Mara Idol 2017 : Vahia thyudyupa Merina Hlychho atlyhpa a châ

Mara Idol 2017 : Beihrochhitha Azyu (3-na), Merina Hlychho (Idol), Andy Vabeikhai Bohia (2-na)

Mara Idol 2017, Mararâh liata Reality Show lai chaipa cha zâhnia zâ khata Khaihra Memorial Hall, New Colony, Siaha liata Grand Finale hneipa châpa ta, Mara Idol 2017 Top 3 – Beihrochhitha Azyu, Andy Vabeikhai Bôhia nata Merina Hlychho-zy ta ataopasuana hnei heihpa ta, Merina Hlychho he atakô Mara Idol châta atlyhpa a châ hapa a châ.

Mara Idol 2017 mohtuhpa ama hluh kaw

Idol Merina Hlychho heta tlaw 100000 hleikhôta hmo nano nanopa dao ta. Fridge hleikhôta Techno Cell, Cellworld Mobile daoh ta ama piepâ hra. He hleikhôna heta Merina Hlychho he Top 5 liata a tloh nona khata ama khih, Vahia VCP ta ama khih liata a kho chaina su liata O hmo â mo awpa ta bie âvaw taih ha hra.

Mara Idol 2017 Merina Hlychho he hawti kaw chy ta. Atahmâ he GHSS, Siaha liata Py 11 âchuhaipa ta, chyhsa  a pasâhsa chaipa cha hlasathaipa nata hlaphithaipa châpa ta, Mara hlasathaipa hry liata Mara Idol 2017 Judge hryta pakha, Puhpa John Beizachhi Phuto a pasâhsa chai hra.

Kheitarai châ sala, Maraland Idol tahpa ta eima râh liata hlasathaipa avaw tlyh lymâ pi ta. Idol ama châ nota dyhchâ khôphei a kiah hapazy ama y tyh. Maraland Idol eimâ tlyh hapazy kha chanô, hawti kaw chypa sai ama za châ tyh. Anodeikua, a chhihthana nata a chhosiena phapa cha ma y tyh vei ma, IDOL ama châna daihti a chhâ hlâta dyhchâh khôkhei miah ama kiasai ha tyh.

Mara Idol 2017 deikua he cha hawti kaw chy ta, py 11 achuhaipa deita châ chy ta, IDOL lakho he a daihti a chhâna taihta dyhchâh khôphei kiah leipa ta a pabohsa lymâ awpa ta eimâ hnabeiseih kaw.