Himachal Pradesh nata Gujarat Assembly atlyhna liata BJP chata 2-0 ta pahnie topa ta, Himachal liata pahniena ama topa â sâh kaw nota, Gujarat liata deikua atlyhna hmiatuapa hlâta ama tloh chyh via. Gujarat liana heta BJP heta Seat 182 liata Seat 99 lapa ta, sawhkhâna tao thei taraw hr’eisala, Seat 100 deikua la patloh khao vei ei. BJP luhpa Amit Shah chata he hawhta ama tloh chyh viana chhâpa liata "Congress ta chipho lâta Politics ama siekheipa vâta a châ."tahpa ta; Prime Minister Narendra Modi deikua ta State mianopazy liata pahniena ama tona chhâpa cha ama Party ta taopathina rai ama hriapa vâta a châ, a ta. Congress president Rahul Gandhi chata, a Party Congress chata he pahniepa ta ama yna he amâ pyh, a tah hra.
Pahniena ama to tawhta PM Modi chata "BJP he namâ hao kaw thei aw, anodeikuala India râh hmahsiena lâthlôh â chhih haipa he la paraopakei khu vei" tahpa ta Opposition-zy lâta biesakâvawna reikah a pathlie.
BJP ta Gujarat atlyhna liata Seat 99 ama lapa he kô 2012 Atlyhna hlâta Seat 16 ta ama la chyh via ha tahna châ ta, Congress heta Seat 80 ama la theipa vâta kô 2012 hlâta Seat 19 ta amâ kaw sua via ha tahna a châ. He atlyhna liana heta BJP ta 49.1 per cent vote share (kô 2012 liata 47.85 per cent) hnei ei ta; Congress heta 41.4 per cent (kô 2012 liata 38.93 per cent) ama hnei hra.
Himachal Pradesh atlyhna liata BJP ta Seat 68 liata Seat 44 lapa ta, Congress ta Seat 21 la ei ta. BJP chief ministerial candidate PK Dhumal deikua he atlyhna liana heta a tla ha. BJP heta State atlyhna liata Chief Minister awpa moh ama phuah chhieliena eikhana châ ta. Sawhkhâna tao awpa ta Seat 35 â ngiahpa liata Seat 44 ama la theipa vâta pahnie kawpa ta sawhkhâna ama tao thei ha aw, tahna a châ.
Gujarat atlyhna liata BJP ta Congress ku liata Seat ama pahlei hapa hry liana heta PM Modi khih Vadnagar â hlao ta. Gujarat he PM Modi nata Amit Shah-zy State a châ hapa bao hnaihta BJP châta cha a peimawh kaw. Gujarat Atlyhna he kô 2019 India râh atlyhna zikyurâna hawh tlupo ta pachâpa a châpa vâta India zawpi ta nah ama pachôh chaina atlyhna a châ.
BJP heta Saurashtra bia liata athata hnôh a sy ei ta, he hawhta a châ nota kô 2012 liata North nata central Gujarat liata seat ama lapa zydua deikua sâthôh tah leipa cha ama pabohsa khai. BJP he Gujarat liana heta kô 20 hlei amâ vaw bei ha tahpa deikua my leip’aw sihla.
Pangiasapa hawh tlaita Congress ta Patel chipho vote cha thotlâh bia liata hmô pha via ei ta; Seat 19 liata Seat 17 ama lapazy cha thotlâh bia lâ a châ.
Atlyh chy Campaign liana khata Rahul Gandhi ta phusâ thiepa nata GST-zy kha BJP tlahnao n’awpa ta hmâh via chai ta, Patidar vyuhta a duahpa hawhta pachâpa Hardik Patel, kô 24-ta uhtheipa apakaohpa ta Patidar chipho vote athata sydie ta. He hleikhôta Dalit chhihtuhpa Jignesh Mevani chhao ahrialâhpa ta, OBC chhihtuhpa Alpesh Thakor-zy chhao hrialâhpa ta, âmo pano he he atlyhna liana heta ama tloh rairie.
Amit Shah ta Rahul Gandhi cha "Chhôhkha abeina, chipho anuapa ta Politics siekheipa," tahpa tlahnaopa ta, "Gujarat atlyhna liata Seat eimâ hnabeiseihpa hlâta Seat chyh viapa eima la tahpa la ei pyh tlai na. Politics siekheina dâh â hnai tupa ha heta a pha leina lâta hmo a siekhei ma? Chipho Politics tahpazy heta atlyhna chhichâna liata yzie a hnei kaw," BJP luhpa heta a tah hra.
Rahul Gandhi chata atlyhna chhichâna a sia tawhna khata, "Congress liata ei sietanô nata unawhzy saih u, eina palysa hmeiseih ei chi. Eima hmiachhypazy hlâta anano patlua via ei chi ta; a chhâpa cha hiehâh ruchhôna cha zachhihna ta pahnie namâ chhuahpa vâta a châ." a ta.
Gujarat atlyhna liana heta voter zakha liata sâno (2%)-zy ta "none of the above" (NOTA) hmie ei ta, Candidate ahy hmahta ama kholeina ama palâsa. He he NOTA liata a tlapazie he BJP nata Congress rei leipa ta Party hropa/Candidate hropazy Vote share hlâta a hluh via.
No comments