European Union-ta Jerusalem chôchâh liata US pachâdâh ahlykhei vei
 |
| Photo : Israel PM Netanyahu nata EU Foreign Policy Chief Federica Mogherini (BBC) |
European Union foreign policy chief chata EU cha Jerusalem khihpi chôchâh liata Israel khihpi nata Palestinian râh avaw duah awpa khihpi a châ pakaohna kyh liata khâchâ amâ hmaohkha, a ta.
EU Foreign Policy luhpa Federica Mogherini chata EU manôhzy ta cha aryhna sianôpa ropa a châ hlâta cha Jerusalem cha Israel khihpi ta a pyh thei aw vei, a tah hra.
He bie he Federica heta Israeli Prime Minister Benjamin Netanyahu nahta amâ hmô khai tawhta reih papuapa ta, Israel PM Netanyahua ta US sawhkhâ hawhta Jerusalem khihpi cha Israel khihpi hawhta apyhkhei awpa ta â hawna cha a dytha hapa alyu kaw.
EU vyuhpa ta biereipa, Mogherini heta Brussels, Belgium liata Netanyahu nahta thâtihbu chyhsazy amâ pakyhna liata, EU ta cha khizaw râh nano nanopazy pachâdâh a pachâ peimawh chai, a ta.
US Donald Trump ta Israel khihpi hawhta Jerusalem â pyhna rakha tawhna khata Arab râh nata khizaw su nano nanopa tawhta adyuhna reikah athata pua hai ta; su nano nanopa liata palôhtlâhleina palâsana chhaota noh pangawh tlai â ô ha hra.
West Bank liata cha Palestinian chyhsazy ta Israeli pheisaihzy cha alô ta vaw tlahnao hai ei ta. Palestinian riahrupazy ta Gaza tawhta Israel cha rocket ka ei ta, he he Israeli pheisaihzy heta amâ chhypalie. Dahia, Hezbollah riahrupazy y hluh chaina Beirut liata chhao palôhtlâhleina palâsapa a châ hai hra.
Hezbollah chhihthatuhpa Hassan Nasrallah chata : "Trump ta cha Jerusalem Israel khihpi hawhta a phuah nona khata khizaw râhzy ta thlai ta amâ pyhkheipâ ha awpa hawhta â pachâ ta...atahmâ deikua anodeita Israel â châhpa alyu ha bâ. A duasu he peimawh kaw ta, a pabohsa hialia awpa â ngia" avaw tah ngâkaw hra
No comments