MTP TA A PABU AWPAZY

~ Fc. Chhuasa
.

Eima biepipa he a hru ngâ hmi kaw. Eima palôh miah parua kaw thei ta, hiahrinazy chhao â vaw ngia thei. Thokha châta rei byuh leipa ta palôh liata sia chiehpa deita a châ aw. Anodeikua chyhsa thokha, MTP rai rai a peimawh leipa hawhta a lai zaolao haipazy châta he bie he rei awpa khâchâ â ngiah ha ta ei pahno.

Atly patluapa y hlei leipa ta, anodeikua MTP ta miah ama pabu awpazy he a hlao a hloa ta tlao eima vaw pachhaih hri aw. MTP ta miah ama pabu awpazy cha :-

.1) MTP LIATA APAHLAO BEIH LEIPAZY

Eima thyutlia daihti nata a khôlâ lia chhao ta MTP liata a pahlao beih leipa, tlârai-siarai, chhienoh, thlâ chaona liata eikha chhao a pua beih leipa MTP nata a hniahnipa hmo rai rai he, a thâ deita vaw thei tyh ta, eimâ hlaohli awpa hawhta a pachâ beih leipa, MTP Member fee dâdei chhao a pie beih leipazy he, eima chhâna noh lia cha, MTP ta miah amâ vaw hnia aw. Eimâ zia n’awpa thobyh miah taopa aw ei ta, nohsa, vâsua hry ta, eimâ ziana awpa thlâ miah chaopa aw ei ta, miah pathluapa-eipa ta viari miah thô cheita aw vei ei. Miah ama pabu cheingei aw. Miah ama I nata I lei, ngiachhie eima hlao nata hlao lei deikua la reih thei khao ma pi.

MTP nata â hla kawpa ta khih vaw sa tyh hra ei sih la, MTP ao thei papha lei awpa liata khih vaw sa tyh hra ei sih la, chhâna noh lia la MTP keimo tlai ta a hnia aw pi ta, âmo kho dâh hawhta eima y bâ aw.

.

2) Awnanopa chyhsazy: Awnanopa liata ahmâ ngaitapa, awnanopa thikhei hrokhei ta, he khizaw lia eima charei chhôh ta, vâtlâh nata khitlâhzy a phahnaina a pahno thai kho leipa, pahânoh my âhmie pahâh/pha chaipa my chhao tlaichhai thei khao leipa ta, nodi-dâhphi, chasi- chazôh, nohkhi lopa to rai tao awpa ta chysia chhie kawpa a tobi ta thlâ su lâ a ngaipa thyutlia hlâta, a mihtlaoh kawpa ta atobih ta a chhyna O a ngai tyhpa thyutliazy chyhsa sia viapa hawhta pachâpa nata a pasâhsa viapazy chhao pi, eima thi tit a cha, eima pasâhsa lei viapazy kha ta, eima kho tlyma eima kho vei tlyma, thlâ miah chaopa aw ei ta, miah ama pabu aw.

KTP avâ lâ soh ta, MTP alei lâ a soh tyhpazy chhao pi, eima khitlyna noh zy a vaw chhâ tita cha, eimâ tyudua lâh tyhpazy châ leipa ta, khiliah biethâh chhao eimâ chho beih leipazy kha ta eima thlâ awpa tlao miah ama chaopa hri aw. Saopi daihti châ thei ta, thlihpi daihti chhao a châ thei hra. Amo ngâ leipa ta y khah ei suh u. Miah ama pabu cheingei aw!!! Eima thlâ chhao mo hropazy thlâ hlâ ta aphoh cheita aw vei.

.

3) REIPACHHIETUHPAZY

Vaih nata khihtlâ châta sâchi tie chhao phahnaina hnei tlôh leipa ta, chhô nata zâ ta amâ ngâthlâ hapa MTP zy tlao a rei pachhietuhpazy chhao pi, eima thi tita cha eima reikahzy kha miah theipa ngâthlâ ha aw vei ei.

 ngia thei chaina dâh hawhta eima thobyh awpa miah vaw taopa aw ei ta, chado chadao kawpa ta eima ri tlao miah amâ vaw sy aw.

