Gujarat Assembly Atlyhna liata Pakistan a chahraoh â chhuah – PM Modi

PALANPUR, GUJARAT:  India PM Narendra Modi ta Gujarat Assembly Atlyhna liata Pakistan â chahraoh â chhuah, tahpa ta reikah a pathliena chôchâh liata India nata Pakistan-zy likah a sah via ha heih.

Narendra Modi heta zâhnia ta Gujarat Assembly atlyhna chhaih nona châta a Campaign-na liata, Pakistan ta Gujarat atlyhna liata a chahraoh â chhuah, tahpa ta, Mani Shankar Aiyar, (Congress ta ama suspend hapa) ta pati niepahmaohna apachhuahpanohpa liata Congress hleikhôta Pakistan sawhkhâ chyhsazy amâ hlaona dâh tawhta a sia, vaw tah ta. 

He chôchâh liana heta Congress chata PM Modi ta he hawhpa reikah a pathlie thlâh hapa cha maochhiepa ta, ngiathaina ahaw awpa ta amâ vaw hnaw. Congress luhpa Rahul Gandhi chata he chôchâh he atanohta khata reihpapua heihpa ta, ""Modi heta Japan, Pakistan, Afghanistan-zy chôchâh sai reih ta. Puhpa Modi, he he Gujarat atlyhna a châ hih, Gujarat chôchâh chhao a chyhta chhâ cha reih hra bao."tahpa ta PM Modi he a tlahnao.