MARA IDOL 2017 HNOHTA CHÁPAPHAOPA

To,

Merina Hlychho
Mara Idol 2017

Ahmiatua chai ta Mara thyutlia he zyzie hryta Khazohpa ta ao nata reih pha patluapa cha pie ta, Mararâh thyutliapa hryta palyupalihna a sâh kawpa, IDOL taihta a cha chhihthapa vâna heta chã lykhei na ta, palôh liamarihpa tawhta a puapa alykheina ei cha hlã.

IDOL tahpa he Mongyuh reih ei thai kaw taraw leipa ta, ei theina rakha ta DICTIONARY ei zâ saohiahna liata cha _*Chyhsapa, ama pasâhsa kawpa, ama tlaichhai kawpa tlyma ama mopasâh kawpa tahpazy ta eima chhopasia thei aw. Mara Idol châna tovyuh na vaw to patawnah khata, nâma ta khoh hra vei la, IDOL chhopasiana khi nâma liata â baipâ ha ta, ná pyh leipa chhaota IDOL chhopasiana a châ ha tawh tly cha, na châna a châ ha bâ.

Mongyuh nah ta cha "With Great Power Comes Great Responsibility" vaw tah ei ta. IDOL tahpa moh heta khahlâ zydua ta nâma liata abai beih leipa nata na vaw saduthlie beih leipa, Moh a lâna, pahno hlaona, mohropazy a mopâpa châna achyunazie ta 'Hmotaotheina' (Power) na vaw hnei ha bâ. Cha hmotaotheina cha 'Maophaohna' (Responsibility) ta a vaw pazipâ ha hra.

Na thyutliaheihpazy châta "Ama IDOL" châ ha chi ta; Mara zawpi mo a tawpâna, nâ pielyuzie zydua liata khâ eima mokhâhpa na châ ha bâ. "IDOL" châna he, "Ataopasuana liata sâkhana châpa ta ziza âvaw chakaihpa buakha ta pai ha heihpa" hawhta rie pachâ leipa la, Mara khizaw â dua chhôhta na ziza, na châna he pai aw vei. Chaváta, alykheina ei cha hlâ raohpa ta, "Na maophaohna" he rie patlô ma y.

Hlasathaipa na châna lâ tawhta IDOL na châ thei aw; anodeikuala, hrozie, achuna nata kyhtotie liata "IDOL" na châpa vâta panuapa nata thliepa na châ ha bâ aw. He kyh liata "IDOL" châ lymâ awpa ta khokheina ei cha hlâ.

Nâ deikua kyhtotie liata, âsohsi la na IDOL châna kha patlô ma y.

Nâma châ lykheituhpa,

Robert B.Syuhlô

College Vaih, Siaha