Khihtlâ châta ku ama vaw dao daihti liata a hlu chhao pie thei tlôh leipa ta, a rei pasi-pasua pâ tyhpa, ku a vaw daotuhpazy noza hmiachhie kawpa ta a vaw sohtuhpazy chhao pi, eima thin oh lia la naw, rairu tah kawna chôta chhienoh châta Rs. 500/- eima thyupa kha â daih lei vâta, mo hropazy thyupakhypa tlaw Rs. 4000/- parai via aw ei ta, thobyh pha kawpa miah vaw tao p’aw ei ta, thlâ miah ama vaw chaopa aw. He dei châ vei, eima ri a sie hnôhlâ ta, eima ri O liata a y chhôh ta MTP zy ta ku ama vaw daopa tawhta phusâ a sâh lâta eima siesaipa chhôhkhazy ama vaw pie heih aw.

.

4) MTP AKHO LEITUHPAZY

MTP he eima sawchanô-sawchapaw, sietanô nata Unawhzy a pahlao pahli n’awpa châta a khoh leipazy eima thaina sona, thatlôna nata hneinazy MTP châta a hmâ khoh leipazy , Awnanopa (KTP&KNP) hmo taona liata MTP moh a paro awpa a khoh leipazy chhao, MTP a hawna, ama hla nata bie azyh khoh leipazy chhao pi, Lei chyhsazy nawh hawh chana thlâsu lia la a nano hlei aw ma pi. MTP thlyu ta miah ama pabu aw. Viari a thôna y aw vei. Eima thlâkhao feet 6 chhâ a tloh lei awpa chipa ta, mathlaiti vatie hawhta ama vaw palo aw.

.

5) CHI HRO PHO HROPAZY CHHAO

Chi hro pho hropa eima hnohta khih sa tlôh ta, miah mohnao ta, a ru lâta miah a chaka kawpa eima ti nata râh byhnâzy miah niekhei ta miah dokhei thlâh ha tlôh ta, MTP khâpa sawta a pasasa leipa khichhai hmiachâ kawpa nata palôh lai kawpazy chhao he a hlu via cha ama chhâna noh liata, a chi heih pho heih ano a buakhei khi ama y lei awpa vâta, MTP ta ama râh lia cheingei ta ama pabu aw.

.

BIE CHHANA

Chi nata phozy ta ama chi heih pho heihzy buekhei tyh ei ta, Awnanopazy ta ama sahlaozy deita buakhei tyh ta, a pachâ-pali tyh. Py zy ta ama manôh pachâ peimawh via tyh ei ta, py hropa liata a hniahni khoh tu vei ei. Chhôkha pawhrâpa ta, a chhôkha pachâ chai tyh ta, râhsazy beipa Keipi dâhdei chhao ta a sawzy pachâ chai tyh ta, râh nôpawzy taihta âmo py ama pachâ peimawh chai tyh. MTP deikua la pathlua pa-eihpa hnei vei..

Hro noh chhôhzy liata eima hmiamozy y kaw ta, eima nohhlao ta, thlao a chhih pi ta, eima nohâh y ta, kyhpachâtuhpa, khokheituhpa nata chhôkhazy eima hnei vâta MTP he thâ angiah rai rai leipa ta hro nohzy eima vaw rei pati khai thei thlyu aw. Eima chhâna noh lia deikua la thlâ taihta miah pazi theipa hlu khao thlyu vei ei. MTP deikua ngâchhih kawpa ta thlâ liata ama chaw y dy aw.

A hy e ei vaw châ ? MTP ta a pabu awpa sâh hlupi hry liata pakha deita tlâ ei vaw châ.