ABEIPANOH SERMON : HRO KRISTA

- By Rev Dr Laiu Fachhai

Zâkô 2017 KTP Pakhypi Biepipa "HRO KRISTA" kha a pha ngaita. Mara Krizyhpa Thyutlia khazie tlai ma, kha biepipa kha a hrokhei thei pazao lymâ aw ei tly???

Hro Krista tahna yzie cha, a chyu thei chaipa hawhta reipa ta, Krista hro ahlypa, Krista hrozie hawhta hro hapa, Krista ta a tao awpazy tao hra ta, a tao lei awpazy tao leipa a châ chai.

1. Tlâhleina cander hri chhiepa a tlôkhei hleikhô ta, sôh khâpa hrao leipa liata hmâpa a châpa Krizyh leipazy ta hmahta pahno ei ta, paôpazypa (kuvâ, châhnamei, karao, sâdâ, khaini, etc) ama tao lei nota, Krizyhpa â tahpazy palie ta, eima tao thlâh hapa he la, Hro Krista tahpa biepipa nahta la â vaw hmie lei chaimâh na. Krista ta la paôpazy eima taopa he â approve thai nahta a lâ vei. Ngiapâ leipazy hmiakô liata nata ngiapâ thiehpazy hmiakô liata Krista moh a pachhietuhpazy tlao eima vaw châ thlâh haw.

2. Tiama hriapasana he Krista Bie, Biehrai pachuna châ ta, sawhkhârai a hriapa Krizyhpa eima châ khiata cha eima maohphaohna patlô ta sawhkhâ ta maniah â hnawpa hawhta hria awpa a châ. Eima sawhkhâ raihria maohphaohna eima patlô vei khiata cha, Krista palôh tlâh aw vei. Sawhkhâ rai a hria leipazy chhaota Khazohpa ta Mara râh leilô phapa maniah a piepa he eima hria awpa a châ. Chavata thathipa thyutliazy cha Hro Krista biepipa hawhta hroh leipa ei ta, rai a hria leipazy cha Krista palôh patlâh thei aw veih ei.

3. Certificate liata kô pachypa zy, certificate do leipa taopa zy, phi chhyhpa ta bie reipa nata haipa bie rei laihpa zy, phi chhyhpa ta sôh hmâna taopa zy he, Hro Krista tahpa biepipa ta a hneipa thyutliazy hrozie awpa châ vei.

Summary:

Paôpazypa tao pâna chôta, a sawhkhârai maohphaohna patlô leipa ta, sawhkhâ ta y n'awpa a tahpa liata y leipa ta nata rai a hria hoh leipazy nata haipa ta certifiate zy tao laih ta haipa biezy a rei pâ laih thlah hapazy la, Haleluia ei 700 taih pie thei hra ei sala, kâhvi leipa ta noh khazie leichâ tlyma y thei hra ei sala, zâ-khidei lâh thei hra ei sala, chiatlua liata noh y ta a hlauh thei hra ei sala, â bôkalie lâta a hlauh ngâ kaw hra ei sala, latho poh khâ ta a bu ngâ thlah ha hra ei sala, "thlahpa saw" a thysâh ta sa hra ei sala, aluahnazy a hmôpa hawhta â reih ngâ kaw hra ei sala, Hro Krista a hneipa thyutliazy châ pyly veih ei.

Bâlâ hmia liata a pakhu a paneih beih leipa, Hro Krista a hnei hapa, a eih pachaipa ta a chô liata palâsapa kao thôhpazy liata Hro Krista a hnei hapa thyutliazy Mara râh ta a châ ngiah ei.

Vaw thyu para bâ teh u!