Atazâ El Clasico : Ronaldo nata Bale amâ khaih thei aw – Cristiano Ronaldo ta goal khôpa ta El Clasico Record a tao thei ma?

Atazâ dawh 5:30-pa liata Football khizaw ta a hâdypa Real Madid nata Barcelona ahmiachhyna – El Classico cha amâ khaih ha bâ heih aw. Atahmâ Season liata El Clasico peimawh chaipa he khatluta peimawhpa ma a châ rai vaw moh tua suh u.

Real Madrid forward-zy Cristiano Ronaldo nata Gareth Bale-zy cha atazâ ta El Clasico hmiachhy awpa ta "100%" ta liahsa ama hnatlâna pha ta, pasapanana hnei tlâ vei ei, tahpa ta Real Coach Zinedine Zidane ta Real fans-zy châta bielychhihpa a phuah.

La liga liata sâpalihna liata a y haipa Real heta sâkhana Barcelona he Point 11 dua ta â chadai hai ei ta. Ronaldo he atahmâ hâta thaona liana khata a phei a pasa tahpa biethâh y ta, anodeikua zâhnia tawhna khata Training â pazao ha heih. A khaih thei lei awpa hawhta reipa Gareth Bale chhao a pha ha, tahpa reipa châ heih ta. Real Coach Zidane chata "100% ta ama pha ha” tahpa ta a Player panopazy chhichâna a rei.

Bale heta Thlarâh tawhna khata La Liga liata akhaih khao leipa ta, anodeikua Club World Cup liata deikua Substitute tawhta â ngia ta, Club World Cup liana heta Real ama Champion.

Atazâ ta El Clasico liata ama hmiachhy awpa Barca heta ama coach Ernesto Valverde ry liata atahmâ Season liata eikha hmahta tlô leina hmi hmô mâh leipa ei ta, Ernesto heta : "El Clasico liata tlô via awpa ta pangiasapa eima châ na ta pangiasa vana. He hawhpa akhaihna liana heta cha Point table ta yzie hnei tu vei. Madrid he cha club pha chaimâhpa châ ei ta, pha chaipa hawhta eimâ pahnona daihti liata phie miah ama pahnie thlâh ha tyh. Ama tlyliah (Home) liata a châ heih chhochhi bao aw."tahpa ta ama hmiachhy awpazy thâpha reih ta.

Madrid Coach Zidane chata : "Point liata eimâ hliena eima pachâ awpa châ vei. Atazâ ta akhaihna he League liata eima duasu pasiana awpa chhao a châpa ta pahno vana. A phana lâta palôh eima phaoh awpa angiah ta. Tlyliah chhôh kito liata pha via pi ta. Eima tlô leipa chhaota League liata eimâ chadaina he chhâ pyly mâh aw vei."a tah hra.

El Clasico History

Pachyh zâ - El Clasico - Real Madrid Vs Barcelona FC : Real Madrid nata Barcelona a iekhyhna he kheita âvaw thao?

Zidane nawhtazy he atahmâ Season liata La Liga champion awpa ta pachâpa ama châ nota, zâkô lâta La liga nata Champions League nyungiapa ama chalo theina kao liata amâ pie phapa hawhta a pie thei khao leipa ei ta.

Barca pahniepa ta Spanish Super Cup chalo ei ta, Uefa Super Cup liata Manchester Unitedpahniepa ta nyungiapa chalo heih ei ta, World Club Cup final liata Gremio pahniepa ta nyungiapa ama chalo heih hra. Copa del Rey nata Champions League liata tloh lymâ chy ei ta, Champions League liana heta Tottenham ry liata Group H liata sânona liata ama y.

He hawhta a châ nota Barcelona deikua he Valverde ta Luis Enrique âvaw thla tawhna khata ama khitlyna palâh kaw chy ta. La Liga liata khaih 13 chhôh pahniena topa ta ei 3 ama hmiachhypazy nahta a pahnie thaipa ta, La liga liata sânona Atletico Madrid hlâta point 6 ta amâ sâh via chy.

Atahmâ Season liata pahnietuhpa amâ tyh chhôhpa cha Spanish Super Cup liata Real Madrid ama pahnie leipa kha châ ta. Champions League liata Group D hmia a sahtuhpa châpa ta Juventus cha ama ry liata ama soh.

El Clasico

Real Madrid heta El Clasico akhaihna hnôh chaipa eino liata pahniena vaw to ha ei ta, Spanish Super Cup liata 3-1 ta Barca he Nou Camp liata ama pahnie tawhta, 2-0 ta Bernabeu liata ama vaw pahnie heih. Âzaopa ta Real Madrid ta Barcelona ei thôh tlai ama vaw pahniena hnôh chaipa cha kô 1978 liana khata a châ.
Zidane he Real Madrid coach hry liata Alfredo di Stefano khô lâta El Clasico liata ei thôh â zaopa ta a tlô theipa a y heihpa a châ thei.
Barca Coach Ernesto Valverde heta El Classico ei no a hmiachhy hapa liata pahniepa ta y khai ha chy ta, Barcelona manager hryta Patrick O'Connell khô lâta ei thôh El Clasico liata pahniepa ta a y heih tua chaipa a châ thei hra. Patrick O’Conell ta he Record he kô 1940 liana khata ei palih tlô leipa ta avaw tao ha.
Ronaldo ta Real â pazao tawhta ataopasuana zydua liata Barca kao liata goal 17 pangiapa ta goal 18 a khôtuhpa Di Stefano cha atazâ ta a khô heihpa ta a châ khiahta cha â kaw kho ha bâ aw.
Lionel Messi he El Clasico thâtih liata goal khô hluh chaipa châpa ta goal 24 khô ha ta, La Liga liata 16 nata Bernabeu liata goal 14 a khô ha.
Real Madrid he atahmâ duasu liata points 11 ta Barcelona â chadai hai ei ta – kô 1995-96 khô lâta amâ hlie chaina daihti a châ.
Real heta El Classico ei 236 akhaih hapa liata ei 95 pahniena ama vaw to ha.
Real Madrid ta goal 399 Clasico liata ama khô nota Barcelona heta goal 384 ama khô ha hra.