leisahdi (balu) ama hmâpazy chhao aphatu leipa hawhta biedaopa a châ hra